ខេត្តព្រះសីហនុ ៖ ក្រុមគ្រូពេទ្យស្ម័គ្រចិត្តរបស់សមាគមគ្រូពេទ្យអ៊ិស្លាមកម្ពុជា ដឹកនាំដោយលោកវេជ្ជបណ្ឌិតសុះ មុះសិន ជាប្រធានសមាគម និងជារដ្ឋលេខាធិការក្រសួងធម្មការ និងសាសនាបានពិនិត្យព្យាបាលប្រជាពលរដ្ឋក្រីក្ររស់នៅស្រុកព្រៃ នប់ ខេត្តព្រះសីហនុ។
ខេត្តព្រះសីហនុ ៖ ក្រុមគ្រូពេទ្យស្ម័គ្រចិត្តរបស់សមាគមគ្រូពេទ្យអ៊ិស្លាមកម្ពុជាដឹកនាំដោយលោកវេជ្ជបណ្ឌិតសុះ មុះសិន ជាប្រធានសមាគម និងជារដ្ឋលេខាធិការក្រសួងធម្មការ និងសាសនាបានពិនិត្យព្យាបាលប្រជាពលរដ្ឋក្រីក្ររស់នៅស្រុកព្រៃនប់ ខេត្តព្រះសីហនុ។
ការពិនិត្យ និងព្យាបាលនេះមានការសហការជាមួយសមាគមសប្បុរសធម៌ដើម្បីអភិវឌ្ឍន៍កម្ពុជា និងសមាគមសម្របសម្រួលសង្គមនៃប្រទេសគុយវ៉ែត។ នៅក្នុងឱកាសនោះមានការអញ្ជើញចូលរួមពីវេជ្ជបណ្ឌិតសាន់ សាប់អ៊ី អនុរដ្ឋលេខាធិការក្រសួងសុខាភិបាល និងក្រុមគ្រូពេទ្យស្ម័គ្រចិត្តជាច្រើននាក់។ លោកវេជ្ជបណ្ឌិតសុះ មុះសិន ឱ្យដឹងថា ការពិនិត្យព្យាបាលរយៈពេល២ថ្ងៃ គឺថ្ងៃទី២ និងទី៣ ខែកក្កដា ដោយក្រុមគ្រូពេទ្យពិនិត្យព្យាបាលជំងឺទូទៅ ជំងឺកុមារ រោគស្ត្រី ព្យាបាលធ្មេញ និងធ្វើខតាន់(កាត់ស្បែកសំអាតលិង្គក្មេងប្រុសអ៊ិស្លាម)។
លោកវេជ្ជបណ្ឌិតសុះ មុះសិន បន្តទៀតថា នៅថ្ងៃទី២ ខែកក្កដា ក្រុមគ្រូពេទ្យស្ម័គ្រចិត្តបានទៅភូមិអូរត្រាវ ភូមិបន្ទាយប្រីយ៍ ព្រៃនប់ ទួលទទឹង និងភូមិចុងខ្សាច់ ស្រុកព្រៃនប់ ពិនិត្យ និងព្យាបាលជំងឺទូទៅបាន១២៧នាក់ ព្យាបាលធ្មេញបានចំនួន៣៩នាក់ ពិនិត្យព្យាបាលរោគស្ត្រីចំនួន៤៨នាក់ ព្យាបាលជំងឺកុមារបានចំនួន៤៧នាក់ និងធ្វើខតាន់ កាត់ស្បែកសំអាតលិង្គក្មេងប្រុស បានចំនួន៣៨នាក់ ។ ថ្ងៃទី៣ ខែកក្កដា ពិនិត្យព្យាបាលប្រជាពលរដ្ឋក្រីក្រក្នុងភូមិដូនលយ ភូមិបឹងតាព្រហ្ម អូរជ្រៅ និងភូមិបឹងកាស្រី ដោយពិនិត្យព្យាបាលជំងឺទូទៅបានចំនួន១៤៨នាក់ រោគស្ត្រីចំនួន៥៧នាក់ព្យាបាលធ្មេញចំនួន២៩នាក់ ព្យាបាលកុមារចំនួន៤៤នាក់ និងធ្វើខតាន់ចំនួន៥៨នាក់។ ក្រៅពីពិនិត្យ និងព្យាបាលក៏មានការបញ្ចាំងស្លាយពីការការពារសុខភាព និងចែកខិត្តប័ណ្ណអប់រំសុខភាពជូនដល់ប្រជាពលរដ្ឋផងដែរ។
លោកវេជ្ជបណ្ឌិតសុះ មុះសិន ឱ្យដឹងថា រាជរដ្ឋាភិបាលកម្ពុជាក្រោមការដឹកនាំរបស់សម្តេចអគ្គមហាសេនាបតីតេជោហ៊ុន សែន យកចិត្តទុកដាក់យ៉ាងខ្លាំងចំពោះសុខភាពរបស់ប្រជាពលរដ្ឋ ហើយបង្កើតឱ្យមានមណ្ឌលសុខភាព ឬប៉ុស្តិ៍សុខភាពរហូតដល់ទីជនបទ កៀកផ្ទះប្រជាពលរដ្ឋដើម្បីជួយសំរួលដល់ការលំបាក និងកាត់បន្ថយអត្រាស្លាប់របស់មាតា និងទារក ឬជំងឺឆ្លងនានា។
លោកវេជ្ជបណ្ឌិត សុះ មុះសិន បានណែនាំដល់ប្រជាពលរដ្ឋជួយសំអាតលំនៅឋាន ថ្លុក សំរាម និងដាក់មុងឱ្យក្មេង ព្រោះអាចបណ្តាលឱ្យកើតមានជំងឺគ្រុនឈាម ដោយអនុវត្តឱ្យបានខ្ជាប់ខ្ជួនតាមពាក្យស្លោក ហូបស្អាត រស់នៅស្អាត ផឹកស្អាត។ លោកវេជ្ជបណ្ឌិតបានណែនាំប្រជាពលរដ្ឋដែលមានបញ្ហាសុខភាពត្រូវប្រញាប់រួសរាន់ទៅមណ្ឌលសុខភាព ឬមន្ទីរពេទ្យចៀសវាងជំងឺកាន់តែធ្ងន់ធ្ងរអាចបណ្តាលឱ្យគ្រោះថ្នាក់ដល់អាយុជីវិត។
លោកវេជ្ជបណ្ឌិតបញ្ជាក់ថា សមាគមគ្រូពេទ្យអ៊ិស្លាមកម្ពុជាសហការជាមួយសមាគមសប្បុរសធម៌ដើម្បីអភិវឌ្ឍន៍កម្ពុជា និងសមាគមសម្របសម្រួលសង្គមនៃប្រទេសគុយវ៉ែតបន្តដឹកនាំក្រុមគ្រូពេទ្យស្ម័គ្រចិត្តពិនិត្យ និងព្យាបាលជូនប្រជាពលរដ្ឋក្រីក្រនៅតាមតំបន់នានាបន្តទៀត ៕
ចែករំលែកព័តមាននេះ