រាជធានីភ្នំពេញ ៖ ក្រុមយុវជនដែលបើកឆាកប្រយុទ្ធដេញកាប់គ្នាដូចរឿងចិនហុងកុង កាលពីរសៀលថ្ងៃទី១៣ ខែឧសភា នៅតាមបណ្ដោយផ្លូវរថភ្លើង ក្រោយវត្តនាគវ័ន ស្ថិតក្នុងសង្កាត់បឹងកក់ទី២ ត្រូវបានកម្លាំងនគរបាលខណ្ឌទួលគោក សហការស្រាវជ្រាវបង្ក្រាបបានជាបន្តបន្ទាប់ចំនួន៤នាក់ហើយ…
រាជធានីភ្នំពេញ ៖ ក្រុមយុវជនដែលបើកឆាកប្រយុទ្ធដេញកាប់គ្នាដូចរឿងចិនហុងកុង កាលពីរសៀលថ្ងៃទី១៣ ខែឧសភា នៅតាមបណ្ដោយផ្លូវរថភ្លើង ក្រោយវត្តនាគវ័ន ស្ថិតក្នុងសង្កាត់បឹងកក់ទី២ ត្រូវបានកម្លាំងនគរបាលខណ្ឌទួលគោក សហការស្រាវជ្រាវបង្ក្រាបបានជាបន្តបន្ទាប់ចំនួន៤នាក់ហើយ គឺទាំងពីរក្រុមតែម្តង ។ សូមរំលឹកដែរថា៖ បង្ក្រា.បក្មេ.ងទំនើ.ង២ក្រុម ឃាត់ខ្លួន១០នាក់ និងដកហូតដាវ កាំបិ.តជាច្រើន ក្រោយធ្វើសកម្មភាព២ករណី
តាមនគរបាលខណ្ឌទួលគោកបានឲ្យដឹងថា បន្ទាប់ពីមានអំពើហិង្សារវាងក្មេងទំនើងពីក្រុមដេញកាប់គ្នាទៅវិញទៅមក កម្លាំងនគរបាលជំនាញបានចុះធ្វើការស្រាវជ្រាវជាបន្ទាន់ ហើយឈានទៅឃាត់ខ្លួនបានជនសង្ស័យជាបន្តបន្ទាប់ចំនួន៤នាក់ គឺ២ក្រុមនៅថ្ងៃទី១៣ ខែឧសភា ឆ្នាំ២០២៥ វេលាម៉ោងប្រហែល ១៩ និង១៥នាទី បន្ទាប់ពីក្រុមជនសង្ស័យទាំងពីរក្រុមបង្កហិង្សាដោយចេតនា មានស្ថានទម្ងន់ទោស(ក្មេងទំនើង២ក្រុមប្រើដាវ,ពូថៅ,ដុំថ្ម និងដាវកែច្នៃ កាប់និងគប់គ្នាទៅវិញទៅមក បណ្ដាលឱ្យរបួសទាំងសងខាង) ។
តាមនគរបាលខណ្ឌទួលគោកបានឲ្យដឹងទៀតថា ក្រុមទី១-ស្រាវជ្រាវឃាត់ខ្លួនបានជនសង្ស័យ០៣នាក់ ទី១-ឈ្មោះ ជ័យ ម៉ារ៉ាឌី ភេទប្រុស អាយុ២៨ឆ្នាំ ជនជាតិខ្មែរ និង២-ឈ្មោះ ជ័យ ដារ៉ារ៉ាន់ ភេទប្រុស អាយុ២៣ឆ្នាំ ជនជាតិខ្មែរ ឃាត់ខ្លួននៅចំណុចបន្ទប់ពិគ្រោះជំងឺទូទៅមួយកន្លែង លើផ្លូវជាតិលេខ០៥ ក្រុមទី៧ ភូមិក សង្កាត់ច្រាំងចំរះ២ ខណ្ឌឬស្សីកែវ កាលពីវេលាម៉ោងប្រហែល១៩:០០នាទី នាថ្ងៃដដែល ទី៣-ឈ្មោះ ជ័យ ប៊ុនសាក់ ភេទប្រុស អាយុ២២ឆ្នាំ ជនជាតិខ្មែរ ឃាត់ខ្លួននៅចំណុចផ្ទះលេខA11 ផ្លូវបេតុង ក្រុមទី៨ ភូមិខ សង្កាត់ច្រាំងចំរះ២ ខណ្ឌឬស្សីកែវ រាជធានីភ្នំពេញ រួចបញ្ជូនមកកាន់អធិការដ្ឋាននគរបាលខណ្ឌទួលគោក ចាត់ការតាមនីតិវិធី ។
ដោយឡែក ក្រុមទី២ ត្រូវបានកម្លាំងនគរបាលជំនាញព្រហ្មទណ្ឌស្រាវជ្រាវឃាត់ខ្លួនម្នាក់ឈ្មោះ ចាន់ វាសនា ភេទប្រុស អាយុ៤២ឆ្នាំ ជនជាតិខ្មែ ឃាត់ខ្លួននៅចំណុចលើដងផ្លូវរថភ្លើង ក្រុមទី១០៤ ភូមិ២២ សង្កាត់បឹងកក់ទី២ ខណ្ឌទួលគោកកាល ពីវេលាម៉ោងប្រហែល២២និង៣០នាទីយប់ ថ្ងៃទី១៣ ខែឧសភាឆ្នាំ ២០២៥ នេះ។
