ខេត្តកំពង់ធំ ៖ មានករណីរន្ទះបាញ់បណ្តាលឱ្យស្លាប់ក្មេងស្រីម្នាក់ ចំណែកក្មេងស្រី២នាក់ទៀតរបួសធ្ងន់ស្រាល ។ ហេតុការណ៍នេះបានកើតឡើងកាលពីវេលាម៉ោងប្រហែល៥ល្ងាចថ្ងៃទី១៦ ខែឧសភា ឆ្នាំ២០២៥ ស្ថិតនៅក្នុងភូមិអូរពកសាមគ្គី ឃុំមានឫទ្ធិ…
ខេត្តកំពង់ធំ ៖ មានករណីរន្ទះបាញ់បណ្តាលឱ្យស្លាប់ក្មេងស្រីម្នាក់ ចំណែកក្មេងស្រី២នាក់ទៀតរបួសធ្ងន់ស្រាល ។ ហេតុការណ៍នេះបានកើតឡើងកាលពីវេលាម៉ោងប្រហែល៥ល្ងាចថ្ងៃទី១៦ ខែឧសភា ឆ្នាំ២០២៥ ស្ថិតនៅក្នុងភូមិអូរពកសាមគ្គី ឃុំមានឫទ្ធិ ស្រុកសណ្ដាន់ ខេត្តកំពង់ធំ ។
យោងតាមការអោយដឹងពីលោកវរសេនីយ៍ទោ នួន គំនិត អធិការរងនគរបាលស្រុកសណ្តាន់ ទទួលផ្នែកព្រហ្មទណ្ឌ បានអោយដឹងថា! នៅក្នុងករណីគ្រោះធម្មជាតិរន្ទះបាញ់ខាងលើនេះបានបណ្ដាលឲ្យក្មេងស្រីម្នាក់ស្លាប់ និងរងរបួសធ្ងន់ស្រាលចំនួនពីរនាក់ រួមមានៈ
១-ឈ្មោះ ហឹម បូនាថ ភេទស្រី អាយុ១៤ឆ្នាំ (បានស្លាប់នៅកន្លែងកើតហេតុ) នាងរស់នៅភូមិអូរពកសាមគ្គី ឃុំមានរិទ្ធ ទី២-ឈ្មោះ ណាត ដាណេ ភេទស្រី រងរបួសស្រាល និង ទី៣-ឈ្មោះ យេន គន្ធា ភេទស្រី រងរបួសធ្ងន់ ។
លោកអធិការរងបន្តថា នៅមុនពេលកើតហេតុៈកុមារីរងគ្រោះខាងលើមានអាយុប្រហាក់ប្រហែលគ្នា ជាសិស្សរៀននៅសាលាវិទ្យាល័យវង្សមានរិទ្ធ ស្ថិតនៅក្នុងឃុំមានរិទ្ធ ស្រុកសណ្តាន់ បាននាំគ្នាទៅរៀនគួរនៅផ្ទះលោកគ្រូឈ្មោះ លេង ណាឡែន ភេទប្រុសអាយុ៤៤ឆ្នាំ មុខរបរគ្រូបង្រៀន នឹងប្រពន្ធឈ្មោះ ម៉ាន់ សារី អាយុ៣៥ឆ្នាំមុខរបរជាគ្រូបង្រៀនដូចគ្នា ខណៈជនរងគ្រោះកំពុងតែលេងនៅក្រោមដើមស្វាយចន្ទី គាប់ជួនផ្ទៃមេឃខ្មៅរកកល់ចង់ភ្លៀងផងនោះស្រាប់តែគេឃើញភ្នែកបន្ទោលឆ្វាចឡើង រន្ទះក៏ចាប់ផ្តើមបាញ់ចំកញ្ចក់ម៉ូតូរបស់កូនសិស្សប្រុសម្នាក់ឈ្មោះ ហន លីហ៊ង រស់នៅភូមិសំអោង ឃុំមានរិទ្ធ បណ្តាលអោយចំជនរងគ្រោះដែលជាក្មេងស្រីខាងលើទាំងបីនាក់ស្លាប់ និងរបួសធ្ងន់ស្រាលតែម្តង ។
ក្រោយពេលកើតហេតុ ជនរងគ្រោះត្រូវបានបញ្ជូនទៅព្យាបាលនៅគ្លីនិចឯកជន និងនៅមណ្ឌុលសុខភាពស្រុកសណ្តាន់ ចំណែកអ្នកស្លាប់សមត្ថកិច្ចបានប្រគល់ជូនសាច់ញាតិយកទៅធ្វើបុណ្យតាមប្រពៃណី ។
សមត្ថកិច្ចប្រាប់ថា ករណីគ្រោះថ្នាក់ធម្មជាតិខាងលើនេះ ក៏ជាការជូនតំណឹងដល់បងប្អូនប្រជាពលរដ្ឋយើងអោយបានជ្រាបថា!នៅពេលណាដែលផ្ទៃមេឃខ្មៅរកកល់ចង់ភ្លៀងលាយឡំ ផ្គរ ខ្យល់កន្ត្រាក់នឹងរន្ទះផងនោះ សូមបងប្អូនប្រញាប់រត់ទៅរកកន្លែងណាដែលមានសុវត្ថិភាពអោយបានលឿនបំផុតដែលអាចធ្វើទៅបាន ដូចជារត់ចូលជ្រកក្នុងរោង ឬក៏ផ្ទះជាដើម ។ល។ ដោយមិនត្រូវនៅជិតបង្គោលខ្សែរភ្លើង ឬនៅជ្រកក្រោមដើមឈើនោះឡើយ ដូចជាករណីខាងលើនេះនោះទេដែលជាហេតុនាំអោយមានគ្រោះជាយត្ថាហេតុកើតឡើង ៕
ចែករំលែកព័តមាននេះ