រាជធានីភ្នំពេញ ៖ គិតត្រឹមថ្ងៃទី៩ ខែឧសភា ឆ្នាំ២០២៥ ពានរង្វាន់ជើងឯកក្លិបបាល់ទាត់ទ្វីបអាស៊ីទាំង៣កម្រិតផ្នែកបុរស រដូវកាល ២០២៤-២០២៥ ដោយមួយកម្រិតរកឃើញជើងឯករួចហើយ ខណៈដែលពីរកម្រិតទៀត…
រាជធានីភ្នំពេញ ៖ គិតត្រឹមថ្ងៃទី៩ ខែឧសភា ឆ្នាំ២០២៥ ពានរង្វាន់ជើងឯកក្លិបបាល់ទាត់ទ្វីបអាស៊ីទាំង៣កម្រិតផ្នែកបុរស រដូវកាល ២០២៤-២០២៥ ដោយមួយកម្រិតរកឃើញជើងឯករួចហើយ ខណៈដែលពីរកម្រិតទៀត នឹងដឹងនៅពេលឆាប់ៗខាងមុខនេះ។
ពានរង្វាន់កម្រិតទី១ AFC Champions League Elite ៖ បានរកឃើញម្ចាស់ជើងឯករួចហើយ កាលពីពីថ្ងៃទី៣ ខែឧសភា ឆ្នាំ២០២៥ បន្ទាប់ពីចាប់ផ្តើមការប្រកួតនៅថ្ងៃទី៦ ដល់ថ្ងៃទី១៣ ខែសីហា ឆ្នាំ២០២៤ សម្រាប់វគ្គជម្រុះបឋម និងការប្រកួតជុំចុងក្រោយ ចាប់ផ្តើមពីថ្ងៃទី១៦ ខែកញ្ញា ឆ្នាំ២០២៤ ដល់ថ្ងៃទី៣ ខែឧសភា ឆ្នាំ២០២៥ ដោយបែងចែកជា២តំបន់ (តំបន់ខាងលិច១២ក្រុម និងតំបន់ខាងកើត១២ក្រុម)។
ជាលទ្ធផលក្រុម Al-Ahli សមាជិកលីគកំពូលអារ៉ាប៊ីសាអូឌីតជាម្ចាស់ផ្ទះជើងឯក បន្ទាប់ពីយកឈ្នះក្រុម Kawasaki Frontale សមាជិកលីគកំពូលជប៉ុន ដោយលទ្ធផល ២-០ នៅឯកីឡដ្ឋាន King Abdullah Sports City ទីក្រុងជេដដា ប្រទេសអារ៉ាបីសាអូឌីត ដោយក្រសោបបានប្រាក់រង្វាន់សរុបចំនួន១២លានដុល្លារ ក្នុងនោះ១០លានដុល្លារគឺជាប្រាក់រង្វាន់សម្រាប់អ្នកឈ្នះវគ្គផ្តាច់ព្រ័ត្រ។
ការបែងចែកប្រាក់រង្វាន់សរុបចំនួន ៤២លានដុល្លារ
-ការប្រកួតទម្រង់ជាលីគ ៖ ៨០ម៉ឺនដុល្លារ/១ក្រុម
-វគ្គ១៦ក្រុម ៖ ២០ម៉ឺនដុល្លារ/១ក្រុម
-វគ្គ៨ក្រុម ៖ ៤០ម៉ឺនដុល្លារ/១ក្រុម
-វគ្គពាក់កណ្តាលផ្តាច់ព្រ័ត្រ ៖ ៦០ម៉ឺនដុល្លារ/១ក្រុម
-ក្រុមរងជើងឯក ៖ ៤លានដុល្លារ
-ក្រុមជើងឯក ៖ ១០លានដុល្លារ
