បរទេស ៖ លោក Carlo Ancelotti នឹង​ចាក​ចេញពី​ក្លិប Real Madrid នៅ​ចប់​រដូវ​កាល​នេះ ដើម្បី​ក្លាយជា​គ្រូបង្វឹក​ថ្មី​របស់​ក្រុម​ជម្រើសជាតិ​ប្រេ​ស៊ី​ល ជាមួយ​កិច្ចសន្យា​ដែល​នឹង​ចាប់ផ្តើម​នៅ​ថ្ងៃ​ទី​២៦ ខែឧសភា ឆ្នាំ​២០២៥​។ ចំណែក​លោក Xabi Alonso ក៏​នឹង​ចាក​ចេញពី​ក្លិប Bayern Leverkusen ដើម្បី​មក​ជំនួស​តំណែង​លោក Carlo Ancelotti នៅ​ទឹកដី Santiago Bernabéu ផង​ដែរ​។

សហព័ន្ធ​កីឡាបាល់ទាត់​ប្រេ​ស៊ី​ល (CBF) កាលពី​ថ្ងៃ​ទី​១២ ខែឧសភា ឆ្នាំ​២០២៥ បាន​ចេញ​សេចក្តី​ប្រកាស​ផ្លូវការ​តែងតាំង​លោក Carlo Ancelotti សញ្ជាតិ​អ៊ី​តា​លី​ជា​គ្រូបង្វឹក​ថ្មី​របស់​ក្រុម​ជម្រើសជាតិ​ឈុត​ធំ​បុរស​ប្រេ​ស៊ី​ល​។ លោក​គឺជា​គ្រូបង្វឹក​បរទេស​ដំបូង​គេ ដែល​ដឹកនាំ​ក្រុម​រហស្សនាម «​សាំ​បា​» មួយ​នេះ ហើយ​ក៏​ជា​បទ​ពិសោធន៍​ដឹកនាំ​ក្រុម​ជម្រើសជាតិ​លើក​ដំបូង​របស់​លោក​ផង​ដែរ​។

គ្រូបង្វឹក​អ៊ី​តា​លី​វ័យ​៦៥​ឆ្នាំ ដែល​បាន​ចូលរួម​ជាមួយ Real Madrid ជា​លើក​ទី​ពីរ កាលពី​ឆ្នាំ​២០២១ រូប​នេះ នឹង​ចាក​ចេញពី​ក្លិប​បន្ទាប់​ពី​ចប់​រដូវ​កាល​នៃ​ក្រប​ខណ្ឌ​កំពូល​អេ​ស្ប៉ា​ញ La Liga ដែល​មាន​ន័យ​ថា លោក​នឹង​មិន​ដឹកនាំ​ក្រុម​សម្រាប់​ការ​ប្រកួត​ព្រឹត្តិការណ៍ FIFA Club World Cup ឆ្នាំ ២០២៥ ដែល​នឹង​ចាប់ផ្តើម​ពី​ថ្ងៃ​ទី​១៤ ខែមិថុនា ដល់​ថ្ងៃ​ទី​១៣ ខែកក្កដា​នោះ​ទេ​។

លោក Carlo Ancelotti ត្រៀម​ចូល​ជំនួស​តំណែង​លោក Dorival Júnior ដែល​ត្រូវ​បាន​បណ្តេញចេញ​កាលពី​ខែមីនា បន្ទាប់​ពី​ប្រេ​ស៊ី​ល​ចាញ់​អា​ហ្ស​ង់​ទី​ន​យ៉ាង​អាម៉ាស់​លទ្ធផល ៤​ទល់​នឹង​១ នៅ​ក្នុង​វគ្គ​ជម្រុះ​ពានរង្វាន់ FIFA World Cup ឆ្នាំ​២០២៦ ប្រចាំ​ទ្វីបអាមេរិក​ខាងត្បូង​។ ហើយ​លទ្ធផល​នោះ​បាន​ធ្វើ​ឱ្យ​ប្រេ​ស៊ី​ល​ឈរ​នៅ​ចំណាត់ថ្នាក់​ទី​៤​ក្នុង​តារាង ក្រោយ​ឆ្លងកាត់​១៤​ប្រកួត​កន្លង​មក មាន​២១​ពិន្ទុ គម្លាត​រហូត​ដល់​១០​ពិន្ទុ​ពី​អា​ហ្ស​ង់​ទី​ន​ឈរ​នៅ​កំពូល​តារាង និង​ជា​ក្រុម​ដំបូង​គេ​ក្នុង​ចំណោម​ក្រុម​ទាំង​១០ ប្រចាំ​ទ្វីបអាមេរិក​ខាងត្បូង ដែល​បាន​កៅអី​ស្វ័យប្រវត្តិ​ទៅ​កាន់ការ​ប្រកួត​ជុំ​ចុង​ក្រោយ​ព្រឹត្តិការណ៍ FIFA World Cup ឆ្នាំ​២០២៦ ដែល​ប្រទេស​កា​ណា​ដា ម៉ិ​ក​ស៊ិ​ក និង​សហរដ្ឋអាមេរិក​ធ្វើ​ជា​ម្ចាស់ផ្ទះ​រួម​គា្ន​។

