រាជធានីភ្នំពេញ ៖ ឧប្បត្តិហេតុគ្រោះថ្នាក់ចរាចរណ៍មួយបានកើតឡើងបណ្ដាលឲ្យស្ត្រីម្នាក់របួសធ្ងន់ និងកូនស្រីរបស់គាត់ រងរបួសស្រាល ខណៈជនរងគ្រោះ ជិះម៉ូតូម៉ាក Honda PCX ១គ្រឿង…
រាជធានីភ្នំពេញ ៖ ឧប្បត្តិហេតុគ្រោះថ្នាក់ចរាចរណ៍មួយបានកើតឡើងបណ្ដាលឲ្យស្ត្រីម្នាក់របួសធ្ងន់ និងកូនស្រីរបស់គាត់ រងរបួសស្រាល ខណៈជនរងគ្រោះ ជិះម៉ូតូម៉ាក Honda PCX ១គ្រឿង បត់ឆ្វេងឆ្លងផ្លូវ ស្រាប់តែមានរថយន្តដឹកទឹកកក ១គ្រឿង ទៅដល់បុកពីក្រោយពេញទំហឹង បណ្ដាលឲ្យដួលបោកផ្ទប់ថ្នល់ ។
ឧប្បត្តិហេតុនោះ បានកើតឡើងកាលពីវេលាម៉ោង១១និង៣៥នាទីព្រឹកថ្ងៃទី៩ ខែឧសភា ឆ្នាំ២០២៥ នៅតាមមហាវិថីចោមចៅ ហៅផ្លូវវ៉េងស្រេង ស្ថិតនៅក្នុងភូមិជ្រៃកោង សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ ។
ស្ត្រីរងគ្រោះមិនត្រូវបានស្គាល់អត្តសញ្ញាណនោះទេ គាត់ជិះម៉ូតូ ១គ្រឿង ម៉ាក Honda PCX ពណ៌ស ពាក់ស្លាកលេខ ភ្នំពេញ 1GQ-7413 ដោយឡែករថយន្តដឹកទឹកកក ម៉ាកហ៊ីយ៉ាន់ដាយ ពណ៌ស ពាក់ស្លាកលេខ ក-7295 ភព3 បើកបរដោយបុរសម្នាក់ ។
សាក្សីម្នាក់បាននិយាយថា នៅមុនពេលកើតហេតុ គាត់បានឃើញស្ត្រីរងគ្រោះជិះម៉ូតូ ឌុបកូនស្រី ធ្វើដំណើរក្នុងទិសដៅពីកើតទៅលិច លុះពេលទៅដល់ត្រង់ចំណុចកើតហេតុ បានបត់ឆ្វេងឆ្លងផ្លូវ។ ខណៈនោះក៏ត្រូវរថយន្តដឹកទឹកកកខាងលើ បើកបរក្នុងទិសដៅស្របគ្នាទៅដល់បុកពីក្រោយ ពេញទំហឹងបណ្ដាលឲ្យដួលបោកផ្ទប់ថ្នល់ ហើយស្ត្រីរូបនោះរងរបួសធ្ងន់ ចំណែកកូនស្រីរបួសស្រាល ។
ប្រភពដដែលបានប្រាប់ទៀតថា ក្រោយពេលកើតហេតុជនរងគ្រោះខាងលើ ត្រូវបានក្រុមសង្គ្រោះអង្គភាព៧១១ ដឹកយកទៅសង្គ្រោះនៅមន្ទីរពេទ្យព្រះកុសុមៈ។ បន្ទាប់មក នគរបាលចរាចរណ៍ខណ្ឌពោធិ៍សែនជ័យ បានចុះទៅធ្វើការវាស់វែង រួចនាំយករថយន្ត និងម៉ូតូ ទៅរក្សាទុករង់ចាំការដោះស្រាយនៅពេលក្រោយ ៕
ចែករំលែកព័តមាននេះ