នៅក្នុងសង្គមខ្មែរយើង មិត្តភាពពេលខ្លះបានបែកបាក់ នៅពេលដែលមិត្តភក្តិឡើងធំមានអំណាច មានលុយ ដោយភ្លេចពