មេរោគកូវីដ១៩ដែល យើងលែងខ្លាចលែងបារម្ភជាទូទៅប្រមាណជា២ទៅ៣ឆ្នាំមកហើយនោះ គឺបានវិវត្តន៍ថ្មីមួយបែបទៀត ដែលក្រសួងសុខាភិបាលបានប្រកាសកាលពីល្ងាចថ្ងៃទី១២ ខែឧសភា ឆ្នាំ ២០២៥ ខណៈដែលអង្គការសុខភាពពិភពលោក បានអះអាងថា ២៨ថ្ងៃចុងក្រោយមេរោគកូវីដ១៩…
មេរោគកូវីដ១៩ដែល យើងលែងខ្លាចលែងបារម្ភជាទូទៅប្រមាណជា២ទៅ៣ឆ្នាំមកហើយនោះ គឺបានវិវត្តន៍ថ្មីមួយបែបទៀត ដែលក្រសួងសុខាភិបាលបានប្រកាសកាលពីល្ងាចថ្ងៃទី១២ ខែឧសភា ឆ្នាំ ២០២៥ ខណៈដែលអង្គការសុខភាពពិភពលោក បានអះអាងថា ២៨ថ្ងៃចុងក្រោយមេរោគកូវីដ១៩ វាបានសម្លាប់មនុស្សប្រមាណជា១.៦០២ នាក់ នៅលើពិភពលោក ។
មេរោគកូវីដ១៩ចុងក្រោយនេះ គឺជាពពួកមេរោគ អូមីក្រុងដែលបានបំប្លែងខ្លួនជាថ្មី គេហៅវាថា ប្រភេទជេអ៊ិន១ (JN.1) ដែលវារកឃើញដំបូងនៅក្នុងខែសីហា ឆ្នាំ២០២៣ ហើយនៅពេលនេះ វាបាន រីករាលដាលយ៉ាងឆាប់រហ័សក្នុងតំបន់ជាច្រើននៅទូទាំងពិភពលោក ។
ក្រសួងសុខាភិបាលបានអះអាងថា បច្ចុប្បន្ននេះ អង្គការសុខភាពពិភពលោកបានចាត់ថ្នាក់វាថា គឺជាប្រភេទមេរោគក្នុង វ៉ារីរ្យង់ដ៏មានចំណាប់អារម្មណ៍ ដោយសារតែវារីករាលដាលយ៉ាងឆាប់រហ័ស ដោយសារតែ លក្ខណៈជីវសាស្ត្រវិវត្តន៍ថ្មីរបស់វា ។
ប្រភពដដែលបានអះអាងថា ត្រឹមពាក់កណ្តាលខែមីនា ឆ្នាំ២០២៥ ជេអ៊ិន ១ ត្រូវបានរកឃើញមានជាង១៥ភាគរយនៃករណីកូវីដ ១៩ ដែលបានរកឃើញនៅទូទាំងពិភពលោក ។ អង្គការសុខភាពពិភពលោកបានអះអាងថា មកដល់ពេលនេះកូវីដ ១៩ បានកើតមានឡើងសរុបប្រមាណជាជាង ៧៧៧លានករណី ហើយវាបានសម្លាប់ជីវិតមនុស្សសរុបជាង៧លាននាក់ នេះដោយរួមបញ្ចូលទាំងករណីស្លាប់ថ្មីនៅ២៨ថ្ងៃចុងក្រោយប្រមាណជា១.៦០២នាក់ផងដែរ ។
ស្ថានភាពនៃគ្រោះថ្នាក់ដោយសារតែមេរោគកូវីដ ១៩ គឺនៅតែមាន ដូច្នេះ កុំជិះសេះលែងដៃ ហើយស្មារតីនៃការការពារ និងបង្ការគួរតែលើកកម្ពស់ បើទោះបីជានៅពេលនេះ វាមិនត្រូវបានចាត់ថ្នាក់ថា ជាជំងឺគ្រោះថ្នាក់ខ្លាំងដូចកាលពីអំឡុងឆ្នាំ២០១៩ ដល់ ឆ្នាំ២០២២ កន្លងមកក៏ដោយចុះ ។ ក្រសួងសុខាភិបាលបានឲ្យដឹងថា រោគសញ្ញានៃមេរោគកូវីដ ១៩ ដែលកំពុងតែគំរាមកំហែងនៅពេលនេះ ពោលគឺប្រភេទ ជេអ៊ិន ១ នេះ គឺមានរោគសញ្ញា មិនខុសពីកូវីដ ១៩ ជំនាន់មុនៗនោះទេ ។
រោគសញ្ញាគឺមាន ដូចជា គ្រុនក្តៅ ក្អកស្ងួត ឈឺបំពង់ក ហៀរសំបោរ ចង្អោរ ស្រដៀងគ្នានឹងផ្តាសសាយ ហើយវាគឺជាប្រភេទមេរោគដែលឆ្លងលឿន និងអាចបញ្ជ្រាបចូលប្រព័ន្ធភាពស៊ាំ របស់មនុស្សកាន់តែ ខ្លាំងដោយសារតែការផ្លាស់ប្តូប្រូតេអ៊ីនបង្គោលរបស់វា ។
