កម្ពុជា-ឥណ្ឌា ឯកភាពធ្វើកិច្ចសហប្រតិបត្តិការផ្នែកច្បាប់ កាន់តែមានលក្ខណៈគ្រប់ជ្រុងជ្រោយ
រាជធានីភ្នំពេញ ៖ ក្នុងជំនួពិភាក្សាការងារ ទ្វេរភាគីរវាង ឯកឧត្តម កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ ជាមួយឯកឧត្តម…
រាជធានីភ្នំពេញ ៖ ក្នុងជំនួពិភាក្សាការងារ ទ្វេរភាគីរវាង ឯកឧត្តម កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ ជាមួយឯកឧត្តម Vanlalvawna Bawitlung ឯកអគ្គរដ្ឋទូតសាធារណរដ្ឋឥណ្ឌាប្រចាំព្រះរាជាណាចក្រកម្ពុជា ភាគីទាំងពីរ បានឯកភាពធ្វើកិច្ចសហប្រតិបត្តិការផ្នែកច្បាប់រវាងប្រទេសទាំងពីរកាន់តែមានលក្ខណៈគ្រប់ជ្រុងជ្រោយ ។
ឯកឧត្តម កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ នៅទីស្ដីការក្រសួងយុត្តិធម៌ កាលពីរសៀលថ្ងៃទី៧ ខែឧសភា ឆ្នាំ២០២៥បានអនុញ្ញាតឱ្យឯកឧត្តម Vanlalvawna Bawitlung ឯកអគ្គរដ្ឋទូតសា ធារណរដ្ឋឥណ្ឌា ប្រចាំព្រះរាជាណាចក្រកម្ពុជា និងសហការី ចូលជួបសម្ដែងការគួរសម និងពិភាក្សាការងារ ។
នៅក្នុងជំនួបនេះ ឯកឧត្តម ឧបនាយករដ្ឋមន្ត្រី បានសម្តែងនូវការអបអរសាទរ និងស្វាគមន៍យ៉ាងកក់ក្តៅជូនចំពោះឯកឧត្តម Vanlalvawna Bawitlung ដែលត្រូវបានតែងតាំងជា ឯកអគ្គរដ្ឋទូតវិសាមញ្ញ និងពេញសមត្ថភាព នៃសាធារណរដ្ឋឥណ្ឌាប្រចាំកម្ពុជា ។
ឯកឧត្តម ឧបនាយករដ្ឋមន្ត្រី និងឯកឧត្តម ឯកអគ្គរដ្ឋទូត បានពិភាក្សាអំពីទំនាក់ទំនង និងកិច្ចសហប្រតិបត្តិការរវាងក្រសួងយុត្តិធម៌កម្ពុជា និងស្ថានទូតសាធារណរដ្ឋឥណ្ឌាប្រចាំកម្ពុជានា ពេលកន្លងមក និងបានឯកភាពគ្នាលើសារៈសំខាន់ក្នុងការបន្តពង្រឹង និងពង្រីកកិច្ចសហប្រតិបត្តិការផ្នែកច្បាប់រវាងប្រទេសកម្ពុជា និងប្រទេសឥណ្ឌា ជាពិសេសលើការបញ្ចប់ការរៀបចំនូវ សន្ធិសញ្ញា ស្តីពីការជួយគ្នាទៅវិញទៅមកផ្នែកច្បាប់ក្នុងវិស័យព្រហ្មទណ្ឌ និងសេចក្តីព្រាងសន្ធិសញ្ញាស្តីពីបត្យាប័ន ដើម្បីធ្វើឱ្យកិច្ចសហប្រតិបត្តិការផ្នែកច្បាប់រវាង ប្រទេសទាំងពីរកាន់តែមានលក្ខណៈគ្រប់ជ្រុងជ្រោយ ៕
ចែករំលែកព័តមាននេះ