តម្លៃស្រូវ/អង្ករដែលកសិករកម្ពុជា អាចនឹងប្រមូលផលនៅក្នុងឆ្នាំ២០២៥ និង២០២៦ អាចនឹងមិនមានបញ្ហារឿងតម្លៃប៉ុន្មានឡើយ ដោយសារវៀតណាមត្រូវបានគេព្យាករណ៍ថា នឹងបង្កើនការនាំចូលអង្ករក៏ដូចជាស្រូវ នៅក្នុងបរិមាណដ៏ច្រើន ។ ការិយាល័យកសិកម្មសហរដ្ឋអាមេរិក ដែលគេហៅកាត់ថា…
តម្លៃស្រូវ/អង្ករដែលកសិករកម្ពុជា អាចនឹងប្រមូលផលនៅក្នុងឆ្នាំ២០២៥ និង២០២៦ អាចនឹងមិនមានបញ្ហារឿងតម្លៃប៉ុន្មានឡើយ ដោយសារវៀតណាមត្រូវបានគេព្យាករណ៍ថា នឹងបង្កើនការនាំចូលអង្ករក៏ដូចជាស្រូវ នៅក្នុងបរិមាណដ៏ច្រើន ។
ការិយាល័យកសិកម្មសហរដ្ឋអាមេរិក ដែលគេហៅកាត់ថា USDA បានព្យាករណ៍ថា នាឆ្នាំ២០២៥នេះ និង២០២៦ខាងមុខ វៀតណាមនឹងក្លាយជាប្រទេសនាំចូលស្រូវ/អង្ករធំលំដាប់ទីពីរ របស់ពិភពលោកបន្ទាប់ពីប្រទេសហ្វីលីពីន ។
ប្រភពដដែលបានអះអាងថា បើយោងតាមការប៉ាន់ស្មានផ្នែកផ្គត់ផ្គង់ និងតម្រូវការកសិកម្មពិភពលោកចុងក្រោយបំផុតបានអះអាងថា វៀតណាមត្រូវបានគេព្យាករណ៍បែបនេះដោយសារតែប្រទេសនេះត្រូវការអង្ករដ៏ច្រើន ដើម្បីបំពេញតម្រូវការនាំចេញតាមកិច្ចសន្យាដែលគេធ្វើចំពេលផលិតកម្មស្រូវ ក្នុងប្រទេសធ្លាក់ចុះ ។
ការិយាល័យកសិកម្មសហរដ្ឋអាមេរិកប៉ាន់ប្រមាណថា នៅក្នុងឆ្នាំ២០២៥នេះវៀតណាមនឹងនាំចូលអង្ករនៅក្នុងបរិមាណរហូតដល់ចំនួន៤លានតោន ហើយនៅក្នុងឆ្នាំ២០២៦ គឺអាចដល់៤,១លានតោន ខណៈដែលហ្វីលីពីន ត្រូវបានគេរំពឹងថា នឹងនាំចូលអង្ករច្រើនជាងគេជាមួយនឹងតម្រូវការប្រមាណជា៥,៥លានតោន ។
ពាក់ព័ន្ធនឹងការនាំចេញស្រូវ/អង្ករនេះសហព័ន្ធស្រូវអង្ករកម្ពុជាបានអះអាងថា ៤ខែដើមឆ្នាំកម្ពុជា អាចនាំចេញអង្ករសរុបប្រមាណជាជាង២៨២ពាន់តោន នៅក្នុងតម្លៃប្រមាណជាជាង២០៩ លានដុល្លារ ។ ក្រៅពីនោះកម្ពុជាបាននាំចេញស្រូវប្រមាណជាជាង៣លានតោន នៅក្នុងតម្លៃប្រមាណជា៧២៣លានដុល្លារ ។
ប្រភពដដែលបានអះអាងថា ទីផ្សារអង្ករកម្ពុជា គឺមាន៥៩ ប្រទេស ប៉ុន្តែទីផ្សារស្រូវ គឺមានតែប្រទេសជិតខាងទេ ហើយគេដឹងថា ភាគច្រើនបំផុត គឺប្រទេសវៀតណាមនេះឯង ។
លោក តឿ សារ៉ាន់ ជាកសិករម្នាក់ នៅខេត្តកំពង់ធំ បានអះអាងថា ពីមុនមានឈ្មួញថៃអី ចុះមកទិញដែរ ប៉ុន្តែប៉ុន្មានឆ្នាំចុងក្រោយនេះ គឺមានតែឈ្មួញនៅក្នុងស្រុក និងមកពីវៀតណាម ។ លោកបានអះអាងថា ពេលនេះ លោកមិនទាន់មានស្រូវលក់ទេ ប៉ុន្តែកាលពីឆ្នាំទៅ គឺអាចលក់បាន៥ទៅ៦តោនដែរ ហើយតម្លៃគឺគេចុះមកទិញបានថ្លៃគូរសម គឺមួយតោនជាង១លានរៀលដែរ ។
កសិករម្នាក់ទៀត អាយុ៤៥ ឆ្នាំ នៅស្រុកបាធាយ ខេត្តកំពង់ចាម ឈ្មោះ ជិន សាដែម បានអះអាងថា ឲ្យតែស្រូវបានថ្លៃកសិករចេះតែមានកម្លាំងធ្វើ ហើយពីព្រោះក្រៅពីហូប គឺអាចដោះដូរទូទាត់គ្រាន់ធ្វើឲ្យជីវភាពគ្រាន់បើបន្តិច ។
តាមសហព័ន្ធស្រូវអង្ករកម្ពុជា តម្លៃស្រូវសើមនៅពេលនេះ គឺមួយគីឡូក្រមពីជាង៩០០ទៅ១០០០រៀលបន្តិចបន្តួច ប៉ុន្តែមិនសូវសម្បូរស្រូវសើមទេ ដោយសារតែពេលនេះកសិករទើបតែចាប់ផ្តើមបង្ករបង្កើនផល នៅឡើយ ។ ជាការពិតដោយសារតែការនាំចេញស្រូវនេះ កម្ពុជាត្រូវបានគេដឹងថា គឺកំពុងតែមានអតិរេកពាណិជ្ជកម្មជាមួយនឹងវៀតណាម ។
អគ្គនាយកដ្ឋានគយ និងរដ្ឋាករកម្ពុជាបានអះអាងថា នៅ៤ខែដើមឆ្នាំនេះ កម្ពុជាមានអតិរេកពាណិជ្ជកម្មជាមួយនឹងវៀតណាមប្រមាណជាជាង៣៥៤ លានដុល្លារ ដោយកម្ពុជានាំចេញបានជិត១.៧៩០ លានដុល្លារ ហើយនាំចូលជាង១.៤៣៥ លានដុល្លារ ។ កម្ពុជានាំចូលពីវៀតណាម គឺមានគ្រឿងអេឡិចត្រូនិចរបស់ប្រើប្រាស់ ប្រេងឥន្ធនៈ …ហើយនាំចេញតែផលិតផលកសិកម្ម ៕
ចែករំលែកព័តមាននេះ