ក្រសួងបានអះអាងថា ជេអ៊ិន ១ មានហានិភ័យសុខភាពជាសកលកម្រិតទាបទេ ប៉ុន្តែការ បន្តការប្រុងប្រយ័ត្នគឺចាំបាច់ ជាពិសេស ចំពោះបុគ្គលដែលមានហានិភ័យនៃការចម្លងជំងឺរួមមានអ្នកមាន ប្រព័ន្ធ ការពាររាងកាយខ្សោយ ជំងឺរ៉ាំរ៉ៃប្រចាំកាយ ទឹកនោមផ្អែម លើសឈាម ជនចាស់ជរា ស្ត្រីមានផ្ទៃពោះ ជាដើម ។
ប្រភពដដែលបានបន្តថា នៅកម្ពុជាប៉ុន្មានថ្ងៃនេះ មានការចម្លងជំងឺកូវីដ ១៩ នេះ ដែលតម្រូវឲ្យបន្តការយកចិត្តទុកដាក់ ការពារខ្លួនឲ្យបានហ្មត់ចត់ ជាពិសេសគឺរដូវវស្សាផង ។ ប្រភពដដែលបានបន្តទៀតថា វិធានការការពារជំងឺនេះមិនជាប្លែកពីមុននោះទេ។ ប្រជាជនត្រូវអនុវត្តការធ្វើអនាម័យ ដោយលាងដៃនឹងសាប៊ូ ឬអាកុល ត្រូវពាក់ម៉ាស់ក្នុងករណីចាំបាច់ កុំខាកស្តោះពាសវាលពាស កាល ត្រូវខ្ទប់មាត់និងច្រមុះពេលក្អក ដោយប្រើម៉ាស កែងដៃ ក្រម៉ា កន្សែង ឫ ក្រដាសអនាម័យ រួចខ្ចប់បោះចោលក្នុងធុងសំរាមដែលគ្រប់បិទជិត ។
ប្រភពដដែលបានរំលឹកផងដែរថា សូមកុំចូលទៅទីប្រជុំជន ឬធ្វើដំណើរ ប្រសិនបើអ្នកមានអាការៈក្តៅខ្លួន ក្អក ឫពិបាកដកដង្ហើម ឫមានបញ្ហាសុខភាព ។ នៅក្នុងករណីមានការសង្ស័យសូម ស្វែងរកការប្រឹក្សាយោបល់ជាមួយនឹង ក្រុមគ្រូពេទ្យនៅមណ្ឌលសុខភាព ឫមន្ទីរពេទ្យរដ្ឋនានា ។
ក្រសួងសុខាភិបាលបានអះអាងថា កាលពីថ្ងៃទី១០ ខែឧសភា ឆ្នាំ២០២៥កន្លងទៅគឺមានករណីឆ្លងមេរោគកូវីដ១៩ថ្មី៣ករណី ដែលនាំឲ្យនៅកម្ពុជាមាន ករណីឆ្លងសរុប១៣៩.៣៤២នាក់នៅក្នុងនោះស្លាប់ សរុប គឺនៅតែ ៣.០៥៦នាក់ដដែលទេ ។
តាមសេចក្តីរាយការណ៍ដោយសារព័ត៌មានបរទេសបានឲ្យដឹងថា នៅថៃមានករណីឆ្លងថ្មីច្រើន ដោយនៅក្នុងរយៈពេលប្រមាណជា ពីថ្ងៃទី០១ ខែមករា ដល់ថ្ងៃទី ១០ ខែឧសភា ថៃរកឃើញករណីឆ្លងកូវីដ១៩ ថ្មីសរុប ៥៣.៦៧៦ នាក់ នៅក្នុងនោះស្លាប់មាន១៦នាក់ដែរ។ ប៉ុន្តែទោះបីជាយ៉ាងណាក៏ដោយ ថៃមិនបានប្រកាសអាសន្នឫដាក់វិធានការសុខភាពឡើយ ។
សរុបសេចក្តីទៅមេរោគកូវីដ១៩ថ្មី ជេអ៊ិន ១ ឆ្លងខ្លាំងមែន ប៉ុន្តែភាពគ្រោះថ្នាក់របស់វាក៏មិនទាន់មានកំណត់ សម្គាល់ល់អ្វីឲ្យព្រួយបារម្ភឡើយសម្រាប់អ្នកដែលមានសុខភាពល្អ។ ប៉ុន្តែទន្ទឹមនឹងនោះ សម្រាប់ អ្នកដែលមានសុខភាពខ្សោយដូចដែលរៀបរាប់ខាងលើសូមប្រុងប្រយ័ត្ន ហើយយកចិត្តទុកដាក់ការពារខ្លួន ពីព្រោះថា នៅកម្ពុជាមិនអី ប៉ុន្តែនៅលើពិភពលោក កំណត់ត្រានៃមនុស្សដែលស្លាប់ ដោយសារតែមេរោគកូវីដ ១៩ គឺនៅតែបន្តកត់ត្រា ដដែល ពោលគឺ២៨ថ្ងៃចុងក្រោយនេះវាបានសម្លាប់មនុស្សដល់ទៅ ១.៦០២ នាក់ ។
ចែករំលែកព័តមាននេះ