ប្រទេសអារ៉ាប៊ីសាអូឌីត ៖ ក្លិបបាល់ទាត់ Al Hilal នៅប្រទេសអារ៉ាប៊ីសាអូឌីត បានច្រានចោលសំណើចុះហត្ថលេខាលើខ្សែប្រយុទ្ធ Cristiano Ronaldo បើទោះបីជាប្រធានក្រុម…
ប្រទេសអារ៉ាប៊ីសាអូឌីត ៖ ក្លិបបាល់ទាត់ Al Hilal នៅប្រទេសអារ៉ាប៊ីសាអូឌីត បានច្រានចោលសំណើចុះហត្ថលេខាលើខ្សែប្រយុទ្ធ Cristiano Ronaldo បើទោះបីជាប្រធានក្រុម Al Nassr រូបនេះ ត្រូវបានរាយការណ៍ថាកំពុងស្វែងរកការចាកចេញ។
យោងតាមអ្នកសារព័ត៌មានជនជាតិបារាំង Sacha Tavolieri របស់ RMC Sport បានរាយការណ៍ថា មូលនិធិវិនិយោគសាធារណៈអារ៉ាប៊ីសាអូឌីត ឬ PIF ដែលគ្រប់គ្រងទ្រព្យសម្បត្តិចំនួន៩៣០ពាន់លានដុល្លារអាមេរិក និងជាម្ចាស់ក្លិបកំពូលអារ៉ាប៊ីសាអូឌីតចំនួន ៤ រួមមាន Al Hilal, Al Nassr, Al Ittihad និង Al Ahli បានផ្តល់ឱកាសឱ្យក្លិប Al Hilal ចុះហត្ថលេខានាំយកខ្សែប្រយុទ្ធ Cristiano Ronaldo ពីក្លិប Al Nassr។
PIF ចង់បានប្រធានក្រុមជម្រើសជាតិព័រទុយហ្គាល់វ័យ៤០ឆ្នាំរូបនេះ ចូលរួមជាមួយ Al Hilal ដើម្បីអាចបង្ហាញវត្តមាននៅក្នុងពានរង្វាន់ FIFA Club World Cup ឆ្នាំ ២០២៥ ដែលសហរដ្ឋអាមេរិកធ្វើជាម្ចាស់ផ្ទះ និងចាប់ផ្តើមនៅថ្ងៃទី១៥ ខែមិថុនា ខាងមុខនេះ ព្រោះ Al Hilal ជាក្រុមតំណាងអារ៉ាប៊ីសាអូឌីតតែមួយគត់នៅក្នុងការប្រកួតនេះ ហើយវត្តមាន Ronaldo ត្រូវបានមើលឃើញថា គឺជាការជំរុញទស្សនិកជនដ៏ខ្លាំងក្លា។
ទោះជាយ៉ាងណាក៏ដោយ ក្រុមប្រឹក្សាភិបាលរបស់ក្លិប Al Hilal បានច្រានចោលការផ្តល់ជូននេះ។ នាយកប្រតិបត្តិក្លិបមានមូលដ្ឋាននៅទីក្រុងរីយ៉ាដមួយន ត្រូវបានរាយការណ៍ថា ចង់បានខ្សែប្រយុទ្ធវ័យក្មេងជាងដូចជា ខ្សែប្រយុទ្ធនីហ្សេរីយ៉ា Victor Osimhen វ័យ២៦ឆ្នាំជាដើម។
Ronaldo មិនបានហ្វឹកហាត់ជាមួយ Al Nassr កាលពីថ្មីៗនេះ ចំពេលមានរបាយការណ៍ថា អតីតខ្សែប្រយុទ្ធឆ្នើមក្រុម Sporting Lisbon, Manchester United, Real Madrid និង Juventus រូបនេះ កំពុងមិនសប្បាយចិត្តនឹងការដឹកនាំរបស់គ្រូបង្វឹកលោក Stefano Pioli ហើយចង់ទាមទារឱ្យមានការរុះរើកីឡាករក្នុងក្រុមជាច្រើននាក់ផងដែរ។ Ronaldo បានខកខានការប្រកួតពីរលើកជាប់ៗគ្នា ដោយលោកគ្រូបង្វឹក Stefano Pioli អះអាងថា ដោយសារបញ្ហារបួស។ ក្រុម Al Nassr បានបរាជ័យរួចទៅហើយក្នុងការឈ្នះកៅអីការប្រកួត AFC Champions League រដូវកាលក្រោយ ដោយសារពួកគេមិនអាចបញ្ចប់ក្នុងចំណាត់ថ្នាក់កំពូលទាំងពីរ (Top 2) នៅលីគកំពូល Saudi Pro League។ មានតែ៣ក្លិបប៉ុណ្ណោះតំណាងអារ៉ាប៊ីសាអូឌីតមានសិទ្ធិប្រកួតរដូវកាលក្រោយ ដោយ២ក្រុមនៅលីគក្នុងស្រុក និង១ក្រុមគឺ Al Ahli ដែលជាជើងឯក AFC Champions League រដូវកាលនេះ។
Al Hilal នៅតែជាក្លិបដែលជោគជ័យបំផុតរបស់ប្រទេសអារ៉ាប៊ីសាអូឌីត ជាមួយកំណត់ត្រាជើងឯក AFC Champions League ៤ដង និងជើងឯកលីគ Saudi Pro League ចំនួន១៩។ ពួកគេក៏ជាក្លិបអាស៊ីតែមួយគត់ដែលបច្ចុប្បន្នស្ថិតក្នុងចំណាត់ថ្នាក់ក្លិបកំពូលទាំង១០០របស់ពិភពលោក ចងក្រងដោយគេហទំព័រ Opta ដោយឈរនៅចំណាត់ថ្នាក់ ទី៧៨។
ដោយឡែក Cristiano Ronaldo បង្ហាញវត្តមានលើកដំបូងជាមួយ Al Nassr ចាប់តាំងពីខែមករា ឆ្នាំ២០២៣ ប៉ុន្តែរហូតមកទល់នឹងពេលនេះ រូបគេបានឈ្នះពានរង្វាន់ Arab Club Champions Cup តែមួយគត់ជាមួយក្រុម៕ ដកស្រង់ ៖ VnExpress
ចែករំលែកព័តមាននេះ