ទីក្រុងតេអេរ៉ង់៖ ប្រទេសអ៊ីរ៉ង់ចេញមុខច្រានចោលរាល់ការចោទប្រកាន់ថាខ្លួនជាប់ពាក់ព័ន្ធ ឬជាអ្នកនៅពីក្រោយការវាយប្រហារពីសំណាក់ក្រុមហ៊ូទីទៅលើប្រទេសអ៊ីស្រាអែល។ តាមរយៈសេចក្ដីថ្លែងការណ៍ដែលចេញផ្សាយនៅល្ងាចថ្ងៃចន្ទ ក្រសួងការបរទេសអ៊ីរ៉ង់ចាត់ទុកការចោទប្រកាន់ម្ដងហើយម្ដងទៀតនោះជាការគ្មានមូលដ្ឋានច្បាស់លាស់ទាល់តែសោះ។
អ៊ីរ៉ង់ថាការនិយាយដូច្នេះហាក់ដូចជាខ្វះសេចក្ដីគោរពចំពោះប្រទេសយេម៉ែនដែលមានអធិបតេយ្យភាពពេញលេញ ហើយកំពុងរងការគាបសង្កត់ (ពីសំណាក់អាមេរិក)។ សេចក្ដីប្រកាសនោះរំលេចឱ្យឃើញថាអ៊ីរ៉ង់ចង់ឱ្យប្រទេសដទៃទៀតគោរពបូរណភាពទឹកដី និងអធិបតេយ្យភាពជាតិរបស់យេម៉ែន។
អ៊ីរ៉ង់ក៏ប្រកាសថ្កោលទោសប្រតិបត្តិការយោធារបស់អាមេរិកទៅលើមូលដ្ឋានរបស់ក្រុមហ៊ូទីនៅយេម៉ែនផងដែរ។ អ៊ីរ៉ង់ថានេះជាការរំលោភពេញទីទៅលើធម្មនុញ្ញរបស់អង្គការសហប្រជាជាតិផង និងក៏ជាការរំលោភទៅលើច្បាប់អន្តរជាតិផងដែរ។ គួរកត់សម្គាល់ថាសេចក្ដីថ្លែងការណ៍នេះធ្វើឡើងបន្ទាប់ពីក្រុមហ៊ូទីប្រកាសថាខ្លួនជាអ្នកបាញ់មីស៊ីលក្បែរព្រលានយន្តហោះអ៊ីស្រាអែល។ ហ៊ូទីថាខ្លួនធ្វើដូច្នេះដើម្បីឆ្លើយតបទៅអ៊ីស្រាអែលដែលត្រៀមវាយយកតំបន់ហ្កាហ្សាមកគ្រប់គ្រង។
ប៉ុន្មានអាទិត្យចុងក្រោយនេះ ក្រុមហ៊ូទីសម្រុកវាយប្រហារដោយមីស៊ីល និងដ្រូនទៅលើអ៊ីស្រាអែល។ ចំណែកអាមេរិកបន្តវាយប្រហារតាមអាកាសទៅលើមូលដ្ឋានរបស់ក្រុមហ៊ូទី។ នេះបើយោងតាមការផ្សាយរបស់ទីភ្នាក់ងារព័ត៌មានស៊ីនហួ។ យោងតាមទីភ្នាក់ងារព័ត៌មានអាអែហ្វប៉េ អ៊ីរ៉ង់យល់ថាក្រុមហ៊ូទីធ្វើសកម្មភាពរបស់ខ្លួនកាលពីពេលកន្លងមកដើម្បីគាំទ្រប្រជាជនប៉ាឡេស្ទីន។ អ៊ីរ៉ង់ថាក្រុមហ៊ូទីធ្វើអ្វីដោយឯករាជ្យ។ ចង់មានន័យថាគ្មានអ៊ីរ៉ង់ជាអ្នកបង្គាប់បញ្ជា ឬនៅពីក្រោយទេ។
ទោះជាយ៉ាងនេះក្ដី នាយករដ្ឋមន្ត្រីអ៊ីស្រាអែល លោកណឺតាន់យ៉ាហ៊ូ ប្រកាសសងសឹករហូតដល់ទីបញ្ចប់ទៅលើក្រុមហ៊ូទី។ លោកនិយាយរាលដាលទៅដល់ប្រទេសអ៊ីរ៉ង់ទៀត។ លោកថាអ៊ីរ៉ង់ក៏មិនរួចខ្លួនដែរ។ គ្រាន់តែថាលោកចង់ស្វែងរកពេលវេលាសមគួរណាមួយដើម្បីចាត់ការ។ ឥឡូវនេះ លោកត្រូវចាត់ការក្រុមហ៊ូទីមុនគេ។ ឆ្លើយតបទៅនឹងការព្រមាននេះ ក្រសួងការបរទេសអ៊ីរ៉ង់ប្រកាសថារដ្ឋាភិបាលរបស់ខ្លួនសូមរក្សាសិទ្ធិការពារអធិបតេយ្យភាពជាតិរបស់ខ្លួនយ៉ាងម៉ឺងម៉ាត់បំផុត។
អ៊ីរ៉ង់សូមផ្ដាំត្រឡប់ទៅវិញថាបើអាមេរិក និងអ៊ីស្រាអែលហ៊ានធ្វើអ្វីមិនស្រួលចំពោះអ៊ីរ៉ង់ ពួកគេនឹងទទួលរងនូវផលវិបាកដែលមិននឹកស្មានដល់។ ក្រុមអ្នកសង្កេតការណ៍យល់ថាសព្វថ្ងៃនេះក្រុមធំៗដែលកំពុងប្រឆាំងនឹងអ៊ីស្រាអែល និងដែលទទួលការឧបត្ថម្ភគាំទ្រពីអ៊ីរ៉ង់មានដូចជាក្រុមហ៊ូទីនៅប្រទេសយេម៉ែន, ក្រុមហេសបូឡានៅប្រទេសលីបង់ និងក្រុមហាម៉ាស់នៅតំបន់ហ្កាហ្សានៃដែនដីប៉ាឡេស្ទីន។ នេះជាផ្នែក១នៃយុទ្ធសាស្ត្រធ្វើសង្គ្រាមប្រយោលរបស់អ៊ីរ៉ង់ចំពោះអ៊ីស្រាអែល៕
ចែករំលែកព័តមាននេះ