រាជធានីភ្នំពេញ ៖ ការិយាល័យនគរបាលចរាចរណ៍ផ្លូវគោកនៃស្នងការនគរបាលរាជធានីភ្នំពេញ នៅព្រឹកថ្ងៃទី១៤ ខែឧសភា ឆ្នាំ២០២៥ បានអញ្ជើញមន្ត្រីនគរបាលចរាចរណ៍ និងមន្ត្រីជាប់កិច្ចសន្យាចំនួន៤រូបនៅគោលដៅស្តុបផ្សារដេប៉ូមកសួរនាំ ក្រោយមានការបង្ហោះករណីឃាត់ម៉ូតូ១គ្រឿង ម៉ាក…
រាជធានីភ្នំពេញ ៖ ការិយាល័យនគរបាលចរាចរណ៍ផ្លូវគោកនៃស្នងការនគរបាលរាជធានីភ្នំពេញ នៅព្រឹកថ្ងៃទី១៤ ខែឧសភា ឆ្នាំ២០២៥ បានអញ្ជើញមន្ត្រីនគរបាលចរាចរណ៍ និងមន្ត្រីជាប់កិច្ចសន្យាចំនួន៤រូបនៅគោលដៅស្តុបផ្សារដេប៉ូមកសួរនាំ ក្រោយមានការបង្ហោះករណីឃាត់ម៉ូតូ១គ្រឿង ម៉ាក HONDA SCOOPY ពណ៌.ស មិនចាំផ្លាកលេខ ។
ការហៅសួរនាំនេះ បន្ទាប់ពីមានការផ្សព្វផ្សាយបង្ហោះវីដេអូ តាមបណ្តាញសង្គមយ៉ាងព្រោងព្រាត ជុំវិញករណីមន្ត្រីនគរបាលចរាចរណ៍ និងមន្ត្រីជាប់កិច្ចសន្យាមួយក្រុមនៅគោលដៅស្តុបផ្សារដេប៉ូបានចេញឃាត់ម៉ូតូ១គ្រឿង បើកបរដោយស្ត្រីម្នាក់បានល្មើសផ្លាកសញ្ញាចរាចរណ៍បត់ត្រឡប់ក្រោយ កាលពីថ្ងៃទី១៣ ខែឧសភា ឆ្នាំ២០២៥ ។
បើតាមការផ្សព្វផ្សាយរបស់ស្នងការភ្នំពេញតាមរយៈការបំភ្លឺមន្ត្រីទាំង៤នាក់ ពិតជាបានចេញឃាត់ម៉ូតូប្រាកដមែន ដោយអ្នកបើករបរម៉ូតូខាងលើ បានល្មើសផ្លាកសញ្ញាបត់ត្រឡប់ក្រោយ ។ ករណីនេះ មន្ត្រីចរាចរណ៍មិនផាកពិន័យស្ត្រីដែលបើកបរម៉ូតូនោះទេ ដោយមន្ត្រីបានធ្វើការអប់រំណែនាំឱ្យយល់ដឹងពីច្បាប់ចរាចរណ៍ផ្លូវគោក។
ចំពោះមន្ត្រីនគរបាលចរាចរណ៍ និងមន្ត្រីជាប់កិច្ចសន្យាទាំង៤នាក់ខាងលើ ការិយាល័យនគរបាលចរាចរណ៍ផ្លូវគោក និងធ្វើរបាយការណ៍រាយការណ៍ជូនឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញដើម្បីពិនិត្យ និងសម្រេច។
គួរបញ្ជាក់ថា តាមបទបញ្ជារបស់ឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ កន្លងមក គឺមិនអនុញ្ញាតឱ្យមន្ត្រីជាប់កិច្ចសន្យា និងមន្ត្រីនគរបាលចរាចរណ៍ពួនស្ទាក់ចាប់ឃាត់យានយន្តល្មើសច្បាប់ចរាចរណ៍នោះទេ ក្នុងករណីដែលមន្ត្រីអនុវត្តច្បាប់ចរាចរណ៍មិនអនុវត្តតាមបទបញ្ជានឹងរងទទួលការអនុវត្តវិន័យកងកម្លាំងនគរបាលជាតិ ៕
ចែករំលែកព័តមាននេះ