ខេត្តកំពង់ឆ្នាំង ៖ ក្រុមការងារចម្រុះថ្នាក់ខេត្ត និងអាជ្ញាធរស្រុកបរិបូណ៌ បានចុះណែនាំពលរដ្ឋជាម្ចាស់បែចិញ្ចឹមត្រី ចំនួន២៧ខ្នង មានប្រក់ដំបូលបណ្ដែតនៅលើទឹកទន្លេដែលធ្វើឲ្យប៉ះពាល់ដល់បរិស្ថានទឹក ឱ្យរុះរើបែហ្នឹងចេញ នៅក្នុងភូមិសាស្ត្រឃុំឆ្នុកទ្រូ ស្រុកបរិបូណ៌…
ខេត្តកំពង់ឆ្នាំង ៖ ក្រុមការងារចម្រុះថ្នាក់ខេត្ត និងអាជ្ញាធរស្រុកបរិបូណ៌ បានចុះណែនាំពលរដ្ឋជាម្ចាស់បែចិញ្ចឹមត្រី ចំនួន២៧ខ្នង មានប្រក់ដំបូលបណ្ដែតនៅលើទឹកទន្លេដែលធ្វើឲ្យប៉ះពាល់ដល់បរិស្ថានទឹក ឱ្យរុះរើបែហ្នឹងចេញ នៅក្នុងភូមិសាស្ត្រឃុំឆ្នុកទ្រូ ស្រុកបរិបូណ៌ ។ នេះយោងតាមបញ្ជារបស់ឯកឧត្តម ស៊ុន សុវណ្ណារិទ្ធិ ប្រធានគណៈបញ្ជាការឯកភាពរដ្ឋបាលខេត្តកំពង់ឆ្នាំង នៅព្រឹកថ្ងៃទី០៨ ខែឧសភា ឆ្នាំ២០២៥ ។
លោក ផល ភាព អភិបាលរងស្រុកបរិបូរណ៍ និងលោកឧត្តមសេនីយ៍ត្រី កេត យ៉ុង ស្នង ការរងនគរបាលខេត្តកំពង់ឆ្នាំង ដឹកនាំក្រុមការងារចម្រុះបានឲ្យដឹងថា ការអនុវត្តខាងលើនេះ យោងតាមបទបញ្ជារបស់ឯកឧត្តមស៊ុន សុវណ្ណារិទ្ធិ ប្រធានគណៈបញ្ជាការឯកភាពរដ្ឋបាលខេត្ត និងជាអភិបាលខេត្តកំពង់ឆ្នាំង ក្រុមការងារចម្រុះរួមមាន នគរបាលខេត្ត អធិការនគរបាលស្រុក កងរាជអាវុធហត្ថស្រុក តំបន់ប្រតិបត្តិការសឹករងស្រុក អាជ្ញាធរស្រុកបរិបូរណ៍ និងអាជ្ញាធរឃុំឆ្នុកទ្រូ បានចុះផ្សព្វផ្សាយផែនការរុះរើបែចិញ្ចឹមត្រី ដែលបណ្ដែតលើទឹកចេញពីទន្លេ ដែលមានផលប៉ះពាល់យ៉ាងធ្ងន់ធ្ងរដល់បរិស្ថានទឹក ។
ក្នុងការផ្សព្វផ្សាយនេះដែរ ក្រុមការងារបានជូនដំណឹងឲ្យពួកគាត់រុះរើបែចេញដោយខ្លួនឯង តាមផែនការរបស់គណៈបញ្ជាការឯកភាពរដ្ឋបាលខេត្ត ។ ប៉ុន្តែបើម្ចាស់មិនរុះរើទេក្រុមការងារចម្រុះ និងអនុវត្តវិធានការរដ្ឋបាល ដោយប្រើប្រាស់កម្លាំងចម្រុះចុះរុះរើបែបណ្ដែតលើទឹកចោល ដោយមិនទទួលខុសត្រូវការខូចខាតបែកបាក់នោះឡើយ ។
លោក ផល ភាព បានបញ្ជាក់ឲ្យដឹងទៀតថា តាមការពិតវិធានការខាងលើនេះគណៈបញ្ជាការឯកភាពរដ្ឋបាលខេត្ត បានអនុវត្តផែនការបន្លាស់ទីផ្ទះបណ្ដែតលើទឹកនេះ តាំងពីឆ្នាំ២០១៨ មកម្ល៉េះ ដោយមិនអនុញ្ញាតឲ្យមានផ្ទះបណ្ដែតលើទឹកឬបែនោះឡើយ ។
ករណីដែលមានបែប្រក់ដំបូលបណ្ដែតលើទឹកទន្លេខាងលើនេះ មានចំនួន១១ បែខ្នងនៅក្នុងប្រឡាយទឹកក្នុងភូមិឆ្នុកទ្រូ និង១៦ ខ្នងទៀត នៅចំណុចកោះក្រមុំក្នុងភូមិកំពង់ព្រះ ។
ក្រុមការងារចម្រុះ សូមអំពាវនាវដល់បងប្អូនប្រជាពលរដ្ឋម្ចាស់បែសហការរុះរើបែចេញឲ្យអស់ពីផ្ទៃទឹកទន្លេដោយខ្លួនឯង តាមផែនការខាងលើនេះជៀសវាងក្រុមការងារចម្រុះចុះរុះរើ និងមានការខូចខាតបាក់បែកទ្រព្យសម្បត្តិរបស់បងប្អូន ៕
ចែករំលែកព័តមាននេះ