ADផ្ទាំងផ្សព្វផ្សាយពាណិជ្ជកម្ម

បង្ក្រាបក្រុមចោរគា.ស់វីឡាយកប្រាក់ និងគ្រឿងអលង្ការប្រមាណ៨ម៉ឺនដុល្លារ ឃាត់បាន២នាក់ឪពុកនិងកូន ដកហូតកាំភ្លើងខ្លី៣ដើម

5 ម៉ោង មុន

ភ្នំពេញ
១៤ ខែ ឧសភា ឆ្នាំ ២០២៥ ម៉ោង ១៣:២៩

រាជធានីភ្នំពេញ ៖ ជននសង្ស័យគាស់ផ្ទះវីឡា និងគាស់បំបែកទូដែកយកប្រាក់ និងគ្រឿងអលង្ការប្រមាណ៨ម៉ឺនដុល្លារនិងប្រើប្រាស់អាវុធខុសច្បាប់ ត្រូវបានកម្លាំងនគរបាលព្រហ្មទណ្ឌសែនសុខ សហការជាមួយការិយាលយ័នគរបាលព្រហ្មទណ្ឌកំរិតធ្ងន់នៃស្នងការដ្ឋានរាជធានីភ្នំពេញ និងអធិការដ្ឋាននគរបាលខណ្ឌទួលគោកស្រាវជ្រាវឃាត់ខ្លួនបានចំនួន០២នាក់ ឪពុកនិងកូន បន្ទាប់ពីធ្វើសកម្មភាពបានប្រមាណ១០ថ្ងៃ…

ជនសង្ស័យដែលត្រូវឃាត់ខ្លួន ១-ឈ្មោះ ធន សុផាត ភេទប្រុស អាយុ២៤ឆ្នាំ ជនជាតិខ្មែរ មុខរបរមិនពិប្រាកដ ស្នាក់នៅផ្ទះជួល សង្កាត់ផ្សារដេប៉ូ៣ ខណ្ឌទួលគោក រាជធានីភ្នំពេញ ២-ឈ្មោះ ធន ច័ន្ទធឿន ភេទប្រុស អាយុ៤៦ឆ្នាំ ជនជាតិខ្មែរ មុខរបរមិនពិតប្រាកដ ស្នាក់នៅផ្ទះជួល សង្កាត់ផ្សារដេប៉ូ៣ ខណ្ឌទួលគោក រាជធានីភ្នំពេញ។

តាមនគរបាលខណ្ឌសែនសុខបានឲ្យដឹងថា ដោយមានបទបញ្ជាពីឯកឧត្តម ជួន ណារិន្ទ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ នៅថ្ងែទី១២ ឧសភា ឆ្នាំ២០២៥ វេលាម៉ោង១៦ និង៣០នាទី អធិការដ្ឋាននគរបាលខណ្ឌសែនសុខ សហការជាមួយការិយាលយ័នគរបាលព្រហ្មទណ្ឌកំរិតធ្ងន់នៃស្នងការដ្ឋានរាជធានីភ្នំពេញ និងអធិការដ្ឋាននគរបាលខណ្ឌទួលគោក ស្រាវជ្រាវឃាត់ខ្លួនបានជនសង្ស័យចំនួន០២នាក់ ក្នុងករណីលួចមានស្ថានទម្ងន់ទោស (បើកទ្វារបន្ទប់ដេកចូលគាស់ទូដែកលួចយកប្រាក់ ចំនួន៤៥,០០០ដុល្លារ និងគ្រឿងអលង្ការមួយចំនួនសរុបតម្លៃ៨ម៉ឺនដុល្លារ នៅចំណុចបុរីអ័រគីដេវីឡាផ្ទះលេខQR១៣-២២ ផ្លូវម្លិះ ភូមិអ័រគីដេ សង្កាត់អូរបែកក្អម ខណ្ឌសែនសុខ រាជធានីភ្នំពេញ កាលពីថ្ងៃទី០២ ឧសភា ឆ្នាំ២០២៥ វេលាម៉ោងប្រហែល២៣ និង៥០នាទី អាធ្រាត្រនិងអំពើប្រើប្រាស់ និងរក្សាទុកអាវុធខុសច្បាប់ (ទុកអាវុធខ្លីចំនួន០៣ដើម) ។

