ទីផ្សារដូងនៅអាស៊ី កំពុងតែមានតម្រូវការខ្លាំង ចំណែកតម្លៃក៏កាន់តែល្អ ប៉ុន្តែទោះបីជាយ៉ាងណាក៏ដោយមកដល់ពេលនេះ ការនាំចេញដូងស្រស់របស់កម្ពុជា ហាក់នៅស្ងប់ស្ងាត់នៅឡើយ ។ បើតាមតារាងបញ្ជីនៃទំនិញនាំចេញរបស់ក្រសួងពាណិជ្ជកម្ម កាលពីឆ្នាំ២០២៤ គឺមានផ្លែឈើ…
ទីផ្សារដូងនៅអាស៊ី កំពុងតែមានតម្រូវការខ្លាំង ចំណែកតម្លៃក៏កាន់តែល្អ ប៉ុន្តែទោះបីជាយ៉ាងណាក៏ដោយមកដល់ពេលនេះ ការនាំចេញដូងស្រស់របស់កម្ពុជា ហាក់នៅស្ងប់ស្ងាត់នៅឡើយ ។
បើតាមតារាងបញ្ជីនៃទំនិញនាំចេញរបស់ក្រសួងពាណិជ្ជកម្ម កាលពីឆ្នាំ២០២៤ គឺមានផ្លែឈើ មួយចំនួនដូចជា សា្វយ មៀន ចេកជាដើម នៅក្នុងបញ្ជីនាំចេញ ប៉ុន្តែសម្រាប់ដូងដូចជាមិនឃើញនៅក្នុង តារាងកំណត់ត្រា ។ ហើយមកដល់ត្រីមាសទី១ ដើមឆ្នាំ តាមតារាងបញ្ជីទំនិញនាំចេញដែលកត់ត្រាដោយអគ្គនាយកដ្ឋានគយ និងរដ្ឋាករកម្ពុជាក៏ហាក់មិនឃើញបញ្ជាក់ច្បាស់នៅឡើយដែរ ។
ដូចជាស្វាយ មៀន ចេក ជាដើម គឺកម្ពុជាអាចបើកទីផ្សារនាំចេញទៅកាន់ចិនបានដោយឡែកដូងក៏ដូចគ្នាដែរ ។ កិច្ចព្រមព្រៀងបើកចំហរទីផ្សារដូងកម្ពុជានេះ គឺកម្ពុជាបានទទួល តាំងតែពីខែមេសា ឆ្នាំ២០២៤ នៅពេលដែលលោក វ៉ាង យី រដ្ឋមន្ត្រីក្រសួងការបរទេសមកបំពេញទស្សនៈកិច្ច នៅកម្ពុជាម្ល៉េះ ។ នៅពេលនេះ គេដឹងថា កម្ពុជាមានចំការដូងចំនួន១៣ និងរោងចក្រកែច្នៃចំនួន៥ ត្រូវបានផ្តល់សិទ្ធិនាំចេញដូងដោយផ្ទាល់ទៅកាន់ប្រទេសចិន ។ ស្របពេលដែលគេដឹងថា កម្ពុជាបានផ្ទៃដីចម្ការដូងសរុបប្រមាណជាជិត២ម៉ឺនហិកតា ។
ពាក់ព័ន្ធនឹងទីផ្សារដូងលោក តឿ បូរ៉ា ដែលជាឈ្មួញដូងមួយរូបបានប្រាប់កោះសន្តិភាពដោយខ្លីថា ទោះបីជាទីផ្សារដូងនាំចេញកើត ឬមិនកើតក៏ដោយក៏រឿងដំណាំដូងនេះនៅតែមានទីផ្សារទូលំទូលាយណាស់នៅក្នុងប្រទេស ។ លោកបានអះអាងថា «មិនបាច់ដល់ទៅនាំចេញទេ គ្រាន់តែគេដឹកលក់រាយមួយផ្លែមិនថា តូច មិនថាធំឡើយ គឺដឹងតែគេអាចលក់ពី៣០០០ រៀលទៅ៥០០០ រៀលបានយ៉ាងស្រួល» ។ លោកបានបញ្ជាក់បន្តថា « ខែក្តៅខ្លាំងដូចសព្វថ្ងៃនេះ តម្រូវការដូងខ្ពស់ណាស់ មានប៉ុន្មានក៏អស់ដែរ »។
ពាក់ព័ន្ធនឹងស្ថានភាពទីផ្សារដូងនៅបរទេសកាសែត VN Express បានរាយការណ៍ថា ដំណាំដូងនៅវៀតណាម នៅពេលនេះកំពុងតែមានតម្រូវការខ្ពស់ ហើយតម្លៃដូងបានកើនឡើងដល់កម្រិតកំណត់ត្រា ដោយសារតែកង្វះការផ្គត់ផ្គង់ ដែលបណ្តាលមកពីការប្រែប្រួលអាកាសធាតុ និងសត្វល្អិតនៅក្នុងប្រទេសវៀតណាមផ្ទាល់ ហ្វីលីពីន និងថៃ ជាដើម ។ តម្លៃដូងដែលគេប្រមូលទិញពីចម្ការ គឺឡើងដល់៨,៤៧ ដុល្លារនៅក្នុងមួយឡូ ដែលជាតម្លៃខ្ពស់បំផុតមិនធ្លាប់មាន ហើយតម្លៃនេះបានកើនឡើងជាងពីរដងធៀបនឹងពេលដូចគ្នាកាលពីឆ្នាំមុន ។
លោក ឃ្វៀន ឌិញ ទុង ( Nguyen Dinh Tung) នាយកប្រតិបត្តិក្រុមហ៊ុន Vina T&T ដែលជាក្រុមហ៊ុននាំចេញផ្លែឈើវៀតណាមមួយបានអះអាងថា តម្លៃដូងកំពុងកើនឡើងលឿនដូចតម្លៃមាស ហើយមកដល់ពេលនេះក្រុមហ៊ុនបាននាំចេញដូងចំនួន៧ កុងតឺន័រក្នុងមួយសប្តាហ៍ ។
សារព័ត៌មានដដែលបានបន្តថា និន្នាការស្រដៀងគ្នានេះ ត្រូវបានគេមើលឃើញនៅក្នុងប្រទេសស្រីលង្កា ហ្វីលីពីន និងប្រទេសថៃ ដែលជាអ្នកនាំចេញដូងដ៏សំខាន់ដោយនៅពេលនេះតម្លៃបានកើនឡើងពី៥០ទៅ១០០ភាគរយ ដោយសារតែអន្តរកម្មនៃបាតុភូតអាកាសធាតុ អែលនីណូ ដែលរាំងស្ងួតខ្លាំង និងឡានីណា ដែលមានភ្លៀងធ្លាក់ខ្លាំងបូកផ្សំនឹងងព្យុះក្រៅរដូវ នៅក្នុងតំបន់ជះឥទ្ធិពលដល់ទិន្នផលដូង ។
កាលពីឆ្នាំ២០២៤កន្លងទៅនេះ ជាមួយនឹងចម្ការដូងដែលមានប្រមាណជា២សែនហិកតា វៀតណាមអាចនាំចេញដូងប្រមាណជា២លានតោន ទៅកាន់ប្រទេសជាង៤០ ដោយទីផ្សារធំ គឺសហរដ្ឋអាមេរិក និងចិន នៅក្នុងតម្លៃជិត១,១ពាន់លានដុល្លារ ៕
ចែករំលែកព័តមាននេះ