ទីក្រុងម៉ូស្គូ៖ ថ្មីៗនេះ គេដឹងថាលោកពូទីនបានអំពាវនាវឱ្យមានកិច្ចជំនួបផ្ទាល់ទល់មុខគ្នារវាងក្រុមអ្នកចរចាអ៊ុយក្រែន និងរុស្ស៊ីនៅទីក្រុងអ៊ីស្តាន់ប៊ូល ប្រទេសតួកគីនាថ្ងៃទី១៥ ខែឧសភាសប្ដាហ៍នេះដើម្បីរកវិធីបិទបញ្ចប់សង្គ្រាម។ លោកហ្សេឡិនស្គីក៏ឆ្លើយតបដោយប្រយ័ត្នប្រយែង និងឆ្លៀតអំពាវនាវត្រឡប់ទៅវិញថារុស្ស៊ីគួរណាស់ប្រកាសទទួលយកបទឈប់បាញ់ដ៏ពេញលេញ ដោយឥតលក្ខខណ្ឌ និងជាបន្ទាន់រយៈពេល៣០ថ្ងៃដើម្បីជាការបង្ហាញថាខ្លួនពិតជាមានឆន្ទៈបញ្ចប់សង្គ្រាម។
ក្រោយការអំពាវនាវរបស់លោកហ្សេឡិនស្គីមិនបានប៉ុន្មានផង រុស្ស៊ីពន្លះអ៊ុយក្រែនមួយអស់ដៃដោយបញ្ជូនយន្តហោះដ្រូនហោះងងឹតមេឃទៅវាយប្រហារទីក្រុងតូច-ធំនានា។ កងទ័ពអាកាសអ៊ុយក្រែនអះអាងថាដ្រូនជាង១រយគ្រឿងរបស់រុស្ស៊ីបានវាយប្រហារកាលពីយប់មិញបន្ទាប់ពីលោកពូទីនប្រកាសច្រានចោលសំណើរបស់ហ្សេឡិនស្គីតែបន្តិចប៉ុណ្ណោះ។
ប៉ុន្តែទ័ពអាកាសអ៊ុយក្រែនបញ្ជាក់នៅលើបណ្ដាញតេឡេក្រាមថាការប៉ុនប៉ងវាយប្រហារទាំងនោះត្រូវខ្លួនវាយរុញច្រានទៅវិញដោយប្រើប្រាស់ផ្គួបគ្នារវាងខែលការពារដែនអាកាស, កងឯកភាពប្រឆាំងនឹងសង្គ្រាមអេឡិចត្រូនិច និងកងកម្លាំងចល័តនៃក្រសួងការពារជាតិ។ សូមរំលឹកថាកាលពីម្សិលមិញ លោកពូទីនស្នើសុំឱ្យមានការចរចាផ្ទាល់ (មានន័យថាមិនចាំបាច់មានភាគីទីបីជាអ្នកសម្របសម្រួលទេ)។
តបនឹងការស្នើសុំនេះ លោកហ្សេឡិនស្គីបបួលលោកពូទីនជួបមុខគ្នាកម្រិតកំពូលដោយផ្ទាលតែម្ដង។ ហ្សេឡិនស្គីប្រកាសទុកជាមុនថាគាត់នឹងធ្វើដំណើរទៅតួកគីនៅថ្ងៃទី១៥ ខែឧសភា។ លោកចង់មានន័យថាបើពូទីនចិត្តសឿងគួរតែទៅជួបគ្នានៅតួកគី។ លោកពូទីនមិនបានបញ្ជាក់ថាលោកនឹងចូលរួមកិច្ចជំនួបនោះទេ។ ការអំពាវនាវឱ្យមានបទឈប់បាញ់ត្រូវលោកពូទីន និងក្រសួងការបរទេសឆ្លើយថាមិនទាន់អាចធ្វើទៅបានឡើយ លុះត្រាតែដោះស្រាយឫសគល់នៃសង្គ្រាមជាមុនសិន។
លោកពូទីនថ្លែងថាគម្រោងចរចាគ្នាលើកនេះអាចធ្វើឡើងដោយគ្មានបុរេលក្ខខណ្ឌ។ លោកបានដាក់ការស្ដីបន្ទោសថាកាលពីឆ្នាំ២០២២ ភាគីទាំង២បានឯកភាពទៅលើចំណុចមួយចំនួនរួចហើយ ហើយរុស្ស៊ីបន្តអនុវត្តយ៉ាងខ្ជាប់ខ្ជួន។ ប៉ុន្តែអ៊ុយក្រែនទៅវិញទេដែលដើរចេញពីតុចរចា (ចង់មានន័យថាស្ដាប់តាមការផ្លុំត្រចៀករបស់អឺរ៉ុប និងអាមេរិកកាលជំនាន់លោកបៃដិន)។
ដូច្នេះ បន្ថែមពីលើពាក្យសម្ដីរបស់លោកពូទីនបន្តិច ទីប្រឹក្សារបស់គាត់ប្រកាសកាលពីម្សិលមិញថារាល់ការចរចាគ្នាឡើងវិញនាពេលអនាគតត្រូវចាប់ផ្ដើមពីអ្វីដែលភាគីទាំង២បានឯកភាពគ្នាជាគោលៗកាលពីឆ្នាំ២០២២។ កាលនោះ ទីប្រឹក្សារូបនេះអះអាងថាអ៊ុយក្រែនយល់ព្រមប្រកាន់ជំហរអព្យាក្រឹត-ឥតចូលបក្សសម្ព័ន្ធ និងយល់ព្រមកាត់ទឹកដីរបស់ខ្លួនទៅឱ្យរុស្ស៊ី។
ជាថ្នូរត្រឡប់មកវិញ រុស្ស៊ីធានាមិនប៉ះពាល់អ៊ុយក្រែនតទៅទៀត។ លោកពូទីនថ្លែងថាយើងពិតជាតាំងចិត្តមោះមុតនៅក្នុងការចរចាគ្នាលើកនេះ (មានន័យថាមិននិយាយលេងសើច ឬនិយាយឱ្យតែរួចពីមាត់ទេ)។ ចំពោះបទឈប់បាញ់ លោកមិនជំទាស់ទេ។ ប៉ុន្តែក៏មិនគួរនិយាយនៅពេលនេះដែរ។ ចាំជួបគ្នានៅតួកគីជាមុនសិនចាំនិយាយគ្នា។ ដូច្នេះ ប្រទេសទាំង២ប្រហែលជាគេចមិនផុតពីសេណារីយោវាយគ្នាផង និងចរចាគ្នាផងនោះទេ។ នេះបើតាមប្រភពពីអេភី (AP) និងប្រភពដទៃទៀត៕
ចែករំលែកព័តមាននេះ