ខេត្តកំពត ៖ ស្ត្រីម្នាក់ដែលសមត្ថកិច្ចនាយកដ្ឋាននគរបាលព្រហ្មទណ្ឌក្រសួងមហាផ្ទៃ អនុវត្តតាមដីកាបង្គាប់ឲ្យចាប់ខ្លួន បានធ្វើឲ្យមានការភ្ញាក់ផ្អើលនៅខេត្តកំពត នារសៀលថ្ងៃទី០៩ ខែឧសភា ឆ្នាំ២០២៥ ត្រូវបានបញ្ជូនដល់ដៃចៅក្រមស៊ើបសួរសាលាដំបូងរាជធានីភ្នំពេញហើយ និងកំពុងសាកសួរ…
ខេត្តកំពត ៖ ស្ត្រីម្នាក់ដែលសមត្ថកិច្ចនាយកដ្ឋាននគរបាលព្រហ្មទណ្ឌក្រសួងមហាផ្ទៃ អនុវត្តតាមដីកាបង្គាប់ឲ្យចាប់ខ្លួន បានធ្វើឲ្យមានការភ្ញាក់ផ្អើលនៅខេត្តកំពត នារសៀលថ្ងៃទី០៩ ខែឧសភា ឆ្នាំ២០២៥ ត្រូវបានបញ្ជូនដល់ដៃចៅក្រមស៊ើបសួរសាលាដំបូងរាជធានីភ្នំពេញហើយ និងកំពុងសាកសួរ ដែលជាប់ពាក់ព័ន្ធសំណុំរឿងពីបទរំលោភលើទំនុកចិត្ត ។
ស្ត្រីរូបនោះមានឈ្មោះ អីុ ស៊ូជីង អាយុ៣៩ឆ្នាំ ស្នាក់នៅអគារសាលាភាសាកូរ៉េ ចន់ ជូ ភូមិភ្លូផ្អែម ឃុំគោករការ ខណ្ឌព្រែកព្នៅ រាជធានីភ្នំពេញ ។ កាលពីថ្ងៃទី០៧ ខែឧសភា ឆ្នាំ២០២៥ កម្លាំងសមត្ថកិច្ចនាយកដ្ឋាននគរបាលព្រហ្មទណ្ឌ នៃអគ្គស្នងការដ្ឋាននគរបាលជាតិ សហការជាមួយនគរបាលខេត្តកំពត បានអនុវត្តតាមដីកាបង្គាប់ឲ្យចាប់ខ្លួនរបស់ចៅក្រមស៊ើបសួរសាលាដំបូងរាជធានីភ្នំពេញ ទៅលើឈ្មោះ អីុ ស៊ូជីង ដែលជនសង្ស័យជាមុខសញ្ញា កំពុងជិះរថយន្តនៅចំណុចភូមិស្នំប្រាំពីរ ឃុំម៉ាក់ប្រាង ស្រុកទឹកឈូ ខេត្តកំពត ។
ខណៈដែលសមត្ថកិច្ចបាននិងកំពុងធ្វើការឃាត់ខ្លួន ជនសង្ស័យមិនចុះពីលើរថយន្តទេ ហើយថែមទាំងបានបង្ហោះសារលើបណ្តាញសង្គមហ្វេសប៊ុកផ្ទាល់ខ្លួន ដែលមានអាខោនឈ្មោះ(Sou Ching E)ថា “សូមសមត្ថកិច្ចជួយអន្តរាគមន៍ មានក្រុមមនុស្សបើកឡានបុកឡានខ្ញុំ ស្កាត់មុខឡានខ្ញុំ ហើយដាក់ម៉ូតូពីក្រោយឡានខ្ញុំ មិនឲ្យខ្ញុំទៅណារួច មានបំណងចាប់ជម្រិតឬយ៉ាងណា ? សូមសមត្ថកិច្ចខេត្តកំពត ជួយធ្វើអន្តរាគមន៍ដោយអនុគ្រោះ នៅទីតាំងភូមិស្នំប្រាំពីរ ឃុំម៉ាក់ប្រាង ស្រុកទឹកឈូ ខេត្តកំពត ផ្លូវឡើងទៅវត្តជប់” ។
ក្រោយពេលអាខានហ្វេសប៊ុកឈ្មោះ (Sou Ching E) បានបង្ហោះភ្លាម លោកឧត្តមសេនីយ៍ទោស្នងការនគរបាលខេត្តកំពត ក៏បានឆ្លើយតបភ្លាមៗ តាមគេហទំព័រផេកផ្លូវការរបស់ស្នងការដ្ឋាននគរបាលខេត្តកំពត ដោយបញ្ជាក់ថា “ជូនសាធារណជនមេត្តាជ្រាបជាព័ត៌មាន ចំពោះករណីខាងលើនេះ គឺជាការអនុវត្តតាមដីកាបង្គាប់ឲ្យនាំខ្លួនរបស់សាលាដំបូងរាជធានីភ្នំពេញ បច្ចុប្បន្នជនសង្ស័យ ត្រូវបានប្រគល់ជូននាយកដ្ឋាននគរបាលព្រហ្មទណ្ឌ ដើម្បីបន្តនីតិវិធី” ។
យោងតាមដីកាបង្គាប់ឲ្យចាប់ខ្លួន បានដាក់ឲ្យជនសង្ស័យឈ្មោះ អីុ ស៊ូជីង ស្ថិតក្រោមការត្រួតពិនិត្យ ពីបទរំលោភលើទំនុកចិត្ត តាមមាត្រា ៣៩១ មាត្រា ៣៩២ នៃក្រមព្រហ្មទណ្ឌ ប្រព្រឹត្តនៅរាជធានីភ្នំពេញ ចាប់ផ្តើមអំឡុងឆ្នាំ២០១៦ និងថ្ងៃទី២០ ខែមករា ឆ្នាំ២០២៤ ថ្ងៃទី២៤ ខែកក្កដា និងថ្ងៃទី០២ ខែសីហា ឆ្នាំ២០២៤ ។ យល់ឃើញថា ដើម្បីធានាដល់ការបង្ហាញខ្លួនជនត្រូវចោទនៅចំពោះមុខចៅក្រមស៊ើបសួរ និងដើម្បីធានាដល់ការស៊ើបសួរឲ្យបានពេញលេញ គប្បីបង្គាប់ឲ្យនាំខ្លួនឈ្មោះ អីុ ស៊ូជីង ភេទស្រី ដែលមានអត្តសញ្ញាណដូចខាងលើ មកចំពោះមុខចៅក្រមស៊ើបសួរ ដើម្បីបំភ្លឺការពិត ៕
ចែករំលែកព័តមាននេះ