សង្គ្រាមអ៊ុយក្រែន ៖ ខណៈការចរចារវាងរុស្ស៊ី និងអ៊ុយក្រែន ត្រូវបើកធ្វើនាថ្ងៃទី១៥ ឧសភា នៅក្រុងអ៊ីស្តង់់ប៊ុលតួកគី ទីបំផុត ខកខាន ដោយការចរចាត្រីភាគីត្រូវគ្រោងធ្វើនាថ្ងៃទី១៦…
សង្គ្រាមអ៊ុយក្រែន ៖ ខណៈការចរចារវាងរុស្ស៊ី និងអ៊ុយក្រែន ត្រូវបើកធ្វើនាថ្ងៃទី១៥ ឧសភា នៅក្រុងអ៊ីស្តង់់ប៊ុលតួកគី ទីបំផុត ខកខាន ដោយការចរចាត្រីភាគីត្រូវគ្រោងធ្វើនាថ្ងៃទី១៦ ឧសភា វិញ។ ពេញមួយថ្ងៃទី១៥ ឧសភា ការប្រមាថគ្នាររវាងភាគីអ៊ុយក្រែន និងរុស្ស៊ីបានផ្ទុះឡើង ។
ប្រធានាធិបតីអ៊ុយក្រែនលោកវ៉ូឡូឌីមៀរហ្សេឡេនស្គី ដោយចោទប្រកាន់គណៈប្រតិភូរុស្ស៊ី បញ្ជូនមកក្រុងអ៊ីស្ដង់ប៊ុលថា ជាគណៈប្រតិភូក្លែងក្លាយ រុស្ស៊ីបានតបតវិញដោយចាត់ទុកលោកហ្សេឡេនស្គីថាជាតួត្លុក។
ទីបំផុត នាវេលាល្ងាចរដ្ឋមន្ត្រីការបរទេសអាមេរិកលោកម៉ាកូរ៉ូប៊ីយ៉ូបានកែប្រែស្ថានការណ៍ដោយលើកឡើងថា ការចរចាសន្តិភាពរវាងរុស្ស៊ី និងអ៊ុយក្រែន មិនអាចធ្វើបានក្នុងថ្ងៃទី១៥ឧសភាដូចការគ្រោងទុកឡើយហើយលោកថា អាមេរិកក៏មិនច្បាស់ដែរចំពោះអ្វីដែលកើតមាននាថ្ងៃទី១៦ឧសភា។ លោកទទួលស្គាល់ថាបណ្ដាតំណាងរបស់រុស្ស៊ី ដែលបញ្ជូនទៅ មិនមានកម្រិតដូចការរំពឹងទុកឡើយ។ ទោះបីយ៉ាងណាលោកជម្រុញឲ្យគ្រប់ភាគីនាំគ្នាទៅកាត់មាត់សមុទ្រBOSPHORE។
ប្រធានាធិបតីរុស្ស៊ី លោកវ្ល៉ាឌីមៀរពូទីនបានបញ្ជូនទៅតែ អនុរដ្ឋមន្ត្រីការបរទេសនិងការពារប្រទេស ដឹកនាំដោយទីប្រឹក្សាលោកគឺលោកវ្ល៉ាឌីមៀរមេឌីនស្គី។ ទីប្រឹក្សារូបនោះថ្លែងក្នុងបទសម្ភាសន៍តាមទូរទស្សន៍មួយនៅក្រុងអ៊ីស្តង់ប៊ុលថា យើងរង់ចាំជួបភាគីអ៊ុយក្រែនព្រឹកស្អែកចាប់ពីម៉ោង១០ទៅ។ ពិតណាស់លោកហ្សេឡេនស្គិមិនទៅចូលរួមទេព្រោះថាសមភាគីរុស្ស៊ី លោកវ្ល៉ាឌីមៀរពូទីនមិនមកចូលរួម ដូច្នេះរដ្ឋមន្ត្រីការពារប្រទេស លោករ៉ូស្ទេមអ៊ូមីនឹងដឹកនាំគណៈប្រតិភូអ៊ុយក្រែន។
នាល្ងាចថ្ងៃទី១៥ឧសភាប្រភពមួយនៃក្រសួងការបរទេសតួកគីអះអាងថា តាមមើលទៅដំណើរការនៃការចរចាហាក់មិនច្បាស់លាស់ឡើយដោយអះអាងថា ការចរចាត្រីភាគីស្ថិតក្នុងរបៀបវារៈសម្រាប់ថ្ងៃទី១៦ឧសភា ជំនួសការចារចាដោយផ្ទាល់រុស្ស៊ី-អ៊ុយក្រែន។ កិច្ចប្រជុំត្រីភាគីនោះមួយផ្នែកគឺរវាងអាមេរិក អ៊ុយក្រែននិងតួកគី ហើយមួយផ្នែកទៀតរវាងរុស្ស៊ី អ៊ុយក្រែននិងតួកគី។
ទោះបីយ៉ាណា លោកហ្សេឡេនស្គីគូសបញ្ជាក់ថា បណ្ដាអ្នកចរចាអ៊ុយក្រែន ត្រូវចរចាលើបទឈប់បាញ់គ្នាមួយ។ ចំណែកប្រធានគណៈប្រតិភូរុស្ស៊ី លោកវ្ល៉ាឌីមៀរមេឌីនស្គីវិញលើកឡើងថា ប្រទេសលោកចាត់ទុកការចរចាថ្មី ត្រូវធ្វើបន្តការចរចាទ្វេភាគីដែលមិនសម្រេចកាលពីឆ្នាំ២០២២។ លោកអះអាងថាត្រៀមលើលទ្ធភាពនៃការសម្របសម្រួលគ្នា តែមិននិយាយលម្អិតឡើយនិងថា គណៈប្រតិភូរបស់លោកមានសិទ្ធិក្នុងការធ្វើសេចក្ដីសម្រេចនានា៕
ចែករំលែកព័តមាននេះ