ជនរងគ្រោះដែលត្រូវក្រុមចោលចូលគាស់យកប្រាក់ និងគ្រឿងអលង្ការឈ្មោះ ឈ្មោះ អ៊ឹង ជាងនី ភេទប្រុស អាយុ២៨ឆ្នាំ ជនជាតិខ្មែរ មុខរបរបុគ្គលិកកិច្ចសន្យា ស្នាក់នៅផ្ទះវី ឡាកន្លែងកើតហេតុខាងលើ ។ សម្ភារៈបាត់បង់ និងខូចខាត ៖ ប្រាក់ចំនួន៤៥,០០០ដុល្លា , គ្រឿងអលង្ការ មួយចំនួន តម្ល សរុប៨ម៉ឺនដុល្លានិងទូរដែក រងការខូចខាត។បន្ទាប់ពីធ្វើសកម្មភាពគាស់យកទូកដែកបានសម្រេចជនសង្ស័យក៏បានគេចខ្លួនបាត់។

ក្រោយមក ជនរងគ្រោះជនរងគ្រោះ បានមកដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលអូរបែកក្អម ឲ្យសមត្ថកិច្ចជួយស្រាវជ្រាវ ក្រោយពីទទួលបណ្ដឹង រួចសមត្ថកិច្ចបានចុះដល់ផ្ទះវីឡា(កើតហេតុ) សហការជាមួយជនរងគ្រោះ ត្រួតពិនិត្យផ្ទះវី ឡាឃើញទ្វារបន្ទប់ដេក ខាងក្រោយ ជាន់ទី១ បើកចំហរ និងទូរដែក នៅក្នុងបន្ទប់ដេក ត្រូវបានគាស់របើក រួមទាំងសម្ភារៈរាយប៉ាយពេញក្នុងបន្ទប់ ។

លុះនៅរសៀលថ្ងៃទី១២ ខែឧសភា ឆ្នាំ២០២៥ សមត្ថកិច្ចបន្តស្រាវជ្រាវ ឈានទៅឃាត់ខ្លួនជនសង្ស័យ២នាក់ដោយឈ្មោះ ធន ច័ន្ទធឿន ជាឪពុកឃាត់នៅផ្ទះជួល នៅតាមបណ្ដោយផ្លូវលេខ១៥០ សង្កាត់ផ្សារដេប៉ូ២ និងឈ្មោះ ធន សុផាត ឃាត់ខ្លួននៅផ្ទៈនៅទឹកល្អក់៣។នៅក្នុងប្រតិបត្តិការនោះសមត្ថកិច្ចបានឆែកខេផ្ទះជួលដកហូតបានវត្ថុតាងរួមមាន ១-ទូរស័ព្ទដៃ ចំនួន០៥គ្រឿង ស៊េរី ចាស់ ២-អាវុធខ្លី ចំនួន០៣ដើម ម៉ាករ៉ូឡូ ០២ដើម និងម៉ាកស៊ិចសាយអី ចំនួន០១ដើម ៣-កុំព្យូទ័រយួរដៃចំនួន០២គ្រឿង ៤-ខ្សែ.កស្វារេ មានត្បូង០១ខ្សែ ៥-កូនកាបូបដៃចំនួន០១ ដែលជារបស់ជនរងគ្រោះ ។

នៅចំពោះមុខសមត្ថកិច្ច ជនសង្ស័យឈ្មោះ ផន សុផាត និងឈ្មោះ ធន ច័ន្ទធឿន បានសារភាពនូវសកម្មភាព ពិតជាចូលទៅក្នុងផ្ទះវីឡារបស់ជនរងគ្រោះគាស់ទូរដែកលួចយកប្រាក់ និងគ្រឿងអលង្ការរបស់ជនរងគ្រោះប្រាកដមែន ។ ជនសង្ស័យទាំងពីរនាក់ ត្រូវបានសមត្ថកិច្ចនគរបាលឃាត់ខ្លួននៅអធិការដ្ឋានខណ្ឌសែនសុខដើម្បីសាកសួរ និងកសាងសំណុំរឿងចាត់ការតាមច្បាប់៕

អត្ថបទសរសេរ ដោយ

ម៉េង ធា

2K អត្តបទ

កែសម្រួលដោយ

ស្រីណា

61K អត្តបទ

ADផ្ទាំងផ្សព្វផ្សាយពាណិជ្ជកម្ម

អត្ថបទសរសេរ ដោយ

កែសម្រួលដោយ

អត្តបទផ្សេងៗទៀត