ដំណើការរៀបចំប្រឡងសញ្ញាបត្រមធ្យមសិក្សាទុតិយភូមិ ដែលយើងតែងតែហៅជាទូទៅថា ប្រឡងបាក់ឌុប គឺកាន់តែគៀកទៀតហើយ ។ ដូច្នេះប្អូនៗយុវសិស្ស ដោយរួមទាំងអាណាព្យាបាលក៏ដូចជា ឪពុកម្តាយណា ដែលមានកូនត្រូវដល់ឆ្នាំប្រឡងដ៏សំខាន់នេះកុំភ្លេចរំលឹកដាស់តឿន លើកទឹកចិត្ត…
ដំណើការរៀបចំប្រឡងសញ្ញាបត្រមធ្យមសិក្សាទុតិយភូមិ ដែលយើងតែងតែហៅជាទូទៅថា ប្រឡងបាក់ឌុប គឺកាន់តែគៀកទៀតហើយ ។ ដូច្នេះប្អូនៗយុវសិស្ស ដោយរួមទាំងអាណាព្យាបាលក៏ដូចជា ឪពុកម្តាយណា ដែលមានកូនត្រូវដល់ឆ្នាំប្រឡងដ៏សំខាន់នេះកុំភ្លេចរំលឹកដាស់តឿន លើកទឹកចិត្ត និងជំរុញបន្ថែម ដើម្បីឲ្យកូនៗអាចទទួលបានលទ្ធផលដ៏ត្រចះត្រចង់ នៅពេលដែល សម័យប្រឡងបានមកដល់ ។
តាមការចែករំលែករបស់ លោក ហង់ជួន ណារ៉ុន ឧបនាយករដ្ឋមន្ត្រី និងជារដ្ឋមន្ត្រីក្រសួងអប់រំ យុវជន និងកីឡា សម័យប្រឡងវាស់ស្ទង់សមត្ថភាពចំណេះដឹងទូទៅរបស់យុវសិស្សកម្ពុជាដ៏សំខាន់មួយនេះគ្រោងនឹងធ្វើការរៀបចំឡើងនៅក្នុងរង្វង់ថ្ងៃទី១៨ ខែសីហា ឆ្នាំ២០២៥ ខាងមុខ ហើយពាក់ព័ន្ធនឹងការរៀបចំការប្រឡងដ៏សំខាន់នេះឲ្យកាន់តែមានសុក្រឹត្យភាព កាលពីរសៀលថ្ងៃទី៩ ខែឧសភា ថ្មីៗនេះលោកបានដឹកនាំកិច្ចប្រជុំត្រៀមរៀបចំការប្រឡងនេះជាមួយនឹងថ្នាក់ដឹកនាំ និងមន្ត្រីមកពីនាយកដ្ឋានពាក់ព័ន្ធនានា ។
លោកឧបនាយករដ្ឋមន្ត្រីក៏បានចែករំលែកបន្តថា មកដល់ពេលនេះ ក្រសួងបានកំពុងតែរៀបចំការកំណត់សម័យប្រឡង និងប្រតិទិនសំខាន់ៗ ការរៀបចំផែនការសកម្មភាពឆ្ពោះទៅកាន់ការប្រឡង គោលការណ៍ប្រឡង និងនីតិវិធីប្រឡងការៀបចំបញ្ជីឈ្មោះបេក្ខជន និងសលាកបត្រឯកត្តជន ការកំណត់មណ្ឌលប្រឡង និងទីតាំងសម្រាប់បំពេញការងារប្រឡង, ការរៀបចំការផលិតនិងគ្រប់គ្រង ប្រធានវិញ្ញាសាប្រឡង ការរៀបចំគណៈមេប្រយោគ និងគណៈកម្មការនានា ការទំនាក់ទំនងអន្តរក្រសួងស្ថាប័ន សម្ភារៈបរិក្ខារ និងថវិកាប្រឡង ការរៀបចំយន្តការធានាសុខសុវត្ថិភាពសុខភាព ពេលប្រឡង និងការរៀបចំកន្លែងសម្រាប់ដំណើការប្រឡងក៏ដូចជា ការត្រៀមរៀបចំយន្តការកំណែរ ។
