ខេត្តកណ្តាល ៖ ស្ត្រីម្នាក់ជាភ្នាក់ងារចាត់ចែងល្បែងស៊ីសងខុសច្បាប់ (កត់ឆ្នោតវៀតណាម) ត្រូវបានកម្លាំងនគរបាលស្រុកកៀនស្វាយ ធ្វើការចុះបង្ក្រាបនិងឃាត់ខ្លួន ក្រោយបើកកត់ឆ្នោតវៀតណាម យ៉ាងគឃ្លើន ។ ការបង្ក្រាបនេះធ្វើឡើងនៅវេលាម៉ោង០៣និង៥០នាទីរសៀលថ្ងៃទី១០…
ខេត្តកណ្តាល ៖ ស្ត្រីម្នាក់ជាភ្នាក់ងារចាត់ចែងល្បែងស៊ីសងខុសច្បាប់ (កត់ឆ្នោតវៀតណាម) ត្រូវបានកម្លាំងនគរបាលស្រុកកៀនស្វាយ ធ្វើការចុះបង្ក្រាបនិងឃាត់ខ្លួន ក្រោយបើកកត់ឆ្នោតវៀតណាម យ៉ាងគឃ្លើន ។
ការបង្ក្រាបនេះធ្វើឡើងនៅវេលាម៉ោង០៣និង៥០នាទីរសៀលថ្ងៃទី១០ ខែឧសភា ឆ្នាំ២០២៥ ចំណុចភូមិព្រែកតាកែវ០២ ឃុំសំរោងធំ ស្រុកកៀនស្វាយ ខេត្តកណ្ដាល ។
សមត្ថកិច្ចស្រុកកៀនស្វាយ បានឱ្យដឹងថា ក្នុងប្រតិបត្តិការនេះ សមត្ថកិច្ចឃាត់ខ្លួនបានជនសង្ស័យម្នាក់ឈ្មោះ រឿន ស្រីរ័ត្ន ភេទស្រី អាយុ៣៣ឆ្នាំ ជនជាតិខ្មែរ មុខរបរកត់ឆ្នោត មានទីលំនៅ ភូមិព្រែកតាកែវ០២ ឃុំសំរោងធំ ស្រុកកៀនស្វាយ ខេត្តកណ្ដាល ។
ក្នុងនោះដកហូតបានវត្ថុតាងរួមមាន ៖ ទូរសព្ទដៃចំនួន០១គ្រឿងម៉ាក Redmi ពណ៌ទឹកសមុទ្រ, កន្ទុយសន្លឹកឆ្នោតចាក់រួច ចំនួន០៨សន្លឹក, ក្រដាសកាតុងមិនទាន់កត់លេខឆ្នោតចំនួន៤៣សន្លឹក, ក្រដាសប្រតិទិន កាត់រួច មិនទាន់កត់លេខឆ្នោត ចំនួន២៤សន្លឹក, ប៉ិចចំនួន០៤ដើម, ម៉ាស៊ីនគិតលេខចំនួន០១គ្រឿង, កាបូបស្ពាយចំនួន០១, ប្រាក់ខ្មែរ ចំនួន៣៧,៥០០រៀល និង សៀវភៅតក់លេខឆ្នោតចំនួន០៤ក្បាល ។
លោកបានបន្តទៀតថា មុននឹងឈានដល់ការបង្ក្រាបនេះ មានប្រជាពលរដ្ឋបានរាយការណ៍មកសមត្ថកិច្ចថា នៅចំណុចភូមិព្រែកតាកែវ០២ ឃុំសំរោងធំ មានការកត់ឆ្នោតវៀតណាម (កត់កន្ទុយលេខ) យ៉ាងគគ្រឹកគគ្រេង ។ ក្រោយទទួលបានព័ត៌មានភ្លាមៗ កម្លាំងព្រហ្មទណ្ឌស្រុកកៀនស្វាយ សហការ ជាមួយកម្លាំងប៉ុស្តិ៍ដីឥដ្ឋ បានចុះធ្វើការឃាត់ខ្លួនស្ត្រីជាអ្នកកត់ឆ្នោត និងដកហូតបានវត្ថុតាងមួយចំនួនធំ បញ្ជូនមកអធិការដ្ឋាននគរបាលស្រុកកៀនស្វាយ ដើម្បីធ្វើសាកសួរនាំ ។
នៅចំពោះមុខសមត្ថកិច្ចជនសង្ស័យបានសារភាពថា ខ្លួនបានកត់ឆ្នោតវៀតណាម អស់រយៈពេល០២ខែមកហើយ រហូតមកដល់បច្ចុប្បន្ន ក្នុង០១ថ្ងៃកត់ឆ្នោតបានប្រាក់ពី២០ម៉ឺនរៀល ទៅ៣០ម៉ឺនរៀល ដោយគិតទឹកក្នុង១ម៉ឺនរៀល បានទឹក១ពាន់រៀល ហើយទូទាត់លុយឱ្យមេ០៣ថ្ងៃម្តង ។
បច្ចុប្បន្ន ជនសង្ស័យរួមជាមួយវត្ថុតាង ត្រូវបានសមត្ថកិច្ចជំនាញស្រុកកៀនស្វាយ កំពុងកសាងសំណុំរឿងបញ្ជូនទៅកាន់តុលាការចាត់ការតាមនីតិវិធីផ្លូវច្បាប់ ៕
ចែករំលែកព័តមាននេះ