ទីក្រុងបាងកក ៖ បណ្តាទីភ្នាក់ងាររដ្ឋាភិបាលថៃ កំពុងតែបង្កើនកិច្ចខិតខំប្រឹងប្រែងដើម្បីលើកកម្ពស់វិស័យទេសចរណ៍ បន្ទាប់ពីឃើញការធ្លាក់ចុះចំនួនភ្ញៀវបរទេស អំឡុងពេល៤ខែដំបូងនៃឆ្នាំនេះ ជាពិសេសភ្ញៀវចិន។ យោងតាមប្រភពពីសារព័ត៌មានថៃ The Nation…
ទីក្រុងបាងកក ៖ បណ្តាទីភ្នាក់ងាររដ្ឋាភិបាលថៃ កំពុងតែបង្កើនកិច្ចខិតខំប្រឹងប្រែងដើម្បីលើកកម្ពស់វិស័យទេសចរណ៍ បន្ទាប់ពីឃើញការធ្លាក់ចុះចំនួនភ្ញៀវបរទេស អំឡុងពេល៤ខែដំបូងនៃឆ្នាំនេះ ជាពិសេសភ្ញៀវចិន។
យោងតាមប្រភពពីសារព័ត៌មានថៃ The Nation កាលពីថ្ងៃទី១៣ ខែឧសភា ឆ្នាំ២០២៥ បានរាយការណ៍ថា វិស័យទេសចរណ៍ ដែលជាកត្តាជំរុញសេដ្ឋកិច្ចដ៏សំខាន់របស់ប្រទេសថៃ បានប្រឈមមុខនឹងបញ្ហាជាបន្តបន្ទាប់នៅឆ្នាំនេះ ដែលបានប៉ះពាល់ដល់ទំនុកចិត្តរបស់ភ្ញៀវទេសចរ ជាពិសេសទាក់ទងនឹងសុវត្ថិភាព។
បញ្ហាកើតឡើងកន្លងមកដូចជា ការឆបោកនៅតាមព្រំដែនថៃ-មីយ៉ាន់ម៉ា ការរញ្ជួយដី ការសម្លាប់ស្ត្រីស្រឡាញ់ភេទម្នាក់នៅឯទីក្រុងប៉ាតាយ៉ា និងការព្រួយបារម្ភជុំវិញអាជីវកម្មទីផ្សារងងឹតរបស់ចិនបានរួមចំណែកធ្វើឱ្យបរិយាកាសនៃការធ្វើដំណើរមានការប្រុងប្រយ័ត្នខ្លាំងជាងមុន។ ជាលទ្ធផល ប្រទេសថៃបានកត់ត្រាការមកដល់របស់ភ្ញៀវបរទេសចំនួន ១២,០៩លាននាក់ចាប់ពីខែមករាដល់ខែមេសា ឆ្នាំ២០២៥ ជាការធ្លាក់ចុះ ០,២៦% បើទោះបីជាប្រាក់ចំណូលពីទេសចរណ៍កើនឡើង ៥,២៤% គិតជាទឹកប្រាក់ចំនួន ៥៧៧ពាន់លានបាត ឬស្មើនឹង ១៧,៣ពាន់លានដុល្លារយ៉ាងណាក៏ដោយ។
ទីផ្សារទេសចរណ៍មួយចំនួនបានជួយទ្រទ្រង់ដល់កំណើនប្រាក់ចំណូល ពិសេសទីផ្សារពីអឺរ៉ុប មជ្ឈិមបូព៌ា និងសហរដ្ឋអាមេរិក ខណៈដែលការធ្លាក់ចុះខ្លាំងត្រូវបានឃើញនៅក្នុងចំណោមភ្ញៀវទេសចរចិន។ ចំនួនភ្ញៀវទេសចរចិនបានធ្លាក់ចុះមកនៅត្រឹម ១,៦៤លាននាក់ ឬធ្លាក់ចុះ ២៥% បើធៀបនឹងរយៈពេលដូចគ្នាកាលពីឆ្នាំមុន។ ភ្ញៀវទេសចរចិនធ្លាប់ជាទីផ្សារអន្តរជាតិដ៏ធំបំផុតសម្រាប់វិស័យទេសចរណ៍ថៃជាមួយចំនួន ១១,១៣លាននាក់ក្នុងឆ្នាំ២០១៩ មុនពេលផ្ទុះជំងឺរាតត្បាតកូវីដ១៩ ហើយតួលេខនោះតំណាងឱ្យ ២៨% នៃចំនួនភ្ញៀវអន្តរជាតិសរុបចំនួន ៣៩,៨លាននាក់។