ដើម្បីជំរុញប្រសិទ្ធភាពការងារ និងធានាឱ្យបាននូវដំណើរការប្រឡងប្រកបដោយភាពរលូន សុក្រឹតភាព យុត្តិធម៌ និងតម្លាភាព ស្របតាមគោលការណ៍ «អ្នកចេះ គឺជាប់» លោកឧបនាយករដ្ឋមន្ត្រីបាន ផ្តល់អនុសាសន៍មួយចំនួនជូនក្រុមការងារជំនាញដើម្បីអនុវត្តបន្តដូចជា ការពង្រឹងយន្តការ និងសម្រួបសម្រួលដល់ការបន្ថែមបេក្ខភាពបេក្ខជន ក្នុងការប្រឡង និងត្រៀមលក្ខណៈជានិច្ចជៀសវាងទឹកជន់លិចនៅរដូវវស្សា ដោយសារជំនន់ទឹកភ្លៀងជាដើម ។
យ៉ាងណាមិញ គប្បីពង្រឹងយន្តការត្រួតពិនិត្យដំណាក់កាលកំណែរ ទាំងការបែងចែកសន្លឹកកិច្ចការ កាត់ក្បាលសន្លឹកកិច្ចការ និងពេលកំណែត្រូវមានភាពច្បាស់លាស់ដោយប្រធានក្រុមរួមមុខវិជ្ជា ត្រូវណែនាំលម្អិតពីដំណើរការប្រឡង ដំណើរការនៃការបូកស្រង់ពិន្ទុ កម្រងភារកិច្ច និងបែងចែកនូវលំហូរនៃសកម្មភាព ការទទួលខុសត្រូវឱ្យបានច្បាស់លាស់ ។
នៅក្នុងអំឡុងពេលនេះ ពេលវេលានៃការប្រឡងកាន់តែគៀក ដោយខាងស្ថាប័នជំនាញកំពុងតែប្រញឹកដែរ ដោយឡែកយើងជាយុវសិស្សក៏ត្រូវតែចូលរួមសំខាន់ដែរ ។ យុវសិស្សកុំភ្លេចថា ក្រសួង អប់រំ យុវជន និងកីឡា ក៏ដូចជា ស្ថាប័នពាក់ព័ន្ធនានា គឺគ្រាន់តែជាអ្នករៀបចំទេ តែយើងជាយុវសិស្សនេះទេ ដែលជាអ្នកប្រកួតប្រជែងនៅក្នុងថ្ងៃទី១៨ ខែសីហា ឆ្នាំ២០២៥ ខាងមុខនេះ ។
ប្អូនៗ ចាប់ពីថ្ងៃនេះ (ថ្ងៃទី១២ ខែឧសភា ឆ្នាំ២០២៥) រហូតដល់ថ្ងៃប្រឡង ថ្ងៃទី១៨ ខែសីហា ឆ្នាំ២០២៥ នៅសល់ត្រឹមតែ៣ ខែ៦ថ្ងៃទៀតប៉ុណ្ណោះ ។ ពេលវេលានេះ នៅសល់មិនច្រើនទេ តែវាក៏ល្មមគ្រប់គ្រាន់នឹងប្អូនៗក្មួយៗគួរតែភ្ញាក់រលឹក ហើយចាប់ផ្តើមសម្រុករៀនសូត្រ ដោយឡែកអាណាព្យាបាល ជាពិសេស គឺឪពុកម្តាយ គឺត្រូវតែសម្របសម្រួលលើកទឹកចិត្តធ្វើយ៉ាងណាឲ្យកូនប្រុសកូនស្រីរបស់អ្នកទាំងអស់គ្នាអាចឆ្លងផុតដំណាក់កាលនេះ ។
ពេលវេលាកាន់តែខ្លី ដូច្នេះគប្បីប្អូនៗបែងចែកការរៀបចំពេលវេលារៀនសូត្រអោយមានប្រសិទ្ធភាព ដើម្បីទទួលបានលទ្ធផលជោគជ័យ នៅក្នុងដំណើរការប្រឡងនាពេលខាងមុខនេះ ។ បើរាប់ជាខែ គឺវានៅសល់ប្រមានជា៣ខែ៦ថ្ងៃ ប៉ុន្តែបើរាប់ជាសប្តាហ៍ គឺវាប្រហែលជា១៤សប្តាហ៍ ដូច្នេះប្អូនៗ គួរតែបែងចែកកម្មវិធីស្វ័យសិក្សាឲ្យបានច្បាស់លាស់ ។