ពានរង្វាន់កម្រិតទី២ AFC Champions League Two ៖ ចាប់ផ្តើមការប្រកួតនៅថ្ងៃទី១៤ ខែសីហា ឆ្នាំ២០២៤ សម្រាប់វគ្គជម្រុះបឋម និងការប្រកួតជុំចុងក្រោយ ចាប់ផ្តើមពីថ្ងៃទី១៧ ខែកញ្ញា ឆ្នាំ២០២៤ ដល់ថ្ងៃទី១៨ ខែឧសភា ឆ្នាំ២០២៥ ដោយបែងចែកជា២តំបន់ (តំបន់ខាងលិច១៦ក្រុម និងតំបន់ខាងកើត១៦ក្រុម)។ ជាលទ្ធផលវគ្គផ្តាច់ព្រ័ត្រ ក្រុម Lion City Sailors សមាជិកលីគកំពូលសិង្ហបុរី ត្រូវប៉ះក្រុម Sharjah FC សមាជិកលីគកំពូលអារ៉ាប់រួម នៅថ្ងៃទី១៨ ឧសភា នៅពហុកីឡដ្ឋាន Bishan ប្រទេសសិង្ហបុរី វេលាម៉ោង៧ៈ០០នាទីយប់។ ម្ចាស់ជើងឯកនឹងក្រសោបប្រាក់រង្វាន់សរុបចំនួន ៣ ២៨០ ០០០ដុល្លារ ដោយ ២ ៥០០ ០០០ដុល្លារជាប្រាក់រង្វាន់សម្រាប់អ្នកឈ្នះវគ្គផ្តាច់ព្រ័ត្រ។
ការបែងចែកប្រាក់រង្វាន់សរុបចំនួន ១៦ ៦២០ ០០០ដុល្លារ
-វគ្គចែកពូល ៖ ៣០ម៉ឺនដុល្លារ/១ក្រុម
-វគ្គ១៦ក្រុម ៖ ៨ម៉ឺនដុល្លារ/១ក្រុម
-វគ្គ៨ក្រុម ៖ ១៦ម៉ឺនដុល្លារ/១ក្រុម
-វគ្គពាក់កណ្តាលផ្តាច់ព្រ័ត្រ ៖ ២៤ម៉ឺនដុល្លារ/១ក្រុម
-ក្រុមរងជើងឯក ៖ ១លានដុល្លារ
-ក្រុមជើងឯក ៖ ២ ៥០០ ០០០លានដុល្លារ
ពានរង្វាន់កម្រិតទី៣ AFC Challenge League ៖ ចាប់ផ្តើមការប្រកួតនៅថ្ងៃទី១៣ ខែសីហា ឆ្នាំ២០២៤ សម្រាប់វគ្គជម្រុះបឋម និងការប្រកួតជុំចុងក្រោយ ចាប់ផ្តើមពីថ្ងៃទី២៦ ខែតុលា ឆ្នាំ២០២៤ ដល់ថ្ងៃទី១០ ខែឧសភា ឆ្នាំ២០២៥ ដោយបែងចែកជា២តំបន់ (តំបន់ខាងលិច១២ក្រុម និងតំបន់ខាងកើត៦ក្រុម)។ ជាលទ្ធផលវគ្គផ្តាច់ព្រ័ត្រ ក្រុមព្រះខ័នរាជស្វាយរៀង សមាជិកលីគកំពូលកម្ពុជា ត្រូវប៉ះក្រុម FK Arkadag សមាជិកលីគកំពូលតួកម៉េនីស្ថាន នៅថ្ងៃទី១០ ឧសភា នៅពហុកីឡដ្ឋានជាតិមរតតេជោ វេលាម៉ោង៧ៈ០០នាទីយប់ ។ ម្ចាស់ជើងឯកនឹងក្រសោបប្រាក់រង្វាន់សរុបចំនួន ១ ៣០០ ០០០ដុល្លារ ដោយ១លានដុល្លារជាប្រាក់រង្វាន់សម្រាប់អ្នកឈ្នះវគ្គផ្តាច់ព្រ័ត្រ។
ការបែងចែកប្រាក់រង្វាន់សរុបចំនួន ៤ ៤២០ ០០០ដុល្លារ
-វគ្គជម្រុះក្នុងពូល ៖ ១០ម៉ឺនដុល្លារ/១ក្រុម
-វគ្គ៨ក្រុម ៖ ៨ម៉ឺនដុល្លារ/១ក្រុម
-វគ្គពាក់កណ្តាលផ្តាច់ព្រ័ត្រ ៖ ១២ម៉ឺនដុល្លារ/១ក្រុម
-ក្រុមរងជើងឯក ៖ ៥០ម៉ឺនដុល្លារ
-ក្រុមជើងឯក ៖ ១លានដុល្លារ៕
ចែករំលែកព័តមាននេះ