ទីក្រុងបាងកក ៖ រដ្ឋាភិបាលរបស់ប្រទេសថៃបានសម្រេចដកគម្រោងចែកប្រាក់ឧបត្ថម្ភ១ម៉ឺនបាត ឬស្មើ ៣០០ដុល្លារអាមេរិកដល់ពលរដ្ឋវ័យក្មេងងាយរងគ្រោះម្នាក់ៗ ដែលមានអាយុពី ១៦ ដល់ ២០ឆ្នាំ ដើម្បីប្តូរទិសដៅថវិកាទៅផែនការជំរុញសេដ្ឋកិច្ចថ្មីវិញ…
ទីក្រុងបាងកក ៖ រដ្ឋាភិបាលរបស់ប្រទេសថៃបានសម្រេចដកគម្រោងចែកប្រាក់ឧបត្ថម្ភ១ម៉ឺនបាត ឬស្មើ ៣០០ដុល្លារអាមេរិកដល់ពលរដ្ឋវ័យក្មេងងាយរងគ្រោះម្នាក់ៗ ដែលមានអាយុពី ១៦ ដល់ ២០ឆ្នាំ ដើម្បីប្តូរទិសដៅថវិកាទៅផែនការជំរុញសេដ្ឋកិច្ចថ្មីវិញ ចំពេលមានការកើនឡើងនៃភាពមិនប្រាកដប្រជានៃសេដ្ឋកិច្ចពិភពលោក។ នេះបើយោងតាមប្រភពពីសារព័ត៌មានថៃ The Nation បានចេញផ្សាយកាលពីពេលថ្មីៗនេះ។
ការសម្រេចចិត្តនេះ ធ្វើឡើងនៅពេលវិស័យនាំចេញ និងផលិតកម្មរបស់ថៃ ប្រឈមនឹងបញ្ហាពីភាពមិនប្រាកដប្រជានៃសេដ្ឋកិច្ចពិភពលោក។ ស្ថិតនៅក្រោមគម្រោងកាបូបឌីជីថលនេះ យុវជនងាយរងគ្រោះចំនួន២,៧លាននាក់ នឹងទទួលបានប្រាក់ឧបត្ថម្ភចំនួន១ម៉ឺនបាតក្នុងម្នាក់ៗ សរុបជាទឹកប្រាក់មានចំនួនរហូតដល់ ២៧ពាន់លានបាត ឬស្មើនឹង ៨១៤លានដុល្លារ ប៉ុន្តែជំនួសមកវិញនូវកញ្ចប់ថវិកាជាង១៥០ពាន់លានបាត ដើម្បីផ្លាស់ប្តូរទិសដៅឆ្ពោះទៅរកផែនការជំរុញសេដ្ឋកិច្ចថ្មីមួយ។
ប្រភពពីរដ្ឋាភិបាលថៃបានបង្ហើបថា ភាពមិនប្រាកដប្រជាសេដ្ឋកិច្ចដែលនឹងរំពឹងទុកក្នុងឆមាសទីពីរនៅឆ្នាំនេះ បានជំរុញឱ្យមានការរុះរើទាំងស្រុងផែនការជំរុញសេដ្ឋកិច្ច។ ដូច្នេះរដ្ឋនឹងប្រើកញ្ចប់ថវិកាចំនួន១៥៧ពាន់លានបាត ឬជាង ៤,៧ពាន់លានដុល្លារពីថវិកាសង្គ្រោះបន្ទាន់ និងថវិកាត្រៀមសម្រាប់ហេតុការកើតឡើងមិនបានគ្រោងទុក ដើម្បីផ្តល់មូលនិធិដល់គំនិតផ្តួចផ្តើមសេដ្ឋកិច្ច ដែលមានគោលដៅច្បាស់លាស់ និងទាន់ពេលវេលា។
លោក ភីឆៃ ឈុនហាវជីរ៉ា (Pichai Chunhavajira) ឧបនាយករដ្ឋមន្ត្រី និងជារដ្ឋមន្ត្រីក្រសួងហិរញ្ញវត្ថុ បានបញ្ជាក់ថា គណៈកម្មាធិការគោលនយោបាយជំរុញសេដ្ឋកិច្ច ដែលដឹកនាំដោយនាយករដ្ឋមន្ត្រីផ្ទាល់ នឹងជួបប្រជុំនៅវិមានរដ្ឋាភិបាលនៅថ្ងៃទី១៩ ខែឧសភា ឆ្នាំ២០២៥។ ស្របពេលក្រសួងហិរញ្ញវត្ថុនឹងស្នើវិធានការថ្មី