ថ្លែងពីទីក្រុងហ្សាការតា ប្រទេសឥណ្ឌូនេស៊ី សម្តេចតេជោ ហ៊ុន សែន ប្រធានព្រឹទ្ធសភាកម្ពុជា បានគាស់កកាយរំលឹកពីអតីតកាលរបស់ខ្មែរថា សោកនាដកម្មរបស់កម្ពុជាមានឫសគល់ចេញពីអន្តរាគមន៍របស់បរទេសទៅលើនយោបាយផ្ទៃក្នុងរបស់កម្ពុជា ។ នាឱកាសអញ្ជើញធ្វើបឋកថា…
ថ្លែងពីទីក្រុងហ្សាការតា ប្រទេសឥណ្ឌូនេស៊ី សម្តេចតេជោ ហ៊ុន សែន ប្រធានព្រឹទ្ធសភាកម្ពុជា បានគាស់កកាយរំលឹកពីអតីតកាលរបស់ខ្មែរថា សោកនាដកម្មរបស់កម្ពុជាមានឫសគល់ចេញពីអន្តរាគមន៍របស់បរទេសទៅលើនយោបាយផ្ទៃក្នុងរបស់កម្ពុជា ។
នាឱកាសអញ្ជើញធ្វើបឋកថា ក្រោមប្រធានបទ «កម្ពុជា និងអាស៊ាន, អាស៊ាន និងពិភពលោក» នៅទីក្រុងហ្សាកាតា កាលពីថ្ងៃទី៥ ខែឧសភា ឆ្នាំ២០២៥ សម្តេចតេជោបានលើកឡើងជាច្រើនពីគុណសម្បត្តិរបស់សហគមន៍អាស៊ានពីការមិនលូកដៃចូលកិច្ចការផ្ទៃក្នុងរបស់ប្រទេសជាសមាជិកអាស៊ាន ។ ត្រង់ចំណុចនេះ សម្តេចតេជោ ហ៊ុន សែន អតីតនាយករដ្ឋមន្ត្រីកម្ពុជាបានលើកឡើងថា គោលការណ៍មិនជ្រៀតជ្រែកចូលកិច្ចការផ្ទៃក្នុងរបស់ប្រទេសសមាជិកនេះ គឺជាកត្តាធំបំផុត ដែលទាក់ទាញកម្ពុជាចូលអាស៊ាន ។
ជាមួយគ្នានោះដែរ សម្តេចតេជោបានគូសរំលឹកថា «ជាទស្សនៈរួមនៃអ្នកដឹកនាំខ្មែរយើងមានការចងចាំថា សោកនាដកម្មរបស់កម្ពុជា មានឫសគល់ចេញពីអន្តរាគមន៍របស់បរទេស ទៅលើនយោបាយផ្ទៃក្នុងរបស់កម្ពុជា ។ នៅពេលដែលឥទ្ធិពលនៃការប្រកួតប្រជែងរវាងមហាអំណាច បានរាលដាលដល់កម្ពុជាហើយមានការលូកដៃចូលជ្រៅទៅក្នុងនយោបាយផ្ទៃក្នុង ដែលឈានដល់ការធ្វើរដ្ឋប្រហារទម្លាក់ ព្រះករុណា ព្រះបាទ សម្តេច នរោត្តម សីហនុ ព្រះបរមរតនកោដ្ឋ»។
នៅចំពោះមុខថ្នាក់ដឹកនាំជាសមាជិកអាស៊ាននានាសម្តេចតេជោបន្តថា នៅពេលនោះហើយដែលជាចំណុចចាប់ផ្តើមនៃការធ្លាក់ចូលអន្លង់ដ៏សែនជ្រៅនៃការបែកបាក់ផ្ទៃក្នុង ហើយកម្ពុជាបាត់បង់ការកាន់កាប់លើជោគវាសនាប្រទេសជាតិខ្លួន កម្ពុជាបានក្លាយជាវេទិកានៃសង្គ្រាមដោយតួអង្គតំណាងផង និងជាសង្គ្រាមស៊ីវិល ប្រល័យពូជសាសន៍ជាតិឯងផង ។ ចេញពីមេរៀនប្រវត្តិសាស្ត្រនេះ គោលការណ៍មិនជ្រៀតជ្រែកផ្ទៃក្នុងរបស់អាស៊ាន ពិតជាមានភាពទាក់ទាញជាពិសេស សម្រាប់កម្ពុជា ។
សម្តេចតេជោបន្ថែមថា ស្មារតីសហគមន៍អាស៊ាន គឺការធ្វើការដោយគោរពគោលការណ៍កុងសង់ស៊ីស ។ រឿងនេះសំខាន់ខ្លាំងណាស់ ដើម្បីធានាថា ប្រទេសសមាជិកទាំងអស់មានសិទ្ធិស្មើគ្នា គ្មានប្រទេសតូច គ្មានប្រទេសធំ គ្មានប្រទេសអ្នកមាន គ្មានប្រទេសអ្នកក្រ គ្មានប្រទេសចាស់ និងគ្មានប្រទេសថ្មី ។ អាស៊ានមិនបានធ្វើការតាមរយៈការបោះឆ្នោតយកសំឡេងភាគច្រើននោះទេ ព្រោះការណ៍នេះ នឹងអាចនាំឱ្យមានការបែកបាក់ផ្ទៃក្នុងអាស៊ាន ៕
ចែករំលែកព័តមាននេះ