ខេត្តកណ្ដាល ៖ សមត្ថកិច្ចបានចាប់ឃាត់ខ្លួនជនម្នាក់ កាលពីវេលាម៉ោងប្រមាណ៧យប់ថ្ងៃទី១៨ ខែឧសភា ឆ្នាំ២០២៥កន្លងទៅ នៅលើស្ពានឆ្លងទន្លេបាសាក់ ស្រុកកោះធំ ក្រោយពីជននេះជិះកង់ចូលទៅលួចម៉ូតូគេដែលចតទុកនៅមុខផ្ទះ រួចហើយរត់គេខ្លួនបាន១៦ថ្ងៃ…
ខេត្តកណ្ដាល ៖ សមត្ថកិច្ចបានចាប់ឃាត់ខ្លួនជនម្នាក់ កាលពីវេលាម៉ោងប្រមាណ៧យប់ថ្ងៃទី១៨ ខែឧសភា ឆ្នាំ២០២៥កន្លងទៅ នៅលើស្ពានឆ្លងទន្លេបាសាក់ ស្រុកកោះធំ ក្រោយពីជននេះជិះកង់ចូលទៅលួចម៉ូតូគេដែលចតទុកនៅមុខផ្ទះ រួចហើយរត់គេខ្លួនបាន១៦ថ្ងៃ ។សមត្ថកិច្ចបានឲ្យដឹងថា ម្ចាស់ម៉ូតូឈ្មោះ ហៃ សុវណ្ណ ភេទប្រុស អាយុ៤១ឆ្នាំ មុខរបរលក់ដូរ មានទីលំនៅក្នុងភូមិព្រែកថ្មី ឃុំព្រែកថ្មី ស្រុកកោះធំ ។
ចំណែកជនសង្ស័យឈ្មោះ លី សុវណ្ណរិទ្ធ ភេទប្រុស អាយុ៣៣ឆ្នាំ មុខរបរមិនពិតប្រាកដ មានទីលំនៅក្នុងភូមិព្រែកមេស្រុក សង្កាត់ព្រែកស្តី ក្រុងសំពៅពូន ។ រីឯម៉ូតូដែលជននេះលួចម៉ាកហុងដាប៊ីត ពណ៌សលាយខៀវ ស៊េរីឆ្នាំ ២០២២ ពាក់ផ្លាកលេខ ភ្នំពេញ ១JD-០៤៨៦ ។
ជាមួយនឹងការចាប់ឃាត់ខ្លួននេះ សមត្ថកិច្ចក៏បានដកហូតកង់១គ្រឿងតួប្រុស ដែលជនសង្ស័យជិះធ្វើសកម្មភាពលួចហើយទុកចោល ។សមត្ថកិច្ចបន្តថា កាលពីព្រឹកថ្ងៃទី២ ខែឧសភា ឆ្នាំ២០២៥ វេលាម៉ោងប្រមាណ៨និង៣០នាទីព្រឹក ម្ចាស់ម៉ូតូបានអូសម៉ូតូរបស់គាត់ពីក្នុងផ្ទះយកមកទុកនៅមុខផ្ទះ និងបានទុកកូនសោម៉ូតូនៅក្នុងឃ្លុបខាងមុខ ហើយក៏បានបើករថយន្តដឹកអីវ៉ាន់ចេញទៅលក់ដូរបាត់ទៅ ។លុះបន្តិចក្រោយមក ស្រាប់តែកូនស្រីឈ្មោះ វណ្ណ ស្រីណុច ទូរស័ព្ទមកប្រាប់ថា«ប៉ាៗ ! ម៉ូតូរបស់យើងត្រូវចោរលួចយកទៅបាត់ហើយ» ពេលឮដូច្នេះគាត់ក៏បើករថយន្តត្រឡប់មកផ្ទះវិញ ។
ម្ចាស់ម៉ូតូរៀបរាប់ថា នៅពេលមកដល់ផ្ទះគាត់បានទៅសុំអ្នកជិតខាងឲ្យជួយឆែកកាមេរ៉ាសុវត្ថិភាពមើល ទើបដឹងថាមានជនម្នាក់ជិះកង់ចូលមកលួចយកម៉ូតូរបស់គាត់ជិះចេញទៅតាមផ្លូវជាតិលេខ២១ ដោយបន្សល់ទុកកង់តួប្រុស ពណ៌ខ្មៅនៅកន្លែងកើតហេតុ ។ បន្ទាប់មក គាត់បានទៅរាយការណ៍និងដាក់ពាក្យបណ្តឹងនៅអធិការដ្ឋាននគរបាលស្រុកកោះធំ ដើម្បីឲ្យសមត្ថកិច្ចជួយស្រាវជ្រាវស្វែងរកមុខជនសង្ស័យ ។
លុះមកដល់ថ្ងៃទី១៨ ខែឧសភា ឆ្នាំ២០២៥ វេលាម៉ោងប្រមាណ៧យប់ កម្លាំងនគរបាលប៉ុស្តិ៍សង្កាត់ព្រែកថ្មី សហការជាមួយនគរបាលស្រុកកោះធំ ខណៈចេញល្បាតដល់លើស្ពានឆ្លងទន្លេបាសាក់ ក៏បានជួបមុខសញ្ញាជនសង្ស័យឈ្មោះ លី វណ្ណរិទ្ធ កំពុងជិះកង់នៅលើស្ពានក៏ឃាត់ខ្លួនបញ្ជូនទៅអធិការដ្ឋាននគរបាលស្រុកកោះធំ ដើម្បីសួរនាំ ។នៅចំពោះមុខសមត្ថកិច្ច ជនសង្ស័យឈ្មោះ លី សុវណ្ណរិទ្ធ បានឆ្លើយថា ខ្លួនពិតជាបានចូលទៅលួចយកម៉ូតូរបស់ឈ្មោះ ហៃ សុវណ្ណ ប្រាកដមែន ដោយសារគាត់ទុកកូនសោម៉ូតូនៅក្នុងឃ្លុបម៉ូតូខាងមុខ ។
ដោយឃើញមានឱកាសល្អ ទើបខ្លួនដើរចូលទៅលួចយកម៉ូតូនោះជិះចេញទៅ និងបានបន្សល់ទុកវកង់តួប្រុសពណ៌ខ្មៅ១គ្រឿង នៅកន្លែងកើតហេតុ ។ ក្រោយពេលលួចម៉ូតូបានហើយ ខ្លួនបានជិះម៉ូតូនោះយកទៅបញ្ចាំឲ្យទៅឈ្មោះ ហ៊ីម ភេទប្រុស រស់នៅក្នុងសង្កាត់ព្រែកស្តី ក្រុងសំពៅពូន បានប្រាក់ចំនួន២០០ដុល្លារ យកមកទិញទូរស័ព្ទដៃថ្មី១គ្រឿងម៉ាកវីវ៉ូ ក្នុងតម្លៃ១០០ដុល្លារហើយប្រាក់ដែលនៅសល់ចំនួន១០០ដុល្លារទៀតគឺទុកសម្រាប់ស៊ីចាយ ។ ជនសង្ស័យរួមជាមួយវត្ថុតាង ត្រូវបាននគរបាលស្រុកកោះធំ កសាងសំណុំរឿងបញ្ជូនទៅសាលាដំបូងខេត្ត ដើម្បីចាត់ការតាមផ្លូវច្បាប់ ៕
ចែករំលែកព័តមាននេះ