រាជធានីភ្នំពេញ ៖ ជនសង្ស័យ០២នាក់ ដែលបានក្លែងបន្លំឯកសារសាធារណៈ ដោយខុសច្បាប់ ដើម្បីធ្វើអត្តសញ្ញាណប័ណ្ណសញ្ជាតិខ្មែរ ត្រូវនគរបាលជំនាញព្រហ្មទណ្ឌខណ្ឌច្បារអំពៅ បញ្ជូនទៅតុលាការនៅព្រឹកថ្ងៃទី០៥ ខែឧសភា ឆ្នាំ២០២៥នេះ…
រាជធានីភ្នំពេញ ៖ ជនសង្ស័យ០២នាក់ ដែលបានក្លែងបន្លំឯកសារសាធារណៈ ដោយខុសច្បាប់ ដើម្បីធ្វើអត្តសញ្ញាណប័ណ្ណសញ្ជាតិខ្មែរ ត្រូវនគរបាលជំនាញព្រហ្មទណ្ឌខណ្ឌច្បារអំពៅ បញ្ជូនទៅតុលាការនៅព្រឹកថ្ងៃទី០៥ ខែឧសភា ឆ្នាំ២០២៥នេះ បន្ទាប់ពីសមត្ថកិច្ចសាកសួរចប់សព្វគ្រប់ ។
តាមការបញ្ជាក់ពីនគរបាល បានអោយដឹងថា ជនសង្ស័យទាំង០២នាក់ រួមមាន ៖ ឈ្មោះ ស៊ន ហុងឆេង ភេទប្រុស អាយុ៤៨ឆ្នាំ ជនជាតិ ខ្មែរ មុខរបរ រត់ម៉ូតូកង់បី ស្នាក់ នៅភូមិអណ្តូង សង្កាត់គោករកា ខណ្ឌព្រែកព្នៅ និងឈ្មោះ វ៉ាន់ ចាន់ទ្រា ភេទ ប្រុស អាយុ ៣០ឆ្នាំ ជនជាតិ ខ្មែរ មុខរបរ រត់ម៉ូតូកង់បី ស្នាក់នៅភូមិបឹងសាឡាង សង្កាត់ឬស្សីកែវ ខណ្ឌឬស្សីកែវ ត្រូវបានឃាត់ខ្លួន ករណីក្លែងឯកសារសាធារណៈ (ត្រា បានចុះស្ថិតិ) ។
គួរបញ្ជាក់ផងដែរថា មុនពេលកើតហេតុ កាលពីថ្ងៃទី០២ ខែឧសភា ឆ្នាំ២០២៥ ជនសង្ស័យឈ្មោះ វ៉ាន់ ចាន់ទ្រា បើក ម៉ូតូកង់បី ដឹកឈ្មោះ សុខ ចាន់សុខគា ពីផ្សារអ៊ីអន២ មកធ្វើអត្តសញ្ញាណបណ្ណសញ្ជាតិខ្មែរ នៅនាយកដ្ឋានអត្តសញ្ញាណកម្ម (ចំណុចកើតហេតុ) ខាងលើ ពេលនោះ មន្ត្រីជំនាញពិនិត្យលើសៀវភៅស្នាក់នៅឃើញពុំមានបោះត្រា “បានចុះស្ថិតិ” ក៏ប្រាប់ឈ្មោះ សុខ ចាន់សុខគា ថា ធ្វើពុំបានទេ ឯកសារខ្វះត្រា ។ បន្ទាប់មកឈ្មោះ សុខ ចាន់សុខគា បានដើរចេញមកវិញ ក៏បានជួបជនសង្ស័យឈ្មោះ ស៊ន ហុងឆេង និងឈ្មោះ វ៉ាន់ ចាន់ទ្រា ប្រាប់ថា ធ្វើអត់បានទេ ប៉ុន្តែឈ្មោះស៊ន ហុងឆេង ក៍បានប្រាប់ថា ធ្វើឲ្យបាន យក១០ម៉ឺនរៀល រួចក៏យកសៀវភៅស្នាក់នៅ ទៅជួបបក្ខពួកម្នាក់ទៀត ឈ្មោះ ខ្មៅ ជាអ្នកបោះត្រា “បានចុះស្ថិតិ” លើសៀវភៅស្នាក់នៅ យកតែតម្លៃ ២ម៉ឺនរៀល ។ ឈ្មោះ សុខ ចាន់សុខគា ក៏បានកាន់សៀវភៅស្នាក់នៅនោះ ទៅជួបមន្ត្រីជំនាញ ដើម្បីធ្វើអត្តសញ្ញាណប័ណ្ណ ខណៈនោះ មន្ត្រីជំនាញសួរថា ធ្វើនៅទីណាឯកសារនេះលឿនម្លេះ ? ។ ជនសង្ស័យឈ្មោះ សុខ ចាន់សុខគា ក៏និយាយប្រាប់រឿងហេតុខាងលើ រួចនាយកដ្ឋានអត្តសញ្ញាណកម្ម ក៏រាយការណ៍មកសមត្ថកិច្ចខណ្ឌច្បារអំពៅ ចុះទៅឃាត់ខ្លួនឈ្មោះ វ៉ាន់ ចាន់ទ្រា មកសាកសួរ ។
លុះដល់ម៉ោង០៤និង១០នាទីរសៀលថ្ងៃដដែល សមត្ថកិច្ចខណ្ឌច្បារអំពៅ សហការជាមួយមន្ត្រីការិយាល័យសន្តិសុខផ្ទៃក្នុង និងខណ្ឌពោធិ៍សែនជ័យ ឃាត់ខ្លួនឈ្មោះ ស៊ន ហុងឆេង ដកហូតអត្តសញ្ញាណប័ណ្ណសញ្ជាតិខ្មែរ ៦សន្លឹក, បញ្ជូនមកអធិការដ្ឋាននគរបាលខណ្ឌច្បារអំពៅ ដើម្បីសាកសួរ។ ដោយឡែក ចំពោះបុរស០១នាក់ទៀត ឈ្មោះខ្មៅ ដែលធ្វើត្រាក្លែងក្លាយ បោះលើឯកសារសៀវភៅស្នាក់នៅ សមត្ថកិច្ចកំពុងស្រាវជ្រាវ ដើម្បីយកចាត់ការតាមនីតិវិធី ៕
ចែករំលែកព័តមាននេះ