ទីក្រុងកៀវ៖ ថ្នាក់ដឹកនាំប្រទេសធំៗនៅទ្វីបអឺរ៉ុបបង្ហាញការគាំទ្រដោយឥតងាករេចំពោះសំណើសុំឱ្យមានបទឈប់បាញ់រយៈពេល៣០ថ្ងៃ។ លោកត្រាំក៏ប្រកាសគាំទ្រសំណើនេះផងដែរ។ ទន្ទឹមនឹងនោះ ពួកអឺរ៉ុបក៏ព្រមានផងដែរថាពួកគេនឹងចាត់វិធានការក្ដៅទៅលើប្រទេសរុស្ស៊ីដោយបន្ថែមទណ្ឌកម្មសេដ្ឋកិច្ចកាន់តែខ្លាំង។ នេះក៏ជាអ្វីដែលលោកត្រាំទើបតែនិយាយកាលពីថ្ងៃសុក្របន្ទាប់ពីលោកសន្ទនាគ្នាតាមទូរស័ព្ទជាមួយលោកហ្សេឡិនស្គី។
ថ្នាក់ដឹកនាំអង់គ្លេស បារាំង អាល្លឺម៉ង់ ប៉ូឡូញ និងអ៊ុយក្រែនបានលើកឡើងថាគួរណាស់មានឈប់បាញ់ចាប់ពីថ្ងៃទី១២ ខែឧសភាតទៅ។ អស់លោកទាំងនោះថ្លែងដូច្នេះនៅក្នុងកិច្ចប្រជុំពិសេសមួយនៅរដ្ឋធានីកៀវជាទីកន្លែងដែលពួកគេប្រមូលផ្ដុំគ្នាដើម្បីបង្ហាញការគាំទ្រចំពោះអ៊ុយក្រែន។ នៅពេលនោះ ពួកគេក៏បានសន្ទនាគ្នាតាមទូរស័ព្ទជាមួយលោកត្រាំផងដែរ។
នាយករដ្ឋមន្ត្រីអង់គ្លេស លោកខៀស្តាមើ (Keir Starmer) ថ្លែងថាពួកយើងមានវត្តមាននៅទីនោះរួមជាមួយលោកត្រាំផងដែរសូមអំពាវនាវឱ្យលោកពូទីនឆ្លើយតបទៅនឹងការអំពាវនាវឱ្យមានបទឈប់បាញ់។ លោកស្តាមើថ្លែងថាបើលោកពូទីនពិតជាមានជំហរច្បាស់លាស់នៅក្នុងបញ្ហានេះមែន គាត់គួរណាស់ប្រកាសប្រាប់ពិភពលោកឱ្យបានច្បាស់ៗនៅក្នុងពេលនេះ។ លោកស្តាមើយល់ថាគេមិនគួរយកលេសនេះ ឬលេសនោះដោយប្រើពាក្យថា «បើសិន» និង «ក៏ប៉ុន្តែ» តទៅទៀតទេ។
ក្រោយការអំពាវនាវរបស់ថ្នាក់ដឹកនាំអឺរ៉ុបដូចខាងលើនេះមិនយូរប៉ុន្មាន វិមានក្រឹមឡាំងបានបញ្ចេញប្រតិកម្មតបទៅវិញបែបអវិជ្ជមាន និងការចម្អកឡកឡឺយ។ លោកប៉េស្កូស (Peskov) ថ្លែងថាយើងស្ដាប់ឮសេចក្ដីថ្លែងការណ៍ដ៏ចម្រូងចម្រាសរបស់ពួកអឺរ៉ុប។ ពួកគេហាក់ដូចជាចង់មានបញ្ហាជាមួយគ្នា (រុស្ស៊ី) ជាជាងចង់ល្អនឹងគ្នា។ រឿងមានតែប៉ុណ្ណឹង គ្មានអ្វីថ្មីទេ។
តាមពិត ក្រុមបស្ចិមប្រទេសដាក់ទណ្ឌកម្មរុស្ស៊ីជាបន្តបន្ទាប់ចាប់តាំងពីផ្ទុះសង្គ្រាមអ៊ុយក្រែន។ ប៉ុន្តែចំណុចដែលគេចាប់អារម្មណ៍នៅត្រង់ថាពួកគេចាប់ផ្ដើមរួបរួមសាមគ្គីគ្នាឡើងវិញ (រវាងអឺរ៉ុប និងអាមេរិក) បន្ទាប់ពីមានបញ្ហារអាក់រអួលខ្លះៗដោយសារនយោបាយរបស់លោកត្រាំ។ នៅសុខៗលោកដំឡើងពន្ធទៅលើក្រុមសម្ព័ន្ធមិត្តនៅទ្វីបអឺរ៉ុប និងបានផាត់អឺរ៉ុបចេញពីការចរចា។
ប្រភពខ្លះយល់ថាទីក្រុងវ៉ាស៊ីនតោនហាក់ដូចជាចង់ជួសជុលភាពទំនាក់ទំនងជាមួយសម្ព័ន្ធមិត្តចាស់បន្ទាប់ពីអាមេរិកបញ្ជូនប្រេសិតពិសេសទៅជួបសន្ទនាគ្នាជាមួយរុស្ស៊ីមើលទៅបែបពិបាកនិយាយគ្នា, បន្ទាប់ពីលោកត្រាំប្រើភាសាទ្រគោះបោះបោកដាក់លោកហ្សេឡិនស្គីនៅសេតវិមាន និងបន្ទាប់ពីអាមេរិកកាត់ផ្ដាច់ជំនួយយោធា និងព័ត៌មានសម្ងាត់ទៅឱ្យអ៊ុយក្រែន។ ជាពិសេស គេកត់សម្គាល់ថាត្រាំចាប់ផ្ដើមកែប្រែចរិតរបស់គាត់បន្ទាប់ពីអាមេរិក និងអ៊ុយក្រែនចុះហត្ថលេខាលើកិច្ចព្រមព្រៀងរ៉ែកម្រ៕
ចែករំលែកព័តមាននេះ