ប្រទេសវៀតណាម ៖ ប្រទេសវៀតណាមកំពុងជួបការលំបាកក្នុងការនាំចេញផ្លែទុរេនទៅកាន់ប្រទេសចិន ដោយសារតែតម្រូវការត្រួតពិនិត្យសុវត្ថិភាពកាន់តែតឹងរ៉ឹង និងការប្រកួតប្រជែងកាន់តែខ្លាំងឡើងពីប្រទេសផ្សេងៗ ដែលបណ្តាលឱ្យតម្លៃក្នុងស្រុកធ្លាក់ចុះយ៉ាងខ្លាំង ដោយមួយគីឡូក្រាមត្រឹមតែ ១,៣៥ ទៅ ២,៦៩ដុល្លារ…
ប្រទេសវៀតណាម ៖ ប្រទេសវៀតណាមកំពុងជួបការលំបាកក្នុងការនាំចេញផ្លែទុរេនទៅកាន់ប្រទេសចិន ដោយសារតែតម្រូវការត្រួតពិនិត្យសុវត្ថិភាពកាន់តែតឹងរ៉ឹង និងការប្រកួតប្រជែងកាន់តែខ្លាំងឡើងពីប្រទេសផ្សេងៗ ដែលបណ្តាលឱ្យតម្លៃក្នុងស្រុកធ្លាក់ចុះយ៉ាងខ្លាំង ដោយមួយគីឡូក្រាមត្រឹមតែ ១,៣៥ ទៅ ២,៦៩ដុល្លារ ឬ ៥៥០០ ទៅ ១ម៉ឺនរៀលប៉ុណ្ណោះ។ នេះបើយោងតាមប្រភពពីសារព័ត៌មានវៀតណាម VnExpress ចេញផ្សាយកាលពីថ្ងៃទី៥ ខែឧសភា ឆ្នាំ២០២៥។
ប្រភពដដែលបានបន្ត បណ្តាទូកុងតឺន័រដឹកផ្លែទុរេនវៀតណាមត្រូវការពេលមួយសប្តាហ៍សម្រាប់ការត្រួតពិនិត្យសុវត្ថិភាពនៅព្រំដែន ដោយគយចិនបានត្រួតពិនិត្យ ១០០% នៃការដឹកជញ្ជូនទាំងអស់ពាក់ព័ន្ធសារធាតុគីមីហាមឃាត់ ហើយដោយសារការត្រួតពិនិត្យចំណាយពេលយូរនាំឱ្យទុរេនខូចគុណភាព។ អាជីវករទុរេនម្នាក់បានអះអាងថា ទុរេនខ្លះឆ្លងផុតការត្រួតពិនិត្យ ប៉ុន្តែត្រូវខូច ឬប្រេះនៅពេលទៅដល់ទីផ្សារលក់ដុំក្នុងប្រទេសចិន ដោយសារការរង់ចាំយូរពេក។
ប្រការទាំងនេះបានបង្ខំឱ្យកសិករដាំទុរេននៅតំបន់ដីសណ្តទន្លេមេគង្គទម្លាក់តម្លៃ ៣០% មកត្រឹម ១,៣៥ ទៅ ២,៦៩ដុល្លារក្នុងមួយគីឡូក្រាម ពោលស្មើនឹងមួយភាគបី នៃអត្រាកាលពីឆ្នាំមុន។ នៅក្នុងរយៈពេលពីរខែដំបូងឆ្នាំនេះ ការនាំចេញទុរេនវៀតណាមទៅកាន់ប្រទេសចិនធ្លាក់ចុះ ៨៣% មកនៅត្រឹម ២៧លានដុល្លារ។ ការធ្លាក់ចុះនៃការនាំចេញមួយផ្នែក ដោយសារតែអាជីវកម្មមានការប្រុងប្រយ័ត្ន និងលែងហ៊ាននាំចេញក្នុងចំនួនច្រើនដូចពីមុន។ អាជីវករជាច្រើននៅតំបន់ដាំដុះទុរេនដូចជា ទីក្រុងកឹងធើ (Can Tho) និងខេត្តបេនត្រែ (Ben Tre) លែងហ៊ានទទួលទិញទុរេនដោយសារបារម្ភពីការខាតបង់។
ចំណែកទីផ្សារទុរេនរបស់វៀតណាមនៅក្នុងប្រទេសចិនបានធ្លាក់ចុះពី ៦២% មកនៅត្រឹម ៣៧% ខណៈដែលប្រទេសថៃបានកើនឡើងពី ៣៧% ទៅ ៦២,៣% បើទោះបីជាប្រទេសចិនអនុវត្តវិធានការត្រួតពិនិត្យតឹងរ៉ឹងដូចគ្នា ចំពោះទុរេនថៃយ៉ាងណាក៏ដោយ ចំពេលរដ្ឋាភិបាលថៃបានអនុវត្តវិធានការដើម្បីធានាការនាំចេញបន្តក្នុងបរិមាណខ្ពស់ទៅកាន់ប្រទេសចិន។
ប្រទេសចិនបានពង្រឹងការត្រួតពិនិត្យទុរេនវៀតណាមពាក់ព័ន្ធសារធាតុគីមីហាមឃាត់ដូចជា សារធាតុ Auramine O ឬថ្នាំពណ៌លឿង ដែលជាសារធាតុគីមីបង្កជំងឺមហារីក។ ជាមួយគ្នានោះ ការព្រមានអំពីការក្លែងបន្លំលេខកូដតំបន់ដាំដុះ និងការបំពានវិធានការសុវត្ថិភាពក៏បានធ្វើឱ្យក្រុមហ៊ុនជាច្រើនផ្អាកការនាំចេញ ដើម្បីដោះស្រាយបញ្ហាដោយអនុលោមតាមច្បាប់។
ការត្រួតពិនិត្យទុរេនត្រូវចំណាយពេល១សប្តាហ៍ ដែលប៉ះពាល់ដល់គុណភាពទុរេន។ ដូច្នេះអ្នកនាំចេញចង់ឱ្យកាត់បន្ថយមកត្រឹមបី ឬបួនថ្ងៃ ហើយបង្កើនចំនួនមជ្ឈមណ្ឌលត្រូតពិនិត្យដែលបានអនុម័តដោយប្រទេសចិន។ ពួកគេក៏បានណែនាំផងដែរ ដល់ការអប់រំកសិករអំពីការប្រើប្រាស់ជីអនុលោមតាមច្បាប់ ជៀសវាងផលិតផលរត់ពន្ធដែលមានសារធាតុហាមឃាត់ និងមិនត្រឹមត្រូវតាមស្តង់ដារ។
ក្រៅពីនេះ ការប្រកួតប្រជែងថ្មីពីប្រទេសឡាវ ឥណ្ឌូណេស៊ី និងកម្ពុជា បានបង្កើនបញ្ហាប្រឈមសម្រាប់ទុរេនវៀតណាម។ ជាក់ស្តែង កាលពីថ្មីៗនេះ ខេត្តអ័ត្តាពើ (Attapeu) របស់ឡាវបានអនុញ្ញាតឱ្យក្រុមហ៊ុនចំនួន ៣ ធ្វើការដាំដុះទុរេនសម្រាប់នាំចេញលើផ្ទៃដីជាង២៧៣ហិកតា ដើម្បីផ្គត់ផ្គង់ដល់ប្រទេសចិន។ ស្របពេលក្រុមហ៊ុនចិនបានសហការជាមួយសភាពាណិជ្ជកម្មឡាវ បង្កើតសមាគមធុរកិច្ចទុរេន និងមជ្ឈមណ្ឌលស្រាវជ្រាវដោយធានាបានផ្ទៃដី ១២ ០០០ហិកតា សម្រាប់ការដាំដុះឯកទេស។
ងាកទៅប្រទេសឥណ្ឌូណេស៊ីឯណោះវិញ ក៏កំពុងពន្លឿនការជំរុញចូលទៅក្នុងទីផ្សារចិន ដែលមានតម្លៃរាប់ពាន់លានដុល្លារផងដែរ។ ឥណ្ឌូណេស៊ីមានចំការ និងកន្លែងវេចខ្ចប់ដែលត្រូវបានត្រួតពិនិត្យដោយគយចិន ហើយកំពុងបញ្ចប់ពិធីសារដឹកជញ្ជូន។ គ្រាន់តែខេត្តសូឡាវីស៊ី (Sulawesi) តែមួយបានចុះបញ្ជីទុរេនជាង៣ពាន់ហិកតា ដោយបំពេញតាមស្តង់ដារនាំចេញ។
ប្រទេសកម្ពុជាក៏កំពុងឈានចូលដល់ការនាំចេញទៅកាន់ប្រទេសចិនផងដែរ។ តួយ៉ាង កាលពីខែមេសាកន្លងទៅ កម្ពុជាបានចុះហត្ថលេខាលើឯកសារពិធីសារជាមួយប្រទេសចិន ដើម្បីនាំចេញទុរេន សំបុកត្រចៀកកាំ និងក្រពើបង្កាត់ពូជនៅកសិដ្ឋាន ដែលជាផ្នែកនៃកិច្ចព្រមព្រៀងសហប្រតិបត្តិការថ្មីចំនួន ៣៧ ដែលបើកទ្វារសម្រាប់វិស័យកសិកម្មរបស់ខ្លួន។
ពាក់ព័ន្ធការធ្លាក់ថ្លៃទុរេនខ្លាំង និងគ្មានអ្នកទិញថែមទៀតនោះ លោក Dang Phuc Nguyen អគ្គលេខាធិការសមាគមន៍បន្លែ និងផ្លែឈើវៀតណាមលើកឡើងថា ការនាំចេញបន្លែ និងផ្លែឈើ ជាពិសេសទុរេនទៅកាន់ប្រទេសចិនកំពុងធ្លាក់ចុះយ៉ាងខ្លាំង។ ប្រទេសចិនបាននាំចូលកសិផលវៀតណាមត្រឹមតែ៥០០លានដុល្លារប៉ុណ្ណោះក្នុងត្រីមាសទី១ ពោលធ្លាក់ចុះ ៣១% ធៀបនឹងរយៈពេលដូចគ្នាកាលពីឆ្នាំមុន។ លោកក៏បានអំពាវនាវឱ្យមានការអន្តរាគមន៍កាន់តែខ្លាំងពីរដ្ឋាភិបាល ដើម្បីជំរុញការនាំចេញទុរេនឡើងវិញ៕ ប្រភព ៖ VnExpress
ចែករំលែកព័តមាននេះ