ទីក្រុងម៉ូស្គូ៖ ថ្ងៃនេះ ប្រទេសរុស្ស៊ីបញ្ចេញប្រតិកម្មតបទៅនឹងការលើកឡើងរបស់ប្រធានាធិបតីបារាំងពាក់ព័ន្ធនឹងការបញ្ជូនយន្តហោះនុយក្លេអ៊ែរ។ អ្នកនាំពាក្យវិមានក្រឹមឡាំងរិះគន់ពាក្យសម្ដីរបស់លោកម៉ាក្រុងត្រង់ចំណុចដែលថារដ្ឋាភិបាលបារាំងត្រៀមខ្លួនរួចហើយដើម្បីដាក់ពង្រាយយន្តហោះចម្បាំងបំពាក់គ្រាប់បែកនុយក្លេអ៊ែរនៅតាមបណ្ដាប្រទេសនៅទ្វីបអឺរ៉ុប។
ហេតុនេះ វិមានក្រឹមឡាំងសូមផ្ដាំត្រឡប់ទៅវិញថាទោះបីមានយន្តហោះធុននេះក៏ដោយក៏មិនប្រាកដជាអាចធានាសន្តិសុខជាតិរបស់ទ្វីបនេះបានឡើយ។ សូមរំលឹកថាកាលពីថ្ងៃអង្គារ លោកម៉ាក្រុងបានផ្ដល់បទសម្ភាសឱ្យទូរទស្សន៍បារាំងតេអែហ្វអង (TF1) ថាអាមេរិកបានដាក់ពង្រាយយន្តហោះចម្បាំងរបស់ខ្លួននៅបែលហ្សិច, អាល្លឺម៉ង់, អ៊ីតាលី និងតួកគី។
ដូច្នេះ បារាំងក៏ត្រៀមពិភាក្សាអំពីផែនការបញ្ជូនយន្តហោះប្រភេទនេះផងដែរ។ លោកថ្លែងបន្តទៀតថាលោកនឹងកំណត់ក្របខណ្ឌនៃការពិភាក្សាគ្នាដោយជាក់លាក់បំផុតនារយៈពេលប៉ុន្មានអាទិត្យ ឬប៉ុន្មានខែខាងមុខនេះ។ បន្ទាប់ពីលោកម៉ាក្រុងថ្លែងយ៉ាងដូច្នេះ អ្នកសារព័ត៌មានបានសាកសួរអ្នកនាំពាក្យវិមានក្រឹមឡាំង លោកប៉េស្កូស ដើម្បីធ្វើអត្ថាធិប្បាយ។
លោកប៉េស្កូសថ្លែងថាទោះបីដាក់ពង្រាយអាវុធនុយក្លេអ៊ែរពេញទ្វីបអឺរ៉ុបទៀតក៏មិនអាចជួយនៅក្នុងវិស័យសន្តិសុខជាតិ, ការប៉ាន់ស្មានត្រូវពីសភាពការណ៍ពិត និងស្ថិរភាពបានឡើយ។ សព្វថ្ងៃនេះ ប្រព័ន្ធធានាស្ថិរភាព និងសន្តិសុខជាយុទ្ធសាស្ត្រស្ថិតនៅក្នុងស្ថានភាពដ៏អាក្រក់រកលេខដាក់គ្មានដោយសារហេតុផលជាច្រើន។
លោកម៉ាក្រុងធ្លាប់បានបំផុសគំនិតដូចខាងលើនេះជាលើកដំបូងកាលពីខែមីនា ឆ្នាំ២០២៥។ លោកចង់ប្រើប្រាស់ឃ្លាំងអាវុធនុយក្លេអ៊ែររបស់បារាំងដើម្បីការពារសន្តិសុខរបស់ប្រទេសអឺរ៉ុបដទៃទៀត។ កាលណោះ វិមានក្រឹមឡាំងថ្លែងថាពាក្យសម្ដីរបស់លោកម៉ាក្រុងមានន័យស្មើនឹងការតាំងខ្លួនឯងជាបងធំខាងនុយក្លេអ៊ែរនៅទ្វីបអឺរ៉ុប។ ក្រឹមឡាំងយល់ថានេះជាពាក្យសម្ដីដែលចង់បង្កបញ្ហា៕
ចែករំលែកព័តមាននេះ