នៅឆ្នាំ២០២៤ ការមកដល់របស់ភ្ញៀវចិនមានចំនួន ៦,៧៣លាននាក់ ពោលត្រឹមតែ ៦០% នៃកម្រិតមុនឆ្នាំ២០១៩ ឬស្មើនឹង ១៩% នៃភ្ញៀវទេសចរអន្តរជាតិសរុបរបស់ប្រទេសថៃចំនួន ៣៥,៥៤លាននាក់ក្នុងឆ្នាំ២០២៤។
លោក Sorawong Thienthong រដ្ឋមន្ត្រីក្រសួងទេសចរណ៍ និងកីឡាថៃ បានព្រមានថា វិស័យទេសចរណ៍ថៃជិតជួបវិបត្តិហើយ ដោយសារទីផ្សារអន្តរជាតិមួយចំនួនបានធ្លាក់ចុះចំនួនភ្ញៀវទេសចរ ចាប់តាំងពីដើមឆ្នាំ២០២៥មក។ ទោះជាយ៉ាងណាក៏ដោយ ប្រាក់ចំណូលសរុបពីវិស័យទេសចរណ៍បានកើនឡើង បើប្រៀបធៀបនឹងរយៈពេលដូចគ្នា កាលពីឆ្នាំមុន ដោយសារតែការកើនឡើងចំនួនភ្ញៀវទេសចរ ដែលមានការចំណាយខ្ពស់។ លោកបានបន្តថា៖ «ទោះបីជាស្ថានភាពបច្ចុប្បន្នជាមួយការមកដល់របស់ភ្ញៀវទេសចរអន្តរជាតិកំពុងមានការធ្លាក់ចុះ ដោយទាំងក្រសួងទេសចរណ៍ និងកីឡា និងវិស័យឯកជនបានសម្តែងការបារម្ភក៏ពិតមែន ប៉ុន្តែវានៅតែស្ថិតក្នុងដំណាក់កាលដំបូង ហើយអាចដោះស្រាយបាន»។
លោកបានកត់សម្គាល់ថា ការប្រកួតប្រជែងវិស័យទេសចរណ៍ពិភពលោកកាន់តែខ្លាំង ដោយប្រទេសជាច្រើនបានបង្កើនការខិតខំប្រឹងប្រែងដើម្បីទាក់ទាញអ្នកទេសចរ។ ជាពិសេស ប្រទេសចិនបានក្លាយទៅជាគូប្រជែងដ៏ខ្លាំងមួយ ដោយទាញចំណែកដ៏សំខាន់នៃភ្ញៀវទេសចរអន្តរជាតិឱ្យឆ្ងាយពីគោលដៅផ្សេងទៀត។ ទន្ទឹមនឹងនេះ ប្រទេសថៃនៅតែបន្តប្រឈមមុខនឹងការផ្សព្វផ្សាយអវិជ្ជមានជាច្រើន ដោយលោកព្រមានថា ប្រសិនបើការយល់ឃើញអវិជ្ជមានទាំងនេះមិនត្រូវបានដោះស្រាយនោះទេ វាអាចបំផ្លាញមុខមាត់ទាំងមូលរបស់ប្រទេសជាតិយ៉ាងធ្ងន់ធ្ងរ មិនមែនត្រឹមតែវិស័យទេសចរណ៍នោះទេ ប៉ុន្តែនៅគ្រប់វិស័យតែម្តង។
