ទីក្រុងកៀវ៖ អ៊ុយក្រែននឹងសម្រេចចិត្តថាត្រូវអនុវត្តបែបណាជាបន្តទៀតនៅក្នុងគម្រោងចរចាសន្តិភាពនៅទីក្រុងអ៊ីស្តាន់ប៊ូលនាថ្ងៃទី១៥ ខែឧសភា។ ប៉ុន្តែជាជំហានដំបូង អ៊ុយក្រែនចង់បានការបញ្ជាក់ឱ្យបានច្បាស់ត្រង់ចំណុចថាតើលោកពូទីននឹងធ្វើដំណើរទៅចូលរួមការចរចានោះដែរឬទេ។ ហ្សេឡិនស្គីធ្លាប់បាននិយាយថាគាត់ប្រាកដជាធ្វើដំណើរទៅអ៊ីស្តាន់ប៊ូល។
ជាដំបូងគាត់នឹងធ្វើដំណើរទៅជួបពិភាក្សាជាមួយប្រធានាធិបតីតួកគីនៅរដ្ឋធានីអង់ការ៉ា (Ankara)។ បន្ទាប់មក គាត់នឹងបន្តដំណើរទៅអ៊ីស្តាន់ប៊ូល។ ប៉ុន្តែលោកនឹងទៅអ៊ីស្តាន់ប៊ូលលុះត្រាលោកពូទីនទៅទីនោះដែរ។ បើមិនដូច្នេះទេ គាត់នឹងទៅត្រឹមទីក្រុងអង់ការ៉ាតែប៉ុណ្ណោះ។ រួចហើយ នឹងវិលទៅអ៊ុយក្រែនវិញ ទុកឱ្យក្រុមការងារប្រទេសទាំង២ជួបគ្នាតាមសម្រួលចុះ។
លោកហ្សេឡិនស្គីបានអំពាវនាវឱ្យលោកពូទីនធ្វើដំណើរទៅអ៊ីស្តាន់ប៊ូលដើម្បីជួបគ្នាកម្រិតកំពូល។ លោកយល់ថាឥឡូវនេះ អំណាច និងការសម្រេចចិត្តស្ថិតនៅក្នុងដៃរបស់លោកពូទីនតែម្នាក់ប៉ុណ្ណោះ។ ហេតុនេះ លុះត្រាតែជួបលោកពូទីនដោយផ្ទាល់ទើបអាចនិយាយសាច់ការបាន។ លោកហ្សេឡិនស្គីចង់ពិភាក្សាជាមួយលោកពូទីនអំពីការបង្កើតបទឈប់បាញ់។
បើលោកពូទីនធ្វើដំណើរទៅជួបលោកហ្សេឡិនស្គីនៅថ្ងៃទី១៥ ខែឧសភាពេលនោះនឹងក្លាយជារឿងដ៏គួរឱ្យចាប់អារម្មណ៍។ តាមពិតករណីប្រទេសសត្រូវនឹងគ្នាក្លាយជាមិត្តនឹងគ្នា និងរាប់អានគ្នាដូចធម្មតាឡើងវិញវាមិនមែនជារឿងប្លែកទេ។ កាលពីជំនាន់លោកនិចសុនក៏ដូចគ្នា។ ពីដំបូងដៃ គ្មាននរណានឹកស្មានថាលោកនិចសុនចាប់ដៃស្វាគមន៍គ្នាជាមួយលោកម៉ៅសេទុងទេ។ រហូតដល់គាត់បំពេញទស្សនកិច្ចនៅប៉េកាំងឆ្នាំ១៩៧២ដើម្បីនិយាយពីការដកកងទ័ពអាមេរិកពីវៀតណាមទើបគ្រប់គ្នាភ្ញាក់ផ្អើល។
លោកពូទីន និងលោកហ្សេឡិនស្គីខានជួបគ្នាជាង៥ឆ្នាំហើយចាប់តាំងពីខែធ្នូ ឆ្នាំ២០១៩។ ប្រភពពីមន្ត្រីការទូតអ៊ុយក្រែនដែលមិនហ៊ានបញ្ចេញឈ្មោះបានប្រាប់ឱ្យដឹងថាអ្វីៗស្ថិតនៅលើការសម្រេចថាតើលោកពូទីនចិត្តសឿងហ៊ានទៅអ៊ីស្តាន់ប៊ូលដែរឬទេ? នៅពេលទទួលបានចម្លើយនេះ អ៊ុយក្រែននឹងសម្រេចគ្នាជាបន្តទៀតថាតើត្រូវអនុវត្តវិធានការបែបណា។
វិមានក្រឹមឡាំងនិយាយកាលពីថ្ងៃពុធថាគណៈប្រតិភូរុស្ស៊ីប្រាកដជាទៅអ៊ីស្តាន់ប៊ូលនៅថ្ងៃទី១៥ ខែឧសភា។ ប៉ុន្តែក្រឹមឡាំងមិនបានបញ្ជាក់ថានៅក្នុងចំណោមគណៈប្រតិភូនោះមាននរណាខ្លះចូលរួម។ ជាពិសេស តើមានលោកពូទីនដែរឬទេ។ អ្នកសារព័ត៌មានក៏បានសាកសួរត្រង់ចំណុចនេះដែរ។ ប៉ុន្តែក្រឹមឡាំងសូមមិនធ្វើអត្ថាធិប្បាយពាក់ព័ន្ធនឹងលោកពូទីនទេ។ ជួនកាលគេរង់ចាំរហូតដល់នាទីចុងក្រោយទើបប្រកាសឱ្យដឹង។ ជាលក្ខណៈទុកឱ្យឆ្ងល់ ឬទុកអ៊ុតសភាពការណ៍ចុងក្រោយ។
លោកត្រាំដែលកំពុងបំពេញទស្សនកិច្ចនៅមជ្ឈិមបូព៌ាថ្លែងថាបើលោកពូទីនទៅអ៊ីស្តាន់ប៊ូល លោកក៏ចង់ជួបលោកពូទីននៅទីនោះដែរ។ លោកស្ថិតនៅមិនឆ្ងាយប៉ុន្មានពីប្រទេសតួកគីទេ។ ដូច្នេះអាចឆ្លៀតទៅបាន។ ប៉ុន្តែលោកមិនទាន់ដឹងច្បាស់ថាតើលោកពូទីននឹងទៅដែរឬទេ។ ហ្សេឡិនស្គីថ្លែងថាការដែលលោកចង់ជួបលោកពូទីនលើកនេះបំណងធំគឺចង់ស្នើឱ្យមានបទឈប់បាញ់ដោយឥតលក្ខខណ្ឌរយៈពេល៣០ថ្ងៃ៕
ចែករំលែកព័តមាននេះ