ទីក្រុងដេលី ៖ ប្រទេសឥណ្ឌាបានធ្វើការច្រាលចោលយ៉ាងឆាប់រហ័សទៅនឹងការអះអាងរបស់ប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) កាលពីថ្ងៃទី១៥ ខែឧសភា…
ទីក្រុងដេលី ៖ ប្រទេសឥណ្ឌាបានធ្វើការច្រាលចោលយ៉ាងឆាប់រហ័សទៅនឹងការអះអាងរបស់ប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) កាលពីថ្ងៃទី១៥ ខែឧសភា ឆ្នាំ២០២៥ ដែលថា ប្រទេសឥណ្ឌាបានស្នើលុបចោលពន្ធទាំងអស់លើទំនិញនាំចូលអាមេរិក។ នេះបើយោងតាមប្រភពពី BBC ចេញផ្សាយកាលពីថ្ងៃទី១៥ ខែឧសភា ឆ្នាំ២០២៥។
នៅក្នុងសេចក្តីថ្លែងការណ៍មួយទៅកាន់បណ្តាទីភ្នាក់ងារសារព័ត៌មានក្នុងស្រុក លោក Subrahmanyam Jaishankar រដ្ឋមន្ត្រីការបរទេសឥណ្ឌាបានប្រឆាំងនឹងការអះអាងនេះ ដោយថ្លែងថា ការចរចានៅតែបន្ត ហើយគ្មានអ្វីត្រូវបានសម្រេចនៅឡើយទេ រហូតដល់អ្វីៗទាំងអស់ត្រូវបានសម្រេចចប់សព្វគ្រប់។ សេចក្តីថ្លែងការណ៍នេះ គឺផ្ទុយស្រឡះទៅនឹងការអត្ថាធិប្បាយរបស់លោក ត្រាំ ទៅកាន់បណ្តាអ្នកសារព័ត៌មាន ដោយលោកបានអះអាងដូច្នេះថា រដ្ឋាភិបាលឥណ្ឌាទើបផ្តល់ដំណឹងឱ្យយើងនូវកិច្ចព្រមព្រៀងមួយដ៏សំខាន់ គឺកិច្ចព្រមព្រៀងគ្មានពន្ធសម្រាប់ទំនិញអាមេរិក»។
បច្ចុប្បន្នប្រទេសឥណ្ឌា និងសហរដ្ឋអាមេរិកកំពុងតែពិភាក្សាគ្នា ដើម្បីចរចាកិច្ចព្រមព្រៀងពាណិជ្ជកម្ម។ លោក Jaishankar បានគូសបញ្ជាក់កាលពីថ្ងៃព្រហស្បតិ៍ថា កិច្ចព្រមព្រៀងពាណិជ្ជកម្មណាមួយកើតឡើង ត្រូវតែផ្តល់ផលប្រយោជន៍គ្នាទៅវិញទៅមក និងដំណើរការសម្រាប់ភាគីទាំងពីរ។ នោះជាការរំពឹងទុកពីកិច្ចព្រមព្រៀងពាណិជ្ជកម្ម ហើយរហូតទាល់តែការចរចាសម្រេចបានផ្លែផ្កា ទើបការវិនិច្ឆ័យណាមួយសម្រេចជាផ្លូវការ។
លោក ត្រាំ បានធ្វើអត្ថាធិប្បាយពាក់ព័ន្ធការចរចាជាមួយឥណ្ឌា នៅពេលលោកកំពុងថ្លែងនៅក្នុងព្រឹត្តិការណ៍មួយជាមួយបណ្តាមេដឹកនាំធុរកិច្ចនៅទីក្រុងដូហា ប្រទេសកាតា ដែលជាកន្លែងលោកបានប្រកាសពីកិច្ចព្រមព្រៀងជាបន្តបន្ទាប់រវាងសហរដ្ឋអាមេរិក និងកាតា រួមទាំងកិច្ចព្រមព្រៀងបញ្ជាទិញយន្តហោះ Boeing ផងដែរ។ ការអត្ថាធិប្បាយរបស់ប្រធានាធិបតីអាមេរិកបានធ្វើឡើងនៅពេលលោកនិយាយអំពីផែនការរបស់ក្រុមហ៊ុន Apple ដើម្បីផលិតទូរស័ព្ទ iPhone នៅក្នុងប្រទេសឥណ្ឌា ខណៈដែលលោកផ្ទាល់មិនចង់ឱ្យ Apple សង់រោងចក្រក្នុងប្រទេសឥណ្ឌានោះទេ ព្រោះឥណ្ឌាគឺជាប្រទេសមួយក្នុងចំណោមប្រទេសមានពន្ធខ្ពស់បំផុតនៅលើពិភពលោក។
គួររំលឹកថា លោក ត្រាំ បានប្រកាសកាលពីខែមេសា ដើម្បីដាក់ពន្ធរហូតដល់ ២៧% លើទំនិញរបស់ឥណ្ឌា។ បច្ចុប្បន្នឥណ្ឌាកំពុងប្រញាប់ប្រញាល់ចរចាកិច្ចព្រមព្រៀងពាណិជ្ជកម្មជាមួយអាមេរិក អំឡុងពេលការផ្អាករយៈពេល៩០ថ្ងៃរបស់លោក ត្រាំ លើការយកពន្ធខ្ពស់ ដែលនឹងអសុពលភាពនៅថ្ងៃទី៩ ខែកក្កដា ខាងមុខនេះ។
រហូតមកទល់ពេលនេះ ទើបតែសប្តាហ៍នេះប៉ុណ្ណោះ សហរដ្ឋអាមេរិក និងចិនបានព្រមព្រៀងគ្នាកាត់បន្ថយពន្ធនាំចូលលើទំនិញដែលកំពុងធ្វើពាណិជ្ជកម្មរវាងប្រទេសទាំងពីរ ដោយពន្ធអាមេរិកលើការនាំចូលទំនិញចិននឹងទម្លាក់មកនៅត្រឹម ៣០% ពី ១៤៥% ដែលបានប្រកាសពីមុន ខណៈពន្ធរបស់ចិនលើការនាំចូលទំនិញអាមេរិកមួយចំនួននឹងទម្លាក់មកត្រឹម ១០% ពី ១២៥% ដែលខ្លួនបានដាក់ជាការសងសឹក។
សហរដ្ឋអាមេរិក គឺជាដៃគូពាណិជ្ជកម្មដ៏ធំបំផុតរបស់ឥណ្ឌានាពេលថ្មីៗនេះ ជាមួយនឹងទំហំពាណិជ្ជកម្មទ្វេភាគីមានចំនួន ១៩០ពាន់ដុល្លារ។ ឥណ្ឌាបានទម្លាក់ពន្ធលើស្រាវីស្គី Bourbon ទោចក្រយានយន្ត និងផលិតផលអាមេរិកមួយចំនួនផ្សេងទៀតរួចហើយ ប៉ុន្តែអាមេរិកមានឱនភាពពាណិជ្ជកម្មរហូតដល់ ៤៥ពាន់លានដុល្លារជាមួយនឹងឥណ្ឌា ដែលលោក ត្រាំ ចង់កាត់បន្ថយ។ លោក ត្រាំ និងនាយករដ្ឋមន្ត្រីឥណ្ឌា លោក ណារិនដ្រា ម៉ូឌី (Narendra Modi) ធ្លាប់បានកំណត់គោលដៅបង្កើនការធ្វើពាណិជ្ជកម្មលើសពីទ្វេដងរហូតដល់ ៥០០ពាន់លានដុល្លារ៕ ប្រភព ៖ BBC
ចែករំលែកព័តមាននេះ