ដោយឡែក លោកស្រី Thapanee Kiatphaibool អភិបាលនៃអាជ្ញាធរទេសចរណ៍ថៃ (TAT) បានលើកឡើងថា អាជ្ញាធរទេសចរណ៍ថៃ កំពុងរៀបចំដាក់ស្នើផែនការជំរុញទេសចរណ៍ដែលបានកែសម្រួលទៅកាន់ក្រសួងទេសចរណ៍ និងកីឡា ហើយបន្ទាប់មកនឹងស្នើទៅគណៈរដ្ឋមន្ត្រីនៅពាក់កណ្តាលឆ្នាំនេះ។ ផែនការនេះស្វែងរកការប្រើប្រាស់ថវិកាបម្រុងគ្រាអាសន្នប្រមាណ១០៥លានដុល្លារ ដើម្បីបង្កើនប្រសិទ្ធភាពទេសចរណ៍ទាំងក្នុងស្រុក និងអន្តរជាតិ។
លោកស្រី Voralak Tulaphorn ប្រធានផ្នែកទីផ្សារនៃក្រុមហ៊ុន The Mall Group បានកត់សម្គាល់ថា ការធ្លាក់ចុះនៃការមកដល់របស់ភ្ញៀវចិនបានបង្ខំឱ្យប្រតិបត្តិករហាងទំនិញត្រូវកែសម្រួលយុទ្ធសាស្ត្រទីផ្សារពួកគេ និងចូលទៅក្នុងទីផ្សារថ្មី។ លោកស្រីបានជំរុញឱ្យរដ្ឋាភិបាលពិចារណាលើការបង្កើនការលើកទឹកចិត្ត និងអត្ថប្រយោជន៍សម្រាប់ភ្ញៀវទេសចរអន្តរជាតិតាមរយៈវិធានការពន្ធ ដើម្បីលើកទឹកចិត្តដល់ការចំណាយ និងជំរុញការទាក់ទាញរបស់ប្រទេសថៃជាគោលដៅទេសចរណ៍។
ចំណែកលោកស្រី Wallapa Traisorat នាយកប្រតិបត្តិ និងជាប្រធានសាជីវកម្ម Asset World (AWC) បានលើកឡើងពីបញ្ហាប្រឈមជាច្រើនជះឥទ្ធិពលដល់សេដ្ឋកិច្ច និងទេសចរណ៍ថៃ ចាប់ពីការប្រែប្រួលសេដ្ឋកិច្ចសកល សង្គ្រាមពាណិជ្ជកម្ម រហូតដល់ភាពតានតឹងភូមិសាស្ត្រនយោបាយ។ លោកស្រីសង្កត់ធ្ងន់លើតម្រូវការសម្រាប់គ្រប់វិស័យដើម្បីធ្វើការរួមគ្នាក្នុងការទាក់ទាញភ្ញៀវទេសចរប្រកបដោយគុណភាព និងជំរុញការចំណាយ ជាពិសេសដូចជា កិច្ចប្រជុំ និងព្រឹត្តិការណ៍នានា។
លោក Paitoon Wongsasutthikul ប្រធានផ្នែកវិនិយោគនៅសាជីវកម្ម Asset World ក៏បានបន្ថែមថា វិស័យអចលនទ្រព្យ និងទេសចរណ៍បង្កើតឥទ្ធិពលច្រើនទូទាំងសេដ្ឋកិច្ច ដោយបង្កើតអត្ថប្រយោជន៍ និងឱកាសការងារយ៉ាងទូលំទូលាយ។ ដូច្នេះវាចាំបាច់ណាស់ដែលគ្រប់វិស័យរួបរួមគ្នា ដើម្បីជម្នះលើកត្តាអវិជ្ជមានដែលកំពុងប៉ះពាល់ដល់សេដ្ឋកិច្ច និងទេសចរណ៍ថៃ៕
ចែករំលែកព័តមាននេះ