ខេត្តក្រចេះ ៖ កម្លាំងកងរាជអាវុធហត្ថខេត្តក្រចេះ ក្នុងប្រតិបត្តិការរយៈពេលមួយថ្ងៃពេញ បានចុះក្រសោបជនចែកចាយគ្រឿងញៀន ចំនួន៣ទីតាំងផ្សេងគ្នា ដោយឃាត់ខ្លួនជនសង្ស័យ ចំនួន៥នាក់ ជាមួយវត្ថុតាងមួយចំនួនទៀតផងដែរ ។…
ខេត្តក្រចេះ ៖ កម្លាំងកងរាជអាវុធហត្ថខេត្តក្រចេះ ក្នុងប្រតិបត្តិការរយៈពេលមួយថ្ងៃពេញ បានចុះក្រសោបជនចែកចាយគ្រឿងញៀន ចំនួន៣ទីតាំងផ្សេងគ្នា ដោយឃាត់ខ្លួនជនសង្ស័យ ចំនួន៥នាក់ ជាមួយវត្ថុតាងមួយចំនួនទៀតផងដែរ ។
ប្រតិបត្តិការនេះ កម្លាំងកងរាជអាវុធហត្ថស្រុកចិត្តបុរី រួមសហការជាមួយកម្លាំងអាវុធហត្ថខេត្ត ធ្វើឡើងកាលពីថ្ងៃទី១១ ខែឧសភា ឆ្នាំ២០២៥ ស្ថិតក្នុងស្រុកចិត្របុរី និងស្រុកឆ្លូង ។
លោក រ៉ន សាមុត មេបញ្ជាការអាវុធហត្ថស្រុកចិត្របុរី បានប្រាប់សារព័ត៌មានថា ក្រោយការស៊ើបអង្កេតក្តោបក្តាប់លើមុខសញ្ញាជួញដូរគ្រឿងញៀន និងទទួលបានបទបញ្ជាផ្ទាល់ពីលោកឧត្តមសេនីយ៍ត្រីមេបញ្ជាការកងរាជអាវុធហត្ថខេត្ត កម្លាំងប្រតិបត្តិការបានធ្វើការបង្ក្រាបករណីចែកចាយជួញដូរ និងរក្សាទុកគ្រឿងញៀន ដោយខុសច្បាប់ខាងលើ កម្លាំងកងរាជអាវុធហត្ថ បានធ្វើឡើងក្នុងគោលដៅ៣ទីតាំងផ្សេងគ្នា និងឃាត់ខ្លួនជនសង្ស័យចំនួន ៥នាក់ ។
លោកបន្តថា ទីតាំងទី១. កម្លាំងជំនាញ បានឃាត់ខ្លួនជនសង្ស័យចំនួន២នាក់ ។ ១.ឈ្មោះ ឌីម ពិសី ភេទប្រុស អាយុ៤០ឆ្នាំ ទី២.ឈ្មោះឃឹម ភារុណ ភេទប្រុស អាយុ២៩ឆ្នាំ ។ ជនសង្ស័យទាំង២នាក់ មានទីលំនៅភូមិបុសលាវលើ ឃុំបុសលាវ ស្រុកចិត្របុរី ខេត្តក្រចេះ។ រកឃើញម្សៅក្រាមពណ៍សថ្លា សង្ស័យជាសារធាតុញៀនចំនួន០៦កញ្ចប់ និងសម្ភារៈសម្រាប់ប្រើប្រាស់មួយចំនួនទៀត ។
លោកបន្តថា ក្រោយឃាត់ខ្លួនជនសង្ស័យខាងលើ និងយោងតាមចម្លើយសារភាព កម្លាំងជំនាញឆ្ពោះទៅគោលដៅទី២ ដោយបានឃាត់ខ្លួនជនសង្ស័យ២នាក់បន្ថែម ម្នាក់ឈ្មោះ ជីវ តារា (ហៅង៉ោ) ភេទប្រុស អាយុ៣០ឆ្នាំ ជនជាតិខ្មែរ និងម្នាក់ទៀតឈ្មោះ ហូ សាន់ ភេទប្រុស អាយុ៣៤ឆ្នាំ ជនជាតិខ្មែរឥស្លាម អ្នកទាំង២នាក់ មានទីលំនៅភូមិឈើទាលភ្លោះក្រោម ឃុំព្រែកសាម៉ាន់ ស្រុកឆ្លូង ខេត្តក្រចេះ។ កម្លាំងជំនាញក៏បានរកឃើញម្សៅក្រាមពណ៍សថ្លា សង្ស័យជាសារធាតុញៀនចំនួន០១កញ្ចប់ ។
លោកមេបញ្ជាការអាវុធហត្ថស្រុកចិត្របុរី បានបញ្ជាក់ថា នៅថ្ងៃដ៏ដែលកម្លាំងអាវុធហត្ថស្រុក រួមសហការជាមួយកម្លាំងអាវុធហត្ថខេត្តបានកំណត់មុខសញ្ញា និងឈានទៅដល់ការឃាត់បានជនសង្ស័យម្នាក់បន្ថែមទៀតឈ្មោះ សុះ រសាត ភេទប្រុស អាយុ ២៤ឆ្នាំ ជនជាតិខ្មែរឥស្លាម រស់នៅឃុំព្រែកសាម៉ាន់ ស្រុកឆ្លូង ខេត្តក្រចេះ ។ ឆែកឆេរកឃើញម្សៅក្រោមពណ៌សថ្លាសង្ស័យជាសារធាតុញៀនចំនួន០២កញ្ចប់ ។
ក្រោយប្រតិបត្តិការបង្ក្រាបករណីគ្រឿងញៀនខាងលើ ជនសង្ស័យទាំង ៥នាក់ រួមនិងវត្ថុតាងថ្នាំញៀនសរុបចំនួន៩កញ្ចប់តូចធំ រួមនិងសម្ភារៈប្រើប្រាស់មួយចំនួនទៀត ជំនាញកំពុងសួរនាំ និងកសាងសំណុំរឿងបញ្ជូនទៅសាលាដំបូងខេត្តក្រចេះ បន្តតាមនីតិវិធីច្បាប់ ៕
ចែករំលែកព័តមាននេះ