តាមសមត្ថកិច្ចឲ្យដឹងថា ការឃាត់ខ្លួនជនសង្ស័យទាំង៤នាក់ពីរក្រុមនេះ បន្ទាប់ពីជនសង្ស័យទាំងនោះបានធ្វើសកម្មភាពប្រព្រឹត្តបទល្មើសហិង្សាដោយចេតនា នៅចំណុចលើដងផ្លូវរថភ្លើង ក្រុមទី១០៤ ភូមិ២២ សង្កាត់បឹងកក់ទី២ ខណ្ឌទួលគោក កាលពីថ្ងៃទី១៣ ខែឧសភា ឆ្នាំ២០២៥ វេលាម៉ោងប្រហែល១៦ និង២នាទីរសៀល។
តាមនគរបាលបានឲ្យដឹងទៀតថា ជនសង្ស័យដែលត្រូវឃាត់ខ្លួន ខ្លះបានរងរបួសផងដែរ ដូចជា
ជនសង្ស័យឈ្មោះ ជ័យ ម៉ារ៉ាឌី របួសជាំដើមទ្រូង, ជនសង្ស័យឈ្មោះ ជ័យ ដារ៉ារ៉ាន់ របួសភ្លៅស្ដាំដេរ០៨ថ្នេរ។ ចំណែកភាគីទី២ ជនរងគ្រោះឈ្មោះ អ៊ិន ចាន់ធី ហៅធី ភេទប្រុស អាយុ៤០ឆ្នាំ ជនជាតិខ្មែរ មុខរបរ សន្តិសុខស្នាក់នៅផ្ទះលេខ១៥១ ផ្លូវរថភ្លើង ក្រុមទី១០៥ ភូមិ២២ សង្កាត់បឹងកក់ទី២ ខណ្ឌទួលគោក រាជធានីភ្នំពេញ បានរងរបួសរបួសស្នាមក្បាល និងខ្នងដោយសារក្រុមជនសង្ស័យ០៣នាក់ ឈ្មោះ ជ័យ ម៉ារ៉ាឌី , ឈ្មោះជ័យ ដារ៉ារ៉ាន់ និងឈ្មោះ ជ័យ ប៊ុនសាក់ កាប់នៅពេលកើតហេតុ ។
តាមសមត្ថកិច្ចឲ្យដឹងថា នៅក្នុងហេតុការណ៍បង្កហិង្សានេះ សមត្ថកិច្ចដករហូតវត្ថុតាងចាប់យកមាន៖
ពូថៅដៃ ដងឈើ ចំនួន០១ (ចាប់យកពីឈ្មោះ ជ័យ ដារ៉ារ៉ាន់) និងម៉ូតូ០១គ្រឿងម៉ាក winnerx ស៊េរី2023 ពណ៌ក្រហម ភ្នំពេញ 1KV-0112 មួយគ្រឿង។
នៅកន្លែងកើតហេតុសមត្ថកិច្ចដករហូតចាប់យកវត្ថុតាងរួមមាន៖
១-ឈើជ្រុងចំនួន០១ មានប្រវែងប្រហែល៥តឹក ។
២-ញញួរសម្រាប់ដកដែកគោលចំនួន០១ (ចាប់យកនៅកន្លែងកើតហេតុ) ជារបស់បក្ខពួកជនសង្ស័យឈ្មោះ ចាន់ វាសនា ប្រើវាយនិងកាប់នៅពេលកើតហេតុរួចបោះចោលនៅកន្លែងកើតហេតុហើយរត់គេចខ្លួនបាត់ ។
គួរបញ្ជាក់ថា កាលពីវេលាម៉ោង៤រសៀលថ្ងៃទី១៣ ឧសភា ឆ្នាំ២០២៥ មានក្រុមយុវជន២ក្រុម ប្រដាប់ទៅដោយកាំបិត ពូថៅ ញញួរ បានដេញកាប់និងគប់គ្នាប្រសាចនៅតាមដងផ្លូវរថភ្លើងខាងក្រោយវត្តនាគវ័ន ក្នុងសង្កាត់បឹងកក់ទី២ ខណ្ឌទួលគោក រាជធានីភ្នំពេញ ដែលការប្រើអំពើហិង្សានេះ គឺដូចរឿងចិនហុងកុង ។
បន្ទាប់ពីមានអំពើហិង្សាសមត្ថកិច្ចនគរបាលខណ្ឌទួលគោក ក៏បានចុះទៅស្រាវជ្រាវ ហើយឈានទៅឃាត់ខ្លួនបានជនសង្ស័យជាបន្តបន្ទាប់ចំនួន៤នាក់ គឺក្រុមទី១ចំនួន៣និងក្រុមទី២ម្នាក់ ។ បច្ចុប្បន្ន ជនសង្ស័យខាងលើ កំពុងឃាត់ខ្លួនជាបណ្ដោះអាសន្ននៅអធិការដ្ឋាននគរបាលខណ្ឌទួលគោក ដើម្បីសាកសួរកសាងសុំណុំរឿងបញ្ជូនទៅកាន់អយ្យការអមសាលាដំបូងរាជធានីភ្នំពេញ ដើម្បីចាត់ការតាមច្បាប់ ៕
ចែករំលែកព័តមាននេះ