ចក្រភពអង់គ្លេស ៖ ខ្សែបម្រើការពារសញ្ជាតិប្រេស៊ីល Casemiro ត្រូវបានរាយការណ៍ថានឹងទទួលបានប្រាក់ឈ្នួលដ៏ច្រើន ប្រសិនបើក្រុម Manchester United ឈ្នះជើងឯកពានរង្វាន់ UEFA…
ចក្រភពអង់គ្លេស ៖ ខ្សែបម្រើការពារសញ្ជាតិប្រេស៊ីល Casemiro ត្រូវបានរាយការណ៍ថានឹងទទួលបានប្រាក់ឈ្នួលដ៏ច្រើន ប្រសិនបើក្រុម Manchester United ឈ្នះជើងឯកពានរង្វាន់ UEFA Europa League រដូវកាលនេះ។
ក្រុមបិសាចក្រហម Man Utd ហាក់មានភាគរយខ្ពស់បន្តឡើងទៅកាន់វគ្គផ្តាច់ព្រ័ត្រពានរង្វាន់ Europa League រដូវកាល ២០២៤-២៥ បន្ទាប់ពីពួកគេបានបំបាក់ក្រុមម្ចាស់ផ្ទះ Athletic Bilbao ជើងទី១ វគ្គពាក់កណ្តាលផ្តាច់ព្រ័ត្រ ដោយលទ្ធផល ០-៣ កាលពីថ្ងៃទី១ ខែឧសភា ឆ្នាំ២០២៥ មុនពេលទូទាត់គ្នានៅជើងទី២ ថ្ងៃទី៨ ខែឧសភា ឆាប់ៗខាងមុខនេះ។
យ៉ាងណាមិញ បើតាមប្រភពពីកាសែត The Daily Star និងគេហទំព័រ goal.com បានរាយការណ៍ថា ប្រសិនបើ Man United ឈ្នះជើងឯក Europa League រដូវកាលនេះ Casemiro នឹងទទួលបានប្រាក់ឈ្នួល ២៥% បន្ថែមទៀត ដូចដែលត្រូវបានព្រមព្រៀងគ្នាក្នុងកុងត្រារបស់គេជាមួយក្លិប Man Utd។ របាយការណ៍ដដែលបានបញ្ជាក់ថា អតីតខ្សែបម្រើការពារឆ្នើមក្រុមស្តេចស Real Madrid វ័យ៣៣ឆ្នាំរូបនេះ នឹងកើនប្រាក់ឈ្នួលរហូតដល់៥០ម៉ឺនផោនក្នុងមួយសប្តាហ៍ ឬជាង ៦៦៤ ៣១០ដុល្លារអាមេរិក ដោយចំនួននេះ ស្មើនឹងប្រាក់ឈ្មួលរបស់ខ្សែប្រយុទ្ធព័រទុយហ្គាល់ Cristiano Ronaldo អំឡុងពេលមកចូលរួមជាមួយក្រុម Man Utd ជាលើកទី២ នៅឆ្នាំ ២០២១ ដល់ឆ្នាំ ២០២២ ហើយក៏ជាប្រាក់ឈ្នួលខ្ពស់បំផុតប្រចាំប្រវត្តិសាស្ត្រក្លិបផងដែរ។
សូមជម្រាបថា Casemiro បានផ្លាស់ពីក្លិប Real Madrid មកចូលរួមជាមួយ Man Utd កាលពីឆ្នាំ ២០២២ នៅក្នុងតម្លៃ ៧០លានអឺរ៉ូ ឬជិត ៨០លានដុល្លារ ដោយស៊ុតបញ្ចូលទីបាន ១៦គ្រាប់ពីការបង្ហាញខ្លួន ១២១ប្រកួត និងឈ្នះពានរង្វាន់ EFL Cup និង FA Cup។ បច្ចុប្បន្នខ្សែបម្រើការពាររូបនេះ កំពុងឈរជាកីឡាករមានថ្លៃពលកម្មខ្ពស់ជាងប្រចាំក្លិប Man Utd ពោល ៣៥០ ០០០ផោន ស្មើជាង ៤៦៥ ០០០ដុល្លារ ឬ ១៨ ២០០ ០០០ផោន ស្មើនឹងជាង ២៤ ១៨០ ០០០ដុល្លារ។
បើទោះបីជាបង្ហាញគុណផលល្អនៅរដូវកាលដំបូងរបស់ខ្លួនជាមួយ Man Utd ក៏ពិតមែន ប៉ុន្តែក្រោយមកកីឡាកររូបនេះ នៅតែទទួលបានការរិះគន់ពីសំណាក់អតីតកីឡាករបាល់ទាត់ល្បីៗ និងអ្នកវិភាគជាច្រើនថា សមត្ថភាពរបស់គេមិនសមទទួលបានប្រាក់ឈ្នួលដ៏ខ្ពស់ និងតម្លៃផ្ទេរដ៏ច្រើនបែបនេះទេ៕
ចែករំលែកព័តមាននេះ