ដើម្បីជំរុញសេដ្ឋកិច្ច និងកាត់បន្ថយផលប៉ះពាល់ នៃវិធានការពន្ធគយរបស់សហរដ្ឋអាមេរិក ដែលរំពឹងថានឹងប៉ះពាល់ដល់អាជីវកម្មក្នុងស្រុកក្នុងរយៈពេល១ទៅ២ឆ្នាំខាងមុខ។ វិស័យដែលនឹងរងផលប៉ះពាល់ខ្លាំងជាងគេរួមមាន ក្រុមហ៊ុននាំចេញ អាជីវកម្មខ្សែសង្វាក់ផ្គត់ផ្គង់ និងក្រុមហ៊ុនផលិត ដែលប្រឈមនឹងលំហូរចូលនៃទំនិញបរទេសមានតម្លៃថោក។
ទោះយ៉ាងណាក៏ដោយ លោក ភីឆៃ ឈុនហាវជីរ៉ា នៅតែបង្ហាញជំនឿចិត្តថា «ទោះបីជាមានបញ្ហាប្រឈមយ៉ាងណាក៏ដោយ ក៏រដ្ឋាភិបាលនៅតែប្តេជ្ញាចិត្តសម្រេចបានកំណើនផលិតផលក្នុងស្រុកសរុប (GDP) លើសពី ៣% នៅឆ្នាំនេះ។ វិធានការជំរុញបន្ថែមនឹងត្រូវបានណែនាំ ដោយផ្តោតលើវិស័យទេសចរណ៍ និងអចលនទ្រព្យ ដើម្បីការពារហានិភ័យដែលអាចកើតមានក្នុងវិស័យទាំងនេះ»។
ផែនការថ្មីនេះ នឹងត្រូវបានរៀបចំជាកញ្ចប់ផ្តោតលើការដោះស្រាយផលប៉ះពាល់នៃការដំឡើងពន្ធរបស់សហរដ្ឋអាមេរិក ដោយវានឹងផ្តល់អាទិភាពដល់ការរៀបចំរចនាសម្ព័ន្ធផលិតកម្ម និងការគាំទ្រដល់ការគ្រប់គ្រងសាច់ប្រាក់ងាយស្រួលសម្រាប់បណ្តាអាជីវកម្មដែលរងផលប៉ះពាល់។ សេចក្តីសម្រេចនេះ នឹងត្រូវធ្វើឡើងជាផ្លូវការដោយគណៈកម្មាធិការគោលនយោបាយជំរុញសេដ្ឋកិច្ច ដោយមានការចូលរួមពីទីភ្នាក់ងារសំខាន់ៗចំនួនពីរ គឺក្រុមប្រឹក្សាអភិវឌ្ឍន៍សេដ្ឋកិច្ច និងសង្គមជាតិ (NESDC) រួមនឹងធនាគារកណ្តាលថៃ (BoT)។ កិច្ចការរបស់ពួកគេនឹងជួយរដ្ឋាភិបាលពន្យល់ដល់សាធារណជន អំពីមូលហេតុដែលគម្រោងកាបូបឌីជីថលត្រូវបានលុបចោល។
នាយករដ្ឋមន្ត្រីថៃ អ្នកស្រី ផែថងថាន ស៊ីណាវ៉ាត់ (Paetongtarn Shinawatra) បានលើកឡើងរួចហើយថា គោលនយោបាយជំរុញសេដ្ឋកិច្ចផ្សេងៗ កំពុងត្រូវបានស្វែងរក ដោយមានការដាក់បញ្ចូលនៅគ្រប់ក្រុមអាយុទាំងអស់ជាអាទិភាព ជាជាងកំណត់គោលដៅអាយុប្រជាសាស្ត្រជាក់លាក់ដូចដែលបានគ្រោងទុក។ អ្នកស្រីបានថ្លែងថា «នេះគឺជាវិបត្តិសេដ្ឋកិច្ចពិភពលោក។ យើងត្រូវតែប្រើប្រាស់ទាំងធនធានហិរញ្ញវត្ថុ និងឧបករណ៍គោលនយោបាយឱ្យបានត្រឹមត្រូវ ដើម្បីជំរុញសេដ្ឋកិច្ចជាតិទាំងមូល មិនមែនផ្តោតតែលើក្រុមអាយុតែមួយប៉ុណ្ណោះទេ»៕
ចែករំលែកព័តមាននេះ