សូម​ជម្រាប​ជូន​ថា លោក Carlo Ancelotti ត្រូវ​បាន​ចាត់ទុកជា​គ្រូបង្វឹក​ដ៏​ជោគជ័យ និង​អស្ចារ្យ​មួយ​រូប​លើ​ពិភពលោក ដោយ​ធ្លាប់​ដឹកនាំ​ក្រុម​កំពូល​ៗ​ជា​ច្រើន​រួម​ទាំង Juventus, AC Milan, Chelsea, PSG, Bayern Munich និង Napoli ដោយ​ឈ្នះ​ពានរង្វាន់ និង​បង្កើត​បាន​កំណត់​ត្រា​ជា​ច្រើន​រាប់​មិន​អស់​។ លោក​បាន​ដឹកនាំ Real Madrid ២​លើក ដោយ​លើក​ដំបូង​ចាប់ពី​ឆ្នាំ ២០១៣ ដល់ ២០១៥ និង​លើក​ទី​២ ចាប់តាំងពី​ឆ្នាំ ២០២១ រហូត​មក​ទល់​បច្ចុប្បន្ន​។ ជោគជ័យ​ដ៏​ធ​សម្រាប់​អាជីព​របស់​លោក គឺជា​គ្រូបង្វឹក​តែ​ម្នាក់​គត់ ដែល​ឈ្នះ​ជើងឯក​ពានរង្វាន់ UEFA Champions League រហូត​ដល់​៥​ដង​។

នៅ​ក្នុង​ថ្ងៃ​ជាមួយ​គ្នា​នោះ​ដែរ ប្រភព​ពី​សារព័ត៌មាន​ធំ​ៗ​ជា​ច្រើន​បាន​រាយការណ៍​ថា ក្លិប Real Madrid កំពុង​តែ​ប្រញាប់ប្រញាល់​បញ្ចប់​កិច្ចព្រមព្រៀង​មួយ​ជាមួយ​លោក Xabi Alonso ដើម្បី​នាំ​យក​បុរស​សញ្ជាតិ​អេ​ស្ប៉ា​ញ​វ័យ​៤៣​ឆ្នាំ​រូប​នេះ ក្លាយជា​គ្រូបង្វឹក​ថ្មី​របស់​ពួក​គេ​ឱ្យ​ឆាប់​តាម​ដែល​អាច​ធ្វើ​ទៅ​បាន​។

ប្រភព​ស្និទ្ធ​នឹង​រឿង​នេះ​បាន​បង្ហើប​ឱ្យ​ដឹង​ថា តាម​ផែនការ លោក Alonso នឹង​ចាក​ចេញពី Bayern Leverkusen មក​ដឹកនាំ​ក្រុម Real Madrid នៅ​ដើមខែ​មិថុនា​តែ​ម្តង ដើម្បី​រៀបចំ​ក្រុម​សម្រាប់​ការ​ប្រកួត​ព្រឹត្តិការណ៍ FIFA Club World Cup ឆ្នាំ ២០២៥​។

លោក Alonso បាន​ប្រកាស​អំពី​ការ​ចាក​ចេញពី​ក្លិប Bayer Leverkusen កាលពី​ថ្ងៃ​សុក្រ​ស​ប្តា​ហ៍​មុន បន្ទាប់​ពី​ទទួល​បាន​ជោគជ័យ​រយៈពេល​២​ឆ្នាំ​កន្លះ​ជាមួយ​ក្លិប​អា​ល្លឺ​ម៉​ង់​មួយ​នេះ ដោយ​ឈ្នះ​ជើងឯក​លី​គ​កំពូល​អា​ល្លឺ​ម៉​ង់​១​លើក និង​ពាន​ក្នុងស្រុក​ចំនួន​២​ផ្សេង​ទៀត​ផង​ដែរ​។

ប្រភព​ពី Sky Sports រាយការណ៍​ថា ក្លិប Leverkusen បាន​យល់ព្រម​អនុញ្ញាត​ឱ្យ​លោក Alonso ចាក​ចេញពី​ក្លិប​ទៅ​ចូលរួម​ជាមួយ Real Madrid ដោយ​គ្មាន​គិតថ្លៃ​កម្រៃជើងសា​អ្វី​ទាំងអស់ បើ​ទោះជា​អតីត​ខ្សែបម្រើ​ឆ្នើម​ជម្រើសជាតិ​អេ​ស្ប៉ា​ញ ក្លិប Liverpool, Real Madrid និង Bayern Munich រូប​នេះ នៅ​សល់​កុងត្រា​១​ឆ្នាំ​ទៀត​ជាមួយ​ក្លិប​យ៉ាងណា​ក៏​ដោយ​៕ ប្រភព ៖ FIFA, BBC, ESPN, Sky Sports និង The Guardian