ជាបទពិសោធន៍នៅក្នុងអំឡុងពេលនេះ គឺពីសប្តាហ៍ទៅ១ដល់ទី៤ ប្អូនៗគួរតែរៀបចំផែនការរំលឹកមេរៀនមូលដ្ឋាននានាដែលត្រូវប្រឡងឡើងវិញទាំងអស់ ។ ប្អូនៗគួរតែរៀបចំសៀវភៅសិក្សា និងឯកសារសង្ខេប ហើយព្យាយាមរៀបចំពាក្យគន្លឹះសំខាន់ៗ និងរបៀបដោះស្រាយសំនួរចម្លើយនានា ។ ក្រៅពីរៀននៅសាលា ប្អូនៗត្រូវលៃលកពេលវេលារៀនបន្ថែមខ្លួនឯងយ៉ាងហោចណាស់ក៏ពី ២ទៅ៣ម៉ោងបន្ថែមខ្លួនឯងរាល់ថ្ងៃ ។
ចន្លោះពេលសប្តាហ៍ ៥ ដល់៨ ប្អូនៗគួរតែព្យាយាមស្វែងយល់ និងស្វែងរកចំណុចខ្សោយហើយព្យាយាមបំពេញចំណុចដែលខ្វះខាតទាំងនោះ និងប្រឹងប្រែងធ្វើលំហាត់ឲ្យបានកាន់តែច្រើនកាន់តែល្អ ។ លំហាត់ទាំងនោះ គឺត្រូវធ្វើហើយធ្វើទៀតទាល់តែស្ទាល់ជំនាញ មិនមែនធ្វើម្តងហើយចាត់ទុកថា ខ្លួនចេះស្ទាត់នោះទេ ។ នៅក្នុងករណីខ្លះ ប្អូនៗអាចចងគ្នាជាក្រុមរៀនដើម្បីជួយគ្នា ។ ប៉ុន្តែការចងជាក្រុមនេះ គឺត្រូវប្រាកដថា ចង ដើម្បីរៀន មិនមែនជុំគ្នាលេងហ្គេម ឬ ធ្វើសកម្មភាពមិនបានការជាមួយគ្នានោះឡើយ ។
ពីសប្តាហ៍ទី៩ ដល់សប្តាហ៍ទី១២ ប្អូនៗគួរតែរៀនជាផ្នែកៗដូចជា ពង្រឹងការអាន សាកល្បងការសរសេរ ពង្រឹងការគិត និងគណនា ហើយក៏ត្រូវតែរៀនវិភាគ និងបកស្រាយបញ្ហា ហើយសាកល្បងប្រមែប្រមូល វិញ្ញាសាររៀមច្បងប្រឡងមុនៗយកមកធ្វើយក ដើម្បីវាស់ស្ទង់កម្រិតសមត្ថភាពរបស់យើងទាំងអស់គ្នា ។
នៅសប្តាហ៍ទី១៣ ដល់សប្តាហ៍ទៅ១៤ ប្អូនៗដាច់ខាតត្រូវតែរំលឹកមេរៀនឡើងវិញទាំងអស់ ហើយនៅក្នុងករណីដែលប្អូនៗគិតថា ប្អូនៗអាចមានសមត្ថភាពគ្រប់គ្រាន់ហើយប្អូនៗអាចបន្ថយដៃបន្តិចហើយ ព្យាយាមសម្រាកបំប៉នស្មារតី ហើយរៀនហ្វឹកហាត់លំហាត់នៃការពង្រឹងសតិបញ្ញាស្មារតី ដើម្បីការពារកុំអោយយើងស្លុត យើងភ័យបាត់ម្ចាស់ការចំពោះខ្លួនចំពោះសមត្ថភាពដែលបានត្រៀម ។ ការសម្រាកគ្រប់គ្រាន់ ញ៉ាំអាហារដែលមានសារៈប្រយោជន៍ចំពោះសុខភាពដើម្បីបំប៉នកម្លាំងនឹងស្មារតីត្រៀមចូលសៃវៀននៃការប្រឡង ។
សរុបទៅ ពីថ្ងៃនេះដល់ថ្ងៃរៀបចំប្រឡង គឺនៅសល់មិនច្រើនទេ ប៉ុន្តែក៏មិនត្រូវស្លន់ស្លោរដែរ គឺត្រូវពង្រឹងស្មារតីខ្លួនឯង ហើយខំប្រឹងរៀនសូត្រដោយបែងចែកកាលវិភាគនៅក្នុងការស្វ័យសិក្សាប្រកបដោយ ភាពឈ្លាសវៃ ។ ជាទូទៅប្អូនៗដែលឆ្លងផុតដំណាក់ កាលនេះ រមែងមានឥស្សរៈភាពច្រើន ពីព្រោះតែប្អូនៗត្រូវបានអាណាព្យាបាលគិតថា ប្អូនៗចម្រើនវ័យដែលអាចមើលថែទាំង និងការពារខ្លួនឯងបាន ៕
ចែករំលែកព័តមាននេះ