រាជធានីភ្នំពេញ ៖ សម្រាប់រាត្រីថ្ងៃអាទិត្យ ទី១១ ឧសភានេះ នៅលើផ្លូវថ្មើរជើង (Walk Street) អ្វីដែលជាការកត់សំគាល់ មានការប្រគុំតន្ត្រីខ្នាតតូចរបស់ផលិតកម្មហង្សមាស…
រាជធានីភ្នំពេញ ៖ សម្រាប់រាត្រីថ្ងៃអាទិត្យ ទី១១ ឧសភានេះ នៅលើផ្លូវថ្មើរជើង (Walk Street) អ្វីដែលជាការកត់សំគាល់ មានការប្រគុំតន្ត្រីខ្នាតតូចរបស់ផលិតកម្មហង្សមាស និងការសម្ដែងល្ខោនខោល រឿង រាមកេរ្តិ៍ (ដកស្រង់ត្រង់ឈុតចម្បាំងវ៉ៃរាពណ៍) សម្តែងដោយសិល្បករ មន្ទីរវប្បធម៌ និងវិចិត្រសិល្បៈរាជធានីភ្នំពេញ នៅមុខវត្តឧណ្ណាលោម ខណ្ឌដូនពេញ បន្ថែមការទាក់ទាញអ្នកដើរកម្សាន្តមកទស្សនាយ៉ាងច្រើន ។
បើតាមលោកស្រី ដោ សម្ផស្ស នាយករងរដ្ឋបាល និងជាអ្នកនាំពាក្យសាលារាជធានីភ្នំពេញ បានឱ្យដឹងថា សម្រាប់សប្តាហ៍នេះ នៅលើផ្លូវថ្មើរជើង (Walk Street) អ្វីដែលថ្មី គឺនៅរាត្រីថ្ងៃអាទិត្យ ទី១១ ឧសភានេះ មានការប្រគុំតន្ត្រីខ្នាតតូចរបស់ផលឹតកម្មហង្សមាស និងមានការសម្ដែងល្ខោនខោល រឿង រាមកេរ្តិ៍ (ដកស្រង់ត្រង់ឈុតចម្បាំងវ៉ៃរាពណ៍) សម្តែងដោយសិល្បករ មន្ទីរវប្បធម៌ និងវិចិត្រសិល្បៈ រាជធានីភ្នំពេញ ។
ផ្លូវថ្មើរជើង (Walk Street) គិតមកដល់ថ្ងៃទី១១ ឧសភានេះ មានអាយុ១៣សប្តាហ៏ និងមានរយៈពេលជាង៣ខែមកហើយ ដែលទទួលបានការពេញនិយមពីប្រជាពលរដ្ឋកម្ពុជា និងទេសចរបរទេសមកកម្សាន្ដ និងរាំលេងកាន់តែច្រើនឡើង បើទោះបីខែនេះក្រោមភ្លៀង រលឹមខ្លះក្ដី ហើយមានប្រជាប្រិយ៏ភាពយ៉ាងខ្លាំងពីមួយសប្តាហ៏ ទៅមួយសប្តាហ៏ រហូតទទួលបានការកោតសរសើរពីសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ជាញឹកញ៉ាប់ ដែលបង្ហាញពីការខិតខំប្រឹងប្រែងអនុវត្តផ្ទាល់ពីលោក ឃួង ស្រេង អភិបាល នៃគណៈអភិបាលរាជធានីភ្នំពេញ ។ ឆ្លងតាមរយៈប្រជាប្រិយ៏ភាពយ៉ាងខ្លាំង នៃផ្លូវថ្មើរជើង (Walk Street) នេះដែរ បានធ្វើឱ្យរាជធានីភ្នំពេញមួយនេះ ជាប់ចំណាក់ថ្នាក់លេខ២ លើពិភពលោក ឈ្មោះថា ជា«ទីក្រុងប្រជុំដោយភាពរីករាយនៅពេលរាត្រី» ៕
ចែករំលែកព័តមាននេះ