ចោរឆក់ធ្វើសកម្មភាពតាមខេត្តមកពូននៅភ្នំពេញ
- ភ្នំពេញ
រាជធានីភ្នំពេញ ៖ កាលពីថ្ងៃទី៣០ ខែមេសា ឆ្នាំ២០២៥ វេលាម៉ោង០៩និង៣០នាទី ត្រង់ចំណុចភូមិទី២ សង្កាត់រកាកណ្តាល ក្រុងក្រចេះ ខេត្តក្រចេះ…
រាជធានីភ្នំពេញ ៖ កាលពីថ្ងៃទី៣០ ខែមេសា ឆ្នាំ២០២៥ វេលាម៉ោង០៩និង៣០នាទី ត្រង់ចំណុចភូមិទី២ សង្កាត់រកាកណ្តាល ក្រុងក្រចេះ ខេត្តក្រចេះ មានករណីឆក់កាបូបមួយ បង្កឡើងដោយជនសង្ស័យមានគ្នា៣នាក់ ជិះម៉ូតូ៣គ្រឿង បានធ្វើសកម្មភាពឆក់បានសម្រេចពីជនរងគ្រោះឈ្មោះ ធាវ សុខរ៉ុម ភេទស្រី អាយុ៥៥ឆ្នាំ ជនជាតិខ្មែរ ។
ក្រោយមានហេតុការណ៍ខាងលើនោះកើតឡើង ដោយអនុវត្តតាមបទបញ្ជារបស់លោកឧត្តមសេនីយ៍ឯក ង៉េង ជួ ប្រធាននាយកដ្ឋាននគរបាលព្រហ្មទណ្ឌ កម្លាំងជំនាញរបស់នាយកដ្ឋាននគរបាលព្រហ្មទណ្ឌ ដឹកនាំដោយលោកឧត្តមសេនីយ៍ត្រី ហ៊ុន មុន្នីរ័ត្ន វរសេនីយ៍ឯក ហែម បូណា និងវរសេនីយ៍ឯក ឆាន់ គីមលី អនុប្រធាននាយកដ្ឋាន បានដឹកនាំសហការជាមួយស្នងការដ្ឋាននគរបាលខេត្តក្រចេះ ខេត្តកំពត ខេត្តកណ្តាល អធិការដ្ឋាននគរបាលខណ្ឌបឹងកេងកង និងខណ្ឌ៧មករា ធ្វើការស្រាវជ្រាវតាមនីតិវិធី និងជំនាញ រហូតកំណត់បានអត្តសញ្ញាណ និងទីតាំងលាក់ខ្លួនរបស់ជនសង្ស័យខាងលើ ។
លុះនៅថ្ងៃទី០៤ ខែឧសភា ឆ្នាំ២០២៥ វេលាម៉ោង១៨និង០៥នាទី កម្លាំងជំនាញបានបន្តដឹកនាំសហការ ដោយឃាត់ខ្លួនបានជនសង្ស័យម្នាក់ឈ្មោះ ចាន់ វាស្នារិទ្ធ ភេទប្រុស អាយុ២៧ឆ្នាំ ជនជាតិខ្មែរ ត្រង់ចំណុចភូមិដា ឃុំដា ស្រុកចិត្របុរី ខេត្តក្រចេះ ។
នៅថ្ងៃទី១៣ ខែឧសភា ឆ្នាំ២០២៥ វេលាម៉ោង១៥និង១០នាទី ឃាត់ខ្លួនបានជនសង្ស័យចំនួន ៣នាក់ទៀតរួមមាន ៖
១-ឈ្មោះ ម៉េង គីមហ៊ួយ ភេទស្រី អាយុ២៧ឆ្នាំ ជនជាតិខ្មែរ ។
២-ឈ្មោះ សោម ពេជ្រ ភេទប្រុស អាយុ៣០ឆ្នាំ ជនជាតិខ្មែរ ត្រង់ចំណុចភូមិជុំគ្រៀល ឃុំជុំគ្រៀល ស្រុកទឹកឈូ ខេត្តកំពត ។
៣-ឈ្មោះ ឆេង គ័ង ភេទប្រុស អាយុ២៩ឆ្នាំ ជនជាតិខ្មែរ ត្រង់ចំណុចផ្លូវជាតិលេខ៤ ឃុំបែកចាន ស្រុកអង្គស្នួល ខេត្តកណ្តាល ។
ជនសង្ស័យខាងលើបានឆ្លើយសារភាពថា កាលពីថ្ងៃទី៣០ ខែមេសា ឆ្នាំ២០២៥ ពួកខ្លួនពិតជាបានធ្វើសកម្មភាពឆក់កាបូបពីជនរងគ្រោះត្រង់ចំណុចភូមិទី២ សង្កាត់រកាកណ្តាល ក្រុងក្រចេះ ខេត្តក្រចេះ ពិតប្រាកដមែន ។ ចំពោះសំភារះ(គ្រឿងអលង្ការ) ដែលខ្លួនបានមកពីជនរងគ្រោះ គឺពួកខ្លួនបានយកទៅលក់នៅ២ទីតាំងផ្សេងគ្នា ទីតាំងទី១ នៅចំណុចក្រុងអរិយក្សត្រ ទីតាំងទី២ នៅចំណុចស្រុកខ្សាច់កណ្តាល ។
បន្ទាប់មកនៅថ្ងៃទី១៤ ខែឧសភា ឆ្នាំ២០២៤ កម្លាំងជំនាញបានចុះដល់ទីតាំងដែលទទួលទិញគ្រឿងអលង្ការទាំង២កន្លែងខាងលើ ដោយបានដកហូតគ្រឿងអលង្ការមួយចំនួន ដើម្បីយកប្រគល់ជូនជនរងគ្រោះវិញ ។
បច្ចុប្បន្ន ជនសង្ស័យខាងលើ ត្រូវបាននាយកដ្ឋាននគរបាលព្រហ្មទណ្ឌ ប្រគល់ជូនស្នងការដ្ឋាននគរបាលខេត្តក្រចេះ ដើម្បីកសាងសំណុំរឿងតាមនីតិវិធីបន្ត ៕
ចែករំលែកព័តមាននេះ