សារព័ត៌មានដែលមានការទទួលស្គាល់នៅថៃ ដូចជា កាសែតបាងកកប៉ុស្តិ៍ជាដើម កាលពីរសៀលថ្ងៃទី០៥ ខែឧសភា នៅតែបន្តបញ្ជាក់អំពីករណីបាត់បង់ជីវិតដោយជំងឺ Anthrax ដែលនាយកដ្ឋានប្រយុទ្ធនឹងជំងឺឆ្លងនៃក្រសួងសុខាភិបាលកម្ពុជាហៅថា «ពិសធ្យូង» នេះត្រឹមមួយករណីដដែល…
សារព័ត៌មានដែលមានការទទួលស្គាល់នៅថៃ ដូចជា កាសែតបាងកកប៉ុស្តិ៍ជាដើម កាលពីរសៀលថ្ងៃទី០៥ ខែឧសភា នៅតែបន្តបញ្ជាក់អំពីករណីបាត់បង់ជីវិតដោយជំងឺ Anthrax ដែលនាយកដ្ឋានប្រយុទ្ធនឹងជំងឺឆ្លងនៃក្រសួងសុខាភិបាលកម្ពុជាហៅថា «ពិសធ្យូង» នេះត្រឹមមួយករណីដដែល ប៉ុន្តែបណ្តាញសង្គមនៅស្រុកយើងខ្លះបានបន្លាចថា មានអ្នកស្លា.ប់ដល់ទៅ៦០០នាក់ ។
សូមកុំជ្រួលច្របល់រឿងនេះ វាពិតជាមាន ប៉ុន្តែមិនទាន់មានករណីរីករាលដាលច្រើនបែបនោះឡើយ ដោយកាសែតបាងកកប៉ុស្តិ៍បានផ្សាយថា ជំងឺពិសធ្យូងនេះ វាឆ្លងតែ៣នាក់ នៅឡើយទេ ហើយស្លា.ប់ម្នាក់ ដោយឡែកមនុស្ស៩៨នាក់ផ្សេងទៀត គេគ្រាន់តែដាក់ក្រោមការត្រួតពិនិត្យប៉ុណ្ណោះ ។
តាមឯកសាររបស់អង្គការសុខភាពពិភពលោក ជំងឺនេះវាជាជំងឺសាហាវ ប៉ុន្តែវាមានថ្នាំព្យាបាល ហើយ គឺជាជំងឺកម្របំផុត ដូច្នេះកុំអាលជ្រួលច្របល់ ហើយអ្នកដែលដឹងមិនច្បាស់កុំចេះតែបន្លាចគេបន្លាចឯង ។
ក្រៅពីរបាយការណ៍របស់អង្គការសុខភាពពិភពលោក តាមឯកសារផ្នែកវេជ្ជសាស្ត្រមួយដែលចុះផ្សាយនៅលើ https://www.mayoclinic.org បានឲ្យដឹងថា ជំងឺពិសធ្យូងនេះ គឺជាជំងឺដ៏កម្រមួយ ប៉ុន្តែធ្ងន់ធ្ងរដែលបង្កឡើងដោយបាក់តេរីដែលមានឈ្មោះថា Bacillus anthracis ហើយមនុស្សអាចឆ្លង ឬកើតជំងឺនេះតាមរយៈការប៉ះពាល់ផ្ទាល់ ឬដោយប្រយោលជាមួយសត្វឈឺ ឬតំបន់ដែលសម្បូរបាក់តេរីនេះ ។
មកដល់ពេលនេះ ពិភពលោកនៅមិនទាន់មានភស្តុតាងដែលបង្ហាញថា ជំងឺនេះ ត្រូវបានចម្លងពីមនុស្សទៅមនុស្សនោះទេ ប៉ុន្តែវាអាចទៅរួចដែលថា ដំបៅនៅលើស្បែកវាអាចឆ្លងតាមរយៈការប៉ះផ្ទាល់ ឬតាមរយៈការប៉ះពាល់ជាមួយវត្ថុដែលមានបាក់តេរី ពីព្រោះថា មេរោគនេះ ចូលទៅក្នុងខ្លួនតាមរយៈស្នាមរបួសនៅលើស្បែក ហើយវាក៏អាចឆ្លងតាមរយៈការស្រូបយកបាក់តេរីតាមផ្លូវដង្ហើម ឬការទទួលទានសាច់ដែលផ្ទុកមេរោគចម្អិនមិនល្អ ។
មកដល់ពេលនេះ ជំងឺនេះនៅលើស្បែកមិនសូវជាគ្រោះថ្នាក់ទេ ប៉ុន្តែប្រសិនបើវាឆ្លងហើយកើតជំងឺនៅខាងក្នុងខ្លួនដូចជាសួត ក្រពះ ពោះវៀន ពិបាកព្យាបាល ហើយអាចស្លា.ប់បាន ។
ជំងឺពិសធ្យូងនៅលើស្បែក ៖ រោគសញ្ញា គឺមានដុំរមាស់ដែលធំឡើងស្រដៀងនឹងសត្វល្អិតខាំ ហើយវិវត្តន៍ទៅជាការឈឺចាប់យ៉ាងឆាប់រហ័សទៅជាដំបៅដែលសងខាងជុំវិញមានអាការៈដំបៅរលាក ហើយចំណុចកណ្តាលខ្មៅ ។ ក្រៅពីនោះ អ្នកជំងឺមានអាការៈហើមនៅក្នុងក្រពេញទឹករងៃដែលឈឺ និងនៅក្បែរនោះ ហើយជួនកាលមានរោគសញ្ញាដូចជាគ្រុនក្តៅ និងឈឺក្បាល ។
ជំងឺពិសធ្យូងនៅក្រពះ និងពោះវៀន ៖ អ្នកជំងឺឆ្លងជំងឺនេះតាមការបរិភោគសាច់មិនទាន់ឆ្អិនពីសត្វដែលមានមេរោគ ។ វាអាចប៉ះពាល់ដល់ក្រពះពោះវៀនរបស់អ្នកចាប់តាំងពីបំពង់ករហូតដល់ពោះវៀនធំ ។ ជំងឺបែបនេះមានរោគសញ្ញាមួយចំនួនដូចជា ចង្អោរ ឈឺពោះ ឈឺក្បាល បាត់បង់ចំណង់អាហារ គ្រុន រាគធ្ងន់ធ្ងរ ហូរឈាមនៅដំណាក់កាលក្រោយនៃជំងឺឈឺបំពង់ក និងពិបាកលេប ហើមក ជាដើម ។
ជំងឺពិសធ្យូងតាមប្រព័ន្ធដង្ហើម ៖ វាគឺជាប្រភេទដែលគ្រោះថ្នាក់បំផុត ហើយអ្នកជំងឺអាចបាត់បង់ជីវិត ។ ជំងឺនេះឆ្លងតាមការស្រូបកោសិកានៃបាក់តេរីតាមប្រព័ន្ធដង្ហើម ។ អ្នកជំងឺដែលកើតជំងឺនេះ នៅប្រព័ន្ធដង្ហើម គឺមានរោគសញ្ញាដូច ជំងឺគ្រុនផ្តាសាយ រយៈពេលពីរបីម៉ោង ឬច្រើនថ្ងៃ ដូចជា ឈឺបំពង់ក ក្តៅខ្លួនស្រាល អស់កម្លាំង និងឈឺសាច់ដុំ ។ បន្ទាប់មកមានអាការៈឈឺទ្រូងស្រាល ដង្ហើមខ្លី ចង្អោរ ក្អួតឈាម ឈឺចាប់ក្នុងការលេប គ្រុនក្តៅខ្លាំង ពិបាកដកដង្ហើម និងជំងឺរលាកស្រោមខួរ ។ល។
ដើម្បីការពារខ្លួនពីអ្នកជំងឺនេះ គឺមានវ៉ាក់សាំង ប៉ុន្តែនៅកម្ពុជាក៏យើងនៅមិនទាន់ដឹងថា វាមាននៅលើទីផ្សារ ឬនៅតាមមន្ទីរពេទ្យ ឬយ៉ាងណានៅឡើយទេ រីឯដំណើរការព្យាបាល គឺអាចអូសបន្លាយដល់ទៅ៦០ថ្ងៃ ហើយឱសថដែលគេប្រើ គឺអង់ទីប៊ីយូទិច ។ កុំជិតស្និទ្ធនឹងពពួកសត្វស៊ីស្មៅដោយរួមទាំងគោ និងក្របី ហើយត្រូវតែរក្សាអនាម័យខ្លួនប្រាណ ហូបចុកគឺត្រូវតែចំអិនឲ្យបានល្អ ហើយក៏គួរតែការពារប្រព័ន្ធដង្ហើមផងដែរ ៕
ចែករំលែកព័តមាននេះ