អបិយជំនឿជាផ្នែកមួយនៃអរិយធម៌ក៏ដូចជាវប្បធម៌របស់ជាតិសាសន៍នីមួយៗនៅលើពិភពលោកនេះ។ ប៉ុន្តែនៅកម្ពុជានាពេលបច្ចុប្បន្ននេះ ហាក់ដូចជាជ្រុលបន្តិចហើយ ដោយសំបូរអ្នកដែលតាំងខ្លួនជាអ្នកមានបារមី ឫមានកម្លាំងអរូបិយ។ ទន្ទឹមនឹងនោះក៏មានអ្នកដែលរងគ្រោះដោយសារតែអបិយជំនឿនេះកាន់តែច្រើនផងដែរ ទាំងរាស្ត្រអ្នកក្រីក អ្នកមាន ក៏ដូចជា មន្ត្រី…
អបិយជំនឿជាផ្នែកមួយនៃអរិយធម៌ក៏ដូចជាវប្បធម៌របស់ជាតិសាសន៍នីមួយៗនៅលើពិភពលោកនេះ។ ប៉ុន្តែនៅកម្ពុជានាពេលបច្ចុប្បន្ននេះ ហាក់ដូចជាជ្រុលបន្តិចហើយ ដោយសំបូរអ្នកដែលតាំងខ្លួនជាអ្នកមានបារមី ឫមានកម្លាំងអរូបិយ។ ទន្ទឹមនឹងនោះក៏មានអ្នកដែលរងគ្រោះដោយសារតែអបិយជំនឿនេះកាន់តែច្រើនផងដែរ ទាំងរាស្ត្រអ្នកក្រីក អ្នកមាន ក៏ដូចជា មន្ត្រី ។ល។
ជាក់ស្តែងការបែកបាក់នៃជីវិតជាគូរបស់តារាចម្រៀងដ៏ល្បីមួយរូប គឺអ្នកនាង មាស សុខសោភ ក៏កំពុងតែខ្ទរខ្ទារនៅលើបណ្តាញសង្គមក៏ត្រូវបានបើកកកាយឡើងមកថា វាមានពាក់ព័ន្ធនឹងរឿង អបិយជំនឿនេះផងដែរ ។
ជីវិតជាគូរវាងអ្នកនាង មាស សុខសោភា និងស្វាមី ដែលគេស្គាល់ថា លោក អ៊ិត រ៉ាដា ដែលមានអាយុកាលប្រមាណជា ១៨ ឆ្នាំ ពោលគឺចាប់ពីឆ្នាំ២០០៧ ដល់ ឆ្នាំ២០២៥ បានឈានដល់ទីបញ្ចប់ ត្រូវបានគេចែកចាយថាពាក់ព័ន្ធនឹងរឿងអបិយជំនឿនេះឯង ។
រឿងនេះកំពុងតែជជែកគ្នាឡើងវល់ហើយនៅលើបណ្តាញសង្គម ដោយលោក អ៊ិត រ៉ាដា បានសម្រេចចិត្តដើរចេញពីតំណែងអគ្គនាយកផលិតកម្ម Camtrax Music ហើយបានលើកឡើងថា បញ្ហាគឺដោយសារតែ តារាចម្រៀង មាស សុខសោភា ជឿលើ បុរសម្នាក់ ដែលអះអាងថា រូបគេគឺជាតាបស់សក់សភ្នំត្បែង ដោយតារាចម្រៀងរូបនោះបានចំណាយប្រាក់ រហូតដល់ទៅ ២៣ ម៉ឺនដុល្លារ លើតាបស់ រូបនោះថែមទៀត ។
ក្រោយមក តារាចម្រៀង មាស សុខសោភា ក៏បានចេញមកបកស្រាយមកវិញថា លុយដែលនាងចាយគឺជាសិទ្ធិរបស់នាង ពីព្រោះលុយនោះគឺជាលុយដែលនាងខំច្រៀងខំរក ហើយក៏លើកឡើងថា លោក អ៊ិត រ៉ាដា បានរស់នៅដោយសារតែនាងជាច្រើនឆ្នាំមកហើយ ។
រឿងបែកបាក់របស់អ្នកទាំងពីរវាអាចមានរឿងស៊ីជម្រៅផ្សេងៗទៀត ប៉ុន្តែយើងខ្ញុំសុំមិនចូលស៊ី ជម្រៅលើរឿងនេះទេ ។ អ្វីដែលយើងចង់និយាយចង់ពិភាក្សានៅពេលនេះគឺពាក់ព័ន្ធនឹងបញ្ហា អបិយជំនឿ និង ផលរបស់វានៅក្នុងសង្គមកម្ពុជា ។
ក្រៅពីអ្នកនាង មាស សុខសោភា នៅក្នុងសង្គមកម្ពុជាក៏នៅមានអ្នកដែលមានជំនឿលើអបិយជំនឿ ជឿអ្នកសច្ចំ ជឿលើបារមី នេះជាច្រើនទៀត ដោយអ្នកដែលគេជឿគេការពារជំនឿ និង ការការពារការគិតរបស់គេ ប៉ុន្តែទន្ទឹមនឹងនោះក៏មានអ្នកដែលរិះគន់ខ្លះៗផងដែរ ។
ពាក់ព័ន្ធនឹងបញ្ហាអបិយជំនឿ ក៏ដូចជា បារមី អីនេះ លោក បណ្ឌិត គិន ភា ប្រធានវិទ្យាស្ថានទំនាក់ទំនងអន្តរជាតិកម្ពុជា នៃរាជបណ្ឌិត្យសភាកម្ពុជា បានបង្ហោះសារខ្លីមួយនៅលើបណ្តាញសង្គមផ្ទាល់ របស់លោកដោយខ្លីថា វាគឺជារបរកាក់កប់ខ្លាំងមួយនៅក្នុងសង្គមកម្ពុជាបច្ចុប្បន្ន ។
លោកបណ្ឌិតមិនបានវិភាគឲ្យស៊ីជម្រៅអ្វីឡើយ ដោយគ្រាន់តែបង្ហោះដោយខ្លីថា ” រាស្ត្រក៏ជឿបារមី មន្ត្រីក៏ជឿបារមី អ្នកក្រក៏ជឿបារមី កុដុម្ពីសេដ្ឋីក៏ជឿបារមី, ដូច្នេះបារមីជារបរកាក់កបខ្លាំងក្នុងសង្គម យើងបច្ចុប្បន្ន! ” ។
ក្រៅពីលោកបណ្ឌិត គិន ភា ក៏មានអ្នកបញ្ចេញយោបល់ផ្សេងៗទៀតជាច្រើនលើបញ្ហា អបិយជំនឿនេះ ។ នៅក្នុងចំណោមនោះអ្នកដែលមានជំនឿគេក៏ការពារការជឿរបស់គេ ប៉ុន្តែជាទូទៅចេញមក ពីមជ្ឈដ្ឋានបញ្ញាវ័ន្ត គឺបានលើកឡើងថា មនុស្សដែលជឿលើសភាវៈក្រៅខ្លួន គឺដោយសារតែការបាត់បង់នូវជំនឿលើខ្លួនឯង ។
តាមវប្បធម៌ខ្មែរអបិយជំនឿក៏មិនជាអាក្រក់ដែរ ពោលគឺថាអាក្រក់ឫល្អវាអាស្រ័យទៅលើ អន្តរកម្មនៃបុគ្គលដែលប្រតិបត្តិឫអ្នកដែលតាំងខ្លួនគឺជាអ្នកដែលមានបារមី និង អ្នកដែលជឿដែលជា មនុស្សបុថុជ្ជនជននានា។
អ្នកដែលតាំងខ្លួនជាអ្នកបារមីនោះ ប្រសិនបើគេគឺជាតាបស ជាព្រឹទ្ធាចារ្យ ជាបុគ្គលដែលមានសទ្ធាដើម្បីកុសល និងចម្លងមនុស្សដើម្បីអំពើល្អ គឺគេអាចតម្រែតម្រង់ អ្នកដែលជាមនុស្សបុថុជ្ជន ដែលជឿឲ្យក្លាហាន និង ខំប្រឹង ក៏ដូចជាពុះពារនិងតស៊ូ គ្រប់ បែបយ៉ាងដើម្បីឈានទៅសម្រេចជោគជ័យ ។ ប៉ុន្តែបុគ្គលនោះ បើជាជនអាក្រក់គិតអំពីផល ប្រយោជន៍ ក៏ព្យាយាមបញ្ចុះបញ្ចូល អន្ទង តម្រែតម្រង់រកប្រយោជន៍តាមបំណងដែលខ្លួនចង់បាន ។
នៅក្នុងស្ថានភាពបែបនេះ យើងគ្រប់គ្នានៅក្នុងនាមជាមនុស្សបុថុជ្ជន គួរតែប្រើសតិ បញ្ញា និង ចំណេះដែលបានមកពីការរៀនសូត្រមកថ្លឹងមកថ្លែងវិភាគឲ្យគ្រប់ មុននឹងសម្រេចចិត្ត ។ កុំចេះតែជឿស្លុងតាមសម្តីរបស់បុគ្គលដែលតាំងខ្លួនជាអ្នកមានបរមីទាំងនោះទាំងអស់ ។ កន្លែងណាជឿបានក៏ជឿទៅ ហើយប្រែក្លាយការជឿនោះទៅជាការខំប្រឹងរៀន ខំប្រឹងរក ខំប្រឹងអនុវត្ត ដោយផ្សារភ្ជាប់នឹងសីលធម៌និងច្បាប់សង្គមផងដែរ ។ កុំជឿដោយល្ងិតដោយល្ងង់ ករណីដែលជឿបែបនោះ វាគឺជាបច្ច័យមួយដែលអាចនាំមកនូវសេចក្តីអន្តរាយនិងវិនាសដល់ខ្លួន៕
ចែករំលែកព័តមាននេះ