កីឡាចំបាប់កម្ពុជា ដណ្ដើមបានមេដាយ ចំនួន៨គ្រឿង នៅប្រទេសសិង្ហបុរី
រាជធានីភ្នំពេញ ៖ ការប្រកួតកីឡាចំបាប់ ជ្រើសរើសជើងឯក អាស៊ីអាគ្នេយ៍ (Southeast Asian & Invitational Championship)…
រាជធានីភ្នំពេញ ៖ ការប្រកួតកីឡាចំបាប់ ជ្រើសរើសជើងឯក អាស៊ីអាគ្នេយ៍ (Southeast Asian & Invitational Championship) នៅប្រទេសសិង្ហបុរី ដែលបានធ្វើឡើងពីថ្ងៃទី១០ បានបិទបញ្ចប់ជាស្ថាពរហើយ កាលពីល្ងាចថ្ងៃទី១២ ខែឧសភា ឆ្នាំ២០២៥ ។ ខណៈកីឡាចំបាប់កម្ពុជា ដណ្ដើមបានមេដាយ ចំនួន៨គ្រឿង មកជូនជាតិមាតុភូមិ ។
តាមការឱ្យដឹងពីមន្ត្រីប្រតិភូដឹកនាំទៅចូលរួមប្រកួត បានឱ្យដឹងថា គិតមកដល់ថ្ងៃទី១២ ខែឧសភា ដែលជាថ្ងៃបិទបញ្ចប់ នៃព្រឹត្តិការណ៍ប្រកួតកីឡាចំបាប់អន្តរជាតិ Southeast Asian & Invitational Championship2025 នៅប្រទេសសិង្ហបុរី កីឡាករ-កីឡាការិនីជម្រើសជាតិកីឡាចំបាប់កម្ពុជា ដណ្ដើមបានមេដាយ សរុបចំនួន៨គ្រឿង មកជូនជាតិ ក្នុងនោះមាន ៖ មេដាយមាស ចំនួន១គ្រឿង មេដាយប្រាក់ ចំនួន២គ្រឿង និងមេដាយសំរឹទ្ធ ចំនួន៥គ្រឿង ។ ចំណែកមេដាយមាស ១គ្រឿង រកបានដោយកីឡាករ ហេង វុទ្ធី ប្រកួតវិញ្ញាសា Freestyle ក្នុងប្រភេទទម្ងន់៩២គីឡូក្រាម រីឯមេដាយប្រាក់ ចំនួន២គ្រឿងទៀត រកបានដោយកីឡាករ ហេង រត្នថា វិញ្ញាសា Freestyle ក្នុងប្រភេទទម្ងន់៩២គីឡូក្រាម និងកីឡាករ កែវ សុភ័ក្ត្រ ជាអ្នករកបានមេដាយប្រាក់១ទៀត ប្រកួតវិញ្ញាសា Freestyle ដូចគ្នាក្នុងប្រភេទទម្ងន់៧២គីឡូក្រាម និងមេដាយសំរឹទ្ធ ១គ្រឿង ។ ចំណែកមេដាយសំរឹទ្ធចំនួន៤គ្រឿងផ្សេងទៀត រកបានដោយកីឡាការិនី ជា កញ្ញា កីឡាករ សឿន សុភាស់ កីឡាករ ឈឿន ឈាង និងកីឡាករ យុន ប៊ុនណា ។
គួរម្លឹកផងដែរថា ការប្រកួតកីឡាចំបាប់ជ្រើសរើសជើងឯក អាស៊ីអាគ្នេយ៍ (Southeast Asian & Invitational Championship) នៅប្រទេសសិង្ហបុរី ចាប់ពីថ្ងៃទី១០ ដល់ថ្ងៃទី១២ ឆ្នាំ២០២៥ របស់អត្តពលិកកម្ពុជាលើកនេះ ទទួលបានការឧបត្ថម្ភគាំទ្រពីលោ ខេស៊ី បាណេត អនុប្រធានសហព័ន្ធកីឡាចំបាប់កម្ពុជា ។ គោលបំណងសំខាន់ នៃការបញ្ជូនកីឡាករ កីឡាការិនី ជម្រើសជាតិ ឱ្យទៅចូលរួមប្រកួតនេះ គឺដើម្បីវាស់ស្ទង់កម្រិតបច្ចេកទេស ពង្រឹងសមត្ថភាពបន្ថែមឱ្យកាន់តែរឹងមាំ សម្រាប់ត្រៀមចូលរួមប្រកួត កីឡាស៊ីហ្គេម លើកទី៣៣ ឆ្នាំ២០២៥ នៅប្រទេសថៃ ក៏ដូចជាត្រៀមការប្រកួតជ្រើសរើសជើងឯក នៃព្រឹត្តិការណ៍កីឡាយុវជនអាស៊ី ដែលកម្ពុជាទទួលធ្វើជាម្ចាស់ផ្ទះ ឆ្នាំ២០២៩ ផងដែរ ៕
ចែករំលែកព័តមាននេះ