ទីក្រុង​មី​ឡាន ៖ គ្រូបង្វឹក​ក្រុម​អ្នកមាន​បុណ្យ Barcelona លោក Hansi Flick បាន​ខកចិត្ត​យ៉ាង​ខ្លាំង ខណៈ​ដែល​ក្រុម​របស់​លោក​ធ្លាក់​ចេញពី​ពានរង្វាន់ UEFA Champions League រដូវ​កាល ២០២៤-២០២៥ ត្រឹម​វគ្គ​ពាក់កណ្តាល​ផ្តាច់ព្រ័ត្រ បន្ទាប់​ពី​ចាញ់​ក្រុម Inter Milan សរុប​ទាំង​ទាំង​ពីរ​ជើង​លទ្ធផល ៧​ទល់​នឹង​៦ ដោយ​ជើង​ទី​២ នៅ​កីឡដ្ឋាន San Siro ទីក្រុង​មី​ឡាន ប្រទេស​អ៊ី​តា​លី កាលពី​ថ្ងៃ​ទី​៦ ខែឧសភា ឆ្នាំ​២០២៥ ពួក​គេ​ចាញ់​នៅ​ក្នុង​ការ​ប្រកួត​ម៉ោង​បន្ថែម​១៥​នាទី​២​ដង នៅ​ក្នុង​លទ្ធផល ៤​ទល់​នឹង​៣​។

លោក Hansi Flick គ្រូបង្វឹក​សញ្ជាតិ​អា​ល្លឺ​ម៉​ង់​បាន​សម្តែង​ការ​ខកចិត្ត​យ៉ាង​ខ្លាំង ជាមួយ​ការ​កាត់សេចក្តី​របស់​លោក​អាជ្ញាកណ្តាល​សញ្ជាតិ​ប៉ូ​ឡូញ Szymon Marciniak ដោយ​លោក​បាន​ឡើង​ថា «​រាល់​ការ​សម្រេចចិត្ត ៥០-៥០ របស់​អាជ្ញាកណ្តាល គឺ​នៅ​ខាង Inter Milan»​។ អតីត​គ្រូបង្វឹក​ក្រុម​ជម្រើសជាតិ​អា​ល្លឺ​ម៉​ង់​វ័យ​៦០​ឆ្នាំ​រូប​នេះ បាន​បន្ថែម​នៅ​ក្នុង​សន្និសីទ​សារព័ត៌មាន​ក្រោយ​ការ​ប្រកួត​ថា «​ខ្ញុំ​មិន​ចង់​និយាយ​ច្រើន​ពេក​ពី​អាជ្ញាកណ្តាល​នោះ​ទេ វា​នឹង​មិន​យុត្តិធម៌​សម្រាប់​ក្រុម​ខ្ញុំ​ដែល​ទទួល​បាន​ពី​ការ​កាត់សេចក្តី​របស់​គាត់​។ ខ្ញុំ​ក៏​បាន​ប្រាប់​គាត់​រួច​ហើយ​នូវ​អ្វី​ដែល​ខ្ញុំ​បាន​គិត​អំពី​ការ​កាត់សេចក្តី​របស់​គាត់​»​។

យ៉ាងណាមិញ លោក​ក៏​បាន​លើក​សរសើរ​ពី​ការ​លេង​ដ៏​ល្អ​ទាំង​ពីរ​ជើង​របស់​ក្រុម Inter Milan ហើយ​ក៏​ចូលរួម​អបអរសាទរ​ជ័យជម្នះ និង​ជូនពរ​ក្រុម​យក្ស​អ៊ី​តា​លី​មួយ​នេះ សំណាងល្អ​នៅ​វគ្គ​ផ្តាច់ព្រ័ត្រ​។
បើ​ទោះជា​ចាញ់​ការ​ប្រកួត និង​ធ្លាក់​ចេញពី​ពានរង្វាន់ UEFA Champions League រដូវ​កាល​នេះ​ក៏​ពិតមែន ប៉ុន្តែ​លោក Hansi Flick បាន​គូសបញ្ជាក់​ពី​ការ​ខិតខំ​ប្រឹងប្រែង​របស់​កូនក្រុម​របស់​លោក ហើយ​បាន​ជំរុញ​ពួក​គេ​ងើប​ក្បាល​ឡើយ ហើយ​បន្ត​ការ​ប្រយុទ្ធ​ទៅ​មុខ​បន្ត​ទៀត ពិសេស​ផ្តោត​លើ​ការ​ប្រកួត​ចុង​ក្រោយ​នៃ​ក្រប​ខណ្ឌ​លី​គ​កំពូល​អេ​ស្ប៉ា​ញ LaLiga ដែល​ពួក​គេ​កំពុង​តែ​នាំមុខ​ក្រុម​ស្តេច​ស Real Madrid ចំនួន​៤​ពិន្ទុ​លើ​កំពូល​តារាង ខណៈ​នៅ​សល់​៤​ប្រកួត​ទៀត ដើម្បី​បញ្ចប់​រដូវ​កាល​នេះ​។
លោក Hansi Flick បាន​បន្ថែម​ចុង​ក្រោយ​ថា «​ពិត​ណាស់​! ពួក​គេ​ខកចិត្ត​បន្ទាប់​ពី​ការ​ប្រកួត​នេះ​។

យើង​ត្រូវ​ទទួលយក​វា ព្រោះ​នេះ​គឺជា​បាល់ទាត់ ប៉ុន្តែ​យើង​អាច​មាន​មោទនភាព​ចំពោះ​ការ​ប្រឹងប្រែង​របស់​យើង ហើយ​ខ្ញុំ​ពិតជា​មាន​មោទនភាព​។ ពួក​យើង​បាន​ធ្លាក់​ហើយ ប៉ុន្តែ​យើង​នឹង​ត្រលប់​មក​វិញ ដោយ​សង្ឃឹមថា ឆ្នាំ​ក្រោយ​យើង​អាច​លេង​នៅ​ក្នុង​ទឹកដី​របស់​យើង​ជាមួយនឹង​បរិយាកាស​ដូច​ថ្ងៃនេះ​»​។

គួរ​បញ្ជាក់​ថា ការ​ប្រកួត​វគ្គ​ផ្តាច់ព្រ័ត្រ UEFA Champions League រដូវ​កាល ២០២៤-២៥ នឹង​ត្រូវធ្វើ​ឡើង​នៅ​កីឡដ្ឋាន Allianz Arena ដែល​មាន​មូលដ្ឋាន​នៅ​ទីក្រុង​មុ​យ​និ​ច ប្រទេស​អា​ល្លឺ​ម៉​ង់ ដែល​ជា​កីឡដ្ឋាន​របស់​ក្លិប Bayern Munich នៅ​ថ្ងៃ​ទី​៣១ ខែឧសភា ឆ្នាំ​២០២៥៕ ប្រភព ៖ beIN SPORTS