រាជធានីភ្នំពេញ ៖ រថយន្តសណ្ដោងកន្ទុយរ៉ឺម៉ក ដឹកទូកុងតឺន័រ ១គ្រឿង ខណៈកំពុងបើកបរសុខៗ ស្រាប់តែរបូតកន្ទុយរ៉ឺម៉ក ដែលមានទូកុងតឺន័រនៅលើនោះ ចេញពីក្បាលរថយន្តធ្លាក់អុកលើផ្លូវលាន់សូរដូចគ្រាប់ផ្លោង ជាហេតុបង្កឲ្យអ្នកដំណើរមានការភ័យខ្លាចគ្រប់ៗគ្នា។…
រាជធានីភ្នំពេញ ៖ រថយន្តសណ្ដោងកន្ទុយរ៉ឺម៉ក ដឹកទូកុងតឺន័រ ១គ្រឿង ខណៈកំពុងបើកបរសុខៗ ស្រាប់តែរបូតកន្ទុយរ៉ឺម៉ក ដែលមានទូកុងតឺន័រនៅលើនោះ ចេញពីក្បាលរថយន្តធ្លាក់អុកលើផ្លូវលាន់សូរដូចគ្រាប់ផ្លោង ជាហេតុបង្កឲ្យអ្នកដំណើរមានការភ័យខ្លាចគ្រប់ៗគ្នា។ ទាក់ទងទៅនឹងហេតុការណ៍នេះដែរ ត្រូវបានសមត្ថកិច្ច ក៏ដូចជាប្រជាពលរដ្ឋលើកឡើងថា ក្រុមហ៊ុនដឹកជញ្ជូនមួយនះ ធ្វេសប្រហែស គ្មានការត្រួតពិនិត្យឲ្យបានត្រឹមត្រូវទេ មុននឹងចេញដំណើរ ។
ហេតុការណ៍នោះ បានកើតឡើងកាលពីវេលាម៉ោង១និង៣០នាទីរសៀលថ្ងៃទី១៥ ខែឧសភា ឆ្នាំ២០២៥ នៅតាមមហាវិថីឈ្នះ-ឈ្នះ ត្រង់ចំណុចភ្លើងស្តុបក្រោមស្ពានមហាវិថីស៊ី ជីនពីង ហៅផ្លូវក្រវាត់ក្រុងទី៣ ស្ថិតនៅខាងលិចផ្សារជម្ពូវ័ន ក្នុងភូមិព្រៃស្វាយ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។
រថយន្តខាងលើនោះម៉ាក FRIEGHTLINER ពណ៍ស ហើយក្បាលរថយន្ត និងកន្ទុយរ៉ឺម៉កពាក់ស្លាកលេខដូចគ្នា គឺភ្នំពេញ 3C-4602 ប៉ុន្តែពុំត្រូវបានគេស្គាល់ថា ជារថយន្តរបស់ក្រុមហ៊ុនផែស្ងួត ណាមួយនោះទេ ។
ប្រជាពលរដ្ឋបាននិយាយថា នៅមុនពេលកើតហេតុ ពួកគាត់បានឃើញរថយន្ត ១គ្រឿងនេះ បើកបរធ្វើដំណើរតាមមហាវិថីឈ្នះ-ឈ្នះ ក្នុងទិសដៅពីជើងទៅត្បូង ក្នុងល្បឿនលឿនគួរសមដែរ។ លុះពេលទៅដល់ត្រង់ចំណុចកើតហេតុ បានបត់ស្ដាំដៃ ដើម្បីឡើងផ្លូវជាតិលេខ៤ សំដៅទៅទិសខាងលិចវិញ ស្រាប់តែរបូតកន្ទុយរ៉ឺម៉ក ដែលមានទូកុងតឺន័រនៅលើនោះ ចេញពីក្បាលរថយន្ត ហើយធ្លាក់អុកលើផ្លូវលាន់សូរក្ឌាំងដូចគ្រាប់ផ្លោង ។
ប្រភពដដែល បាននិយាយប្រាប់ទៀតថា ចំណែកក្បាលរថយន្ត ដោយសារតែបើកលឿនដែរ បានហួសទៅមុខចម្ងាយប្រមាណជាង៥០ម៉ែត្រ ទើបឈប់ស្ងៀម ហើយខណៈនោះ បានធ្វើឲ្យពួកគាត់មានការភ័យខ្លាចខ្លាំងណាស់។ មិនតែប៉ុណ្ណោះ ចាត់ទុកជាសំណាងហើយ ដែលកន្ទុយរ៉ឺម៉ក ដឹកទូកុងតឺន័រ អត់ក្រឡាប់ បណ្ដាលឲ្យធ្លាក់ទូកុងតឺន័រចេញ ប្រសិនបើក្រឡាប់ ឬក៏ធ្លាក់វិញ ច្បាស់ជាសង្កត់រថយន្ត និងម៉ូតូនៅជិតនោះ បង្កគ្រោះថ្នាក់ជាក់ជាមិនខានឡើយ ។
ក្រោយពេលកើតហេតុ នគរបាលការិយាល័យចរាចរណ៍ផ្លូវគោក នៃស្នងការដ្ឋានរាជធានីភ្នំពេញ ឲ្យតំណាងក្រុមហ៊ុននោះ យកក្បាលរថយន្តខាងលើទៅថ្ពក់សំណ្ដោងឡើងកន្ទុយរ៉ឺម៉កនោះឡើងវិញ។ បន្ទាប់មក នគរបាលបាននាំយកទៅរក្សាទុករង់ចាំការផាកពិន័យ និងអប់រំ នៅពេលក្រោយ ដោយនគរបាលបញ្ជាក់ថា ខាងក្រុមហ៊ុននោះ មានការធ្វេសប្រហែស គ្មានការត្រួតពិនិត្យឲ្យបានត្រឹមត្រូវ មុននឹងចេញដំណើរ ដែលអាចបង្កគ្រោះថ្នាក់ដល់អ្នកដទៃគ្រប់ពេលបាន ។
សូមរម្លឹកផងដែរថា កាលពីប៉ុន្មានខែមុន នៅត្រង់ចំណុចខាងលើនោះ ក៏ធ្លាប់មានរថយន្តកុងតឺន័រ ១គ្រឿង បានរបូតគន្លឹះ ធ្លាក់ទូកុងតឺន័រ មកលើផ្លូវម្ដងរួចមកហើយដែរ ហើយកាលណោះ ក៏ពុំបានបណ្ដាលឲ្យមានមនុស្សគ្រោះថ្នាក់នោះដែរ ប៉ុន្តែសូមបងប្អូនប្រជាពលរដ្ឋ ដែលធ្វើដំណើរជិតរថយន្តដឹកកុងតឺន័រ ទាំងឡាយ គួរតែមានការប្រុងប្រយ័ត្ន ឲ្យបានខ្ពស់ ចៀសវាងខ្លាចមានគ្រោះថ្នាក់កើតឡើង ជាយកថាហេតុ ណាមួយ
៕
ចែករំលែកព័តមាននេះ