ស្ថានភាពវិនិយោគបរទេសនៅកម្ពុជាហាក់កាន់តែខ្លាំង បើទោះបីជាកម្ពុជាស្ថិតក្រោមសំពាធនៃពន្ធបដិការពីសហរដ្ឋអាមេរិក៤៩ភាគរយក៏ដោយ ។ ស្ថិតិដែលចេញផ្សាយ ដោយក្រុមប្រឹក្សាអភិវឌ្ឈន៍កម្ពុជា បានឲ្យដឹងថា ទំហំវិនិយោគនៅក្នុងខែមេសា ឆ្នាំ២០២៥នេះ កម្ពុជាបានទាក់ទាញគម្រោងវិនិយោគសរុប៥៩ គម្រោង…
ស្ថានភាពវិនិយោគបរទេសនៅកម្ពុជាហាក់កាន់តែខ្លាំង បើទោះបីជាកម្ពុជាស្ថិតក្រោមសំពាធនៃពន្ធបដិការពីសហរដ្ឋអាមេរិក៤៩ភាគរយក៏ដោយ ។
ស្ថិតិដែលចេញផ្សាយ ដោយក្រុមប្រឹក្សាអភិវឌ្ឈន៍កម្ពុជា បានឲ្យដឹងថា ទំហំវិនិយោគនៅក្នុងខែមេសា ឆ្នាំ២០២៥នេះ កម្ពុជាបានទាក់ទាញគម្រោងវិនិយោគសរុប៥៩ គម្រោង ដែលមានទុនវិនិយោគសរុបទាំងអស់៨៦០លានដុល្លារ និងអាចបង្កើតការងារធ្វើបាន ប្រមាណជា៣៩.០០០ នាក់ នៅក្នុងនោះសហរដ្ឋអាមេរិកលេចនៅក្នុងតារាកំពូលវិនិយោគទាំង៥របស់កម្ពុជានឹងគេដែរហើយ ។
ប្រភពដដែលបានបន្តថា នៅក្នុងអំឡុងពេលនេះចិន នៅតែជាវិនិយោគទុនចម្បងនៅក្នុងទីផ្សារវិនិយោគនៅកម្ពុជា ដោយឈរនៅលំដាប់ទី១ ដែលមានទុនវិនិយោគសរុប៥៨,៥១ភាគរយនៃគម្រោង សិង្ហបុរី លោតខ្ពស់ គឺ៣៥,១០ភាគរយ អង់គ្លេសឃើញ១,៦៥ ភាគរយ ហើយសហរដ្ឋអាមេរិកឃើញ ០,២៣ ភាគរយ ក្រៅពីនោះ គឺជាវិនិយោគនៅក្នុងស្រុក ។
របាយការណ៍នោះ មិនបានបញ្ជាក់ថា តើសហរដ្ឋអាមេរិកក៏ដូចជា វិនិយោគទុនបរទេសផ្សេងៗវិនិយោគនៅលើអ្វីខ្លះនោះទេ ។ ដោយឃើញសហរដ្ឋអាមេរិកលេចនៅក្នុងបញ្ជីកំពូលទាំង៥ បែបនេះ អ្នកវិភាគមួយរូបបានបង្ហាញនូវទស្សនៈសុទិដ្ឋិនិយមថា វាអាចថានេះ គឺជាការចាប់ផ្តើមមួយរបស់កម្ពុជាសម្រាប់ទីផ្សារវិនិយោគមកពីសហរដ្ឋអាមេរិក ។
លោកបានបន្តថា«០,២៣ ភាគរយនៃទឹកប្រាក់វិនិយោគសរុប៨៦០លានដុល្លារឃើញថា វាតិចតួចនៅឡើយ ហើយបើយើងគណនាទៅ គឺទុនវិនិយោគអាមេរិក មានត្រឹមតែរង្វង់ជិត ២ លានដុល្លារប៉ុណ្ណោះ» ។ លោកបានបញ្ជាក់បន្ថែមថា កន្លងមកអាមេរិកជាទីផ្សារនាំចេញទំនិញកម្ពុជាដ៏ធំបំផុត ប៉ុន្តែវិនិយោគទុនអាមេរិកនៅកម្ពុជាតិចតួច ដូច្នេះប្រសិនបើចាប់ពីពេលនេះតទៅកម្ពុជា អាចបន្តទាក់ទាញវិនិយោគិនអាមេរិកមកបន្ថែមនោះ វាអាច គឺជាដំណើរដ៏វិជ្ជមាន ហើយវាក៏ជា ព័ត៌មានដ៏ល្អតូចមួយដែលអាចយើងមាននៅក្នុងដៃសម្រាប់រំលេចបន្តិចនៅក្នុងពេលចរចារ នាសប្តាហ៍ខាងមុខដែរ ។
នៅក្នុងរយៈពេល៤ខែ នៃឆ្នាំ២០២៥នេះ ប្រទេសកម្ពុជាបានទាក់ទាញការវិនិយោគទ្រព្យសកម្មនៅក្នុងចំនួនប្រមាណជា៣,៤ពាន់លានដុល្លារកើនឡើង៣៤ ភាគរយបើធៀបនឹងរយៈពេលដូចគ្នានៃឆ្នាំ២០២៤ ។ ទឹកប្រាក់ទាំងនេះ គឺចេញមកពីការអនុម័តគម្រោងវិនិយោគសរុបចំនួន២៣១គម្រោង ដោយមានការកើនឡើង៨០ភាគរយ បើធៀបនឹងគម្រោងត្រឹមតែ១២៨ ក្នុងរយៈពេលដូចគ្នានៃឆ្នាំ២០២៤ ដោយបង្កើតការងារបានប្រហែលជិត១៦ម៉ឺននាក់ ។
គម្រោងសំខាន់ៗរួមមាន រោងចក្រផលិតគ្រឿងបន្លាស់រថយន្ត រោងចក្រផលិតសំបកកង់រថយន្ត រោងចក្រដំឡើងរថយន្ត រោងចក្រដំឡើងកង់បីអគ្គិសនី រោងចក្រផលិតឧបករណ៍វេជ្ជសាស្ត្រ រោងចក្រ កែច្នៃដែក និងអាលុយមីញ៉ូម កំពង់ផែស្ងួត និងរមណីយដ្ឋានទេសចរណ៍ជាដើម ៕
ចែករំលែកព័តមាននេះ