ខេត្តព្រៃវែង ៖ ផ្ទះសម្បែងប្រជាពលរដ្ឋចំនួន៥គ្រួសារ ដែលសង់នៅតាមបណ្តោយដងទន្លេតូច ក្នុងឃុំពាមកោះ ស្រុកពាមរក៍ បានរងការខូចខាតដោយសារតែការបាក់ស្រុតដីច្រាំងទន្លេ ហើយទ្រព្យសម្បត្តិជាច្រើនក៏បានបាត់បង់ដោយសារតែធ្លាក់ចូលទៅក្នុងទឹកផងដែរ ។ លោកយាយ…
ខេត្តព្រៃវែង ៖ ផ្ទះសម្បែងប្រជាពលរដ្ឋចំនួន៥គ្រួសារ ដែលសង់នៅតាមបណ្តោយដងទន្លេតូច ក្នុងឃុំពាមកោះ ស្រុកពាមរក៍ បានរងការខូចខាតដោយសារតែការបាក់ស្រុតដីច្រាំងទន្លេ ហើយទ្រព្យសម្បត្តិជាច្រើនក៏បានបាត់បង់ដោយសារតែធ្លាក់ចូលទៅក្នុងទឹកផងដែរ ។
លោកយាយ សុខ កង អាយុ៧៧ឆ្នាំ ជាម្ចាស់ផ្ទះរងគ្រោះម្នាក់ក្នុងចំណោម៥នាក់ បានឱ្យដឹងថា ដីច្រាំងទន្លេក្រោយផ្ទះរបស់គាត់បានចាប់ផ្តើមស្រុតតាំងពីថ្ងៃចុងសប្ដាហ៍មុនមកម្ល៉េះ ប៉ុន្តែដំបូងវាគ្រាន់តែបាក់ដីនៅខាងក្រោមតិចៗមិនទាន់ដល់ផ្ទះទេ ទើបពួកគាត់មិនចាប់អារម្មណ៍ ។
លុះមកដល់វេលាម៉ោងប្រមាណ២រំលងអធ្រាត្រឈានចូលថ្ងៃទី១១ ខែមិថុនា ឆ្នាំ២០២៥ ពេលកំពុងដេកលង់លក់ ស្រាប់តែឮសំឡេងបាក់ស្រិបៗនិងញ័ររង្គើពេញផ្ទះ ហើយពេលចេញមកមើល ក៏ឃើញផ្ទះបាយ បង្គន់ រលំបាក់ចូលទឹកអស់ទៅហើយ ។
សមត្ថកិច្ចនិយាយថា គ្រោះបាក់ស្រុតដីនេះធ្វើឱ្យខូចខាតផ្ទះបាយចំនួន៥ បង្គន់ចំនួន៥ និងផ្ទះ១ខ្នងប្រេះហែកពាក់កណ្តាលផ្ទះ ។ ក្រោយកើតហេតុ ម្ចាស់ផ្ទះចំនួន៣គ្រួសារបានរុះរើផ្ទះទៅរកកន្លែងមានសុវត្ថិភាព និងនៅសល់ផ្ទះ២ម្ចាស់កំពុងជួសជុលរស់នៅបន្តកន្លែងដដែល ព្រោះគ្មានដីកន្លែងផ្សេងដើម្បីរស់នៅ ។
មុននេះ កាលពីថ្ងៃ១ ខែមិថុនា លំនៅឋានប្រជាពលរដ្ឋនៅភូមិបន្លិចប្រាសាទត្រើយខាងកើត ក្នុងឃុំបន្លិចប្រាសាទ ស្រុកពាមរក៍ចំនួន៣ខ្នង ក៏បានបាក់ស្រុតចូលក្នុងទន្លេដែរ ។ ប្រជាពលរដ្ឋដែលប្រឈមនឹងការបាក់ស្រុតផ្ទះនេះ ក៏មិនមានលទ្ធភាពទៅរកទីសុវត្ថិភាព ដើម្បីសង់ផ្ទះស្នាក់នៅនោះទេ ៕
ចែករំលែកព័តមាននេះ