រាជធានីភ្នំពេញ ៖ សាលាដំបូងរាជធានីភ្នំពេញបាននិងកំពុងបន្តចំណាត់ការលើសំណុំរឿងព្រហ្មទណ្ឌមួយ ពាក់ព័ន្ធស្ត្រីជនជាតិវៀតណាមម្នាក់ មានតួនាទីជាប្រធានធនាគារឯកជនកំពុងជាប់ឃុំនៅក្នុងពន្ធនាគារ ដែលបានចេញមូលប្បទានប័ត្រគ្មានសាច់ប្រាក់ «សែកស្អុយ»រាប់សិបលានដុល្លារអាមេរិក ដោយរង់ចាំបើកសវនាការផ្តន្ទាទោសលើជនជាប់ចោទតាមផ្លូវច្បាប់ជាធរមាន ។ សំណុំរឿងនេះ…
រាជធានីភ្នំពេញ ៖ សាលាដំបូងរាជធានីភ្នំពេញបាននិងកំពុងបន្តចំណាត់ការលើសំណុំរឿងព្រហ្មទណ្ឌមួយ ពាក់ព័ន្ធស្ត្រីជនជាតិវៀតណាមម្នាក់ មានតួនាទីជាប្រធានធនាគារឯកជនកំពុងជាប់ឃុំនៅក្នុងពន្ធនាគារ ដែលបានចេញមូលប្បទានប័ត្រគ្មានសាច់ប្រាក់ «សែកស្អុយ»រាប់សិបលានដុល្លារអាមេរិក ដោយរង់ចាំបើកសវនាការផ្តន្ទាទោសលើជនជាប់ចោទតាមផ្លូវច្បាប់ជាធរមាន ។
សំណុំរឿងនេះ មានជនត្រូវចោទឈ្មោះគង់ វិរសិង្ហ ហៅ ហ៊ួញ គីមហាវ ភេទស្រី អាយុ៤៧ឆ្នាំ មុខរបរ មុនចាប់ខ្លួន ជាប្រធានធនាគារ M.G.N Emperor Bang ទីលំនៅផ្ទះលេខ E2 បុរីទន្លេបាសាក់ មហាវិថីព្រះនរោត្តម សង្កាត់ទន្លេបាសាក់ ខណ្ឌចំការមន និងអាសយដ្ឋានមួយកន្លែងទៀតស្ថិតនៅសង្កាត់ផ្សារថ្មីទី១ ខណ្ឌដូនពេញ រាជធានីភ្នំពេញ ។
ជនត្រូវចោទត្រូវបានសមត្ថកិច្ចចាប់ខ្លួន និងឃុំខ្លួននៅពន្ធនាគារម២ព្រៃ.ស ពីបទ.មិនបំពេញកាតព្វកិច្ចចំពោះឧបករណ៍អាចជួញដូរបានប្រព្រឹត្តនៅរាជធានីភ្នំពេញ កាលពីថ្ងៃទី២៣ ខែឧសភា ឆ្នាំ២០២៣ បទល្មើសដែលមានបញ្ញត្តិ និងផ្តន្ទាទោសតាមមាត្រា២៣១ នៃច្បាប់ស្តីពីឧបករណ៍អាចជួញដូរបាន និងប្រតិបត្តិការទូទាត់ប្រាក់ ។
តាមប្រភពព័ត៌មានបានឲ្យដឹងថា ជនត្រូវចោទរងនូវបណ្តឹង២ដាច់ដោយឡែកពីគ្នា ដែលជនរងគ្រោះសុទ្ធតែជាជនស្លូតត្រង់ត្រូវបានចាញ់បោកប្រធានធនាគារឯកជនរូបនេះ ដែលមានជំនាញខាងបោកជនរងគ្រោះអស់ប្រាក់រាប់សិបលានដុល្លារអាមេរិក ពោលគឺជនរងគ្រោះសុទ្ធតែបានខាតបង់នូវទឹកប្រាក់យ៉ាងធ្ងន់ធ្ងរដូចគ្នា ។
ប្រភពព័ត៌មានឲ្យដឹងទៀតថា នៅក្នុងអំឡុងឆ្នាំ២០១៦ ស្ត្រីជនជាតិវៀតខាងលើនេះ បានមកបើកធនាគារឯកជនមួយឈ្មោះថា M.G.N Emperor Bang នៅរាជធានីភ្នំពេញ ដោយបានគៀងគរប្រមែប្រមូលអតិថិជនជាច្រើនឲ្យដាក់ទុកវិនិយោគដើម្បីបានការប្រាក់ ។ ដោយឃើញសកម្មភាពដំបូងអាចជឿទុកចិត្តបាន ជនរងគ្រោះម្នាក់ៗបានយកប្រាក់រាប់សិបលានដុល្លារទៅដាក់ធនាគារនោះ ហើយនាយិកាប្រធានធនាគារ ក៏បានចេញមូលប្បទានប័ត្រ «សែក» ឲ្យទៅជនរងគ្រោះតាមទឹកប្រាក់រៀងៗខ្លួន សម្រាប់តម្រូវការបើកប្រាក់ខ្លួនវិញ ។
ប៉ុន្តែក្រោយមកនៅពេលជនរងគ្រោះទៅដកប្រាក់នោះ ស្រាប់តែខាងធនាគារបញ្ជាក់ថា មូល ប្បទានប័ត្រគ្មានសាច់ប្រាក់ គឺ «សែកស្អុយ» ។ អង្គហេតុដូចបានរៀបរាប់ខាងលើ ជនរងគ្រោះក៏បានរកការចរចាជាមួយប្រធានធនាគារនោះជាច្រើនលើកដែរ ប៉ុន្តែចុងក្រោយនាយិការប្រធានធនាគារបានគេចវេសមិនព្រមជួបដោះស្រាយជាមួយជនរងគ្រោះទេ ទើបជនរងគ្រោះសម្រេចចិត្តដាក់ពាក្យបណ្តឹងទៅសមត្ថកិច្ចឲ្យចាត់ការតាមផ្លូវច្បាប់ ។
ដូច្នេះ ជនរងគ្រោះសង្ឃឹមថា តុលាការនិងលើកយកសំណុំរឿងព្រហ្មទណ្ឌមួយនេះ មកបើកសវនាការជាសាធារណៈក្នុងពេលឆាប់ៗខាងមុខ ដើម្បីផ្តន្ទាទោសលើជនជាប់ចោទ ដែលបានចេញសែកស្អុយរាប់សិបលានដុលារអាមេរិកជាប្រយោជន៍ និងផ្តល់យុត្តិធម៌ដល់ជនរងគ្រោះផងដែរ ៕
ចែករំលែកព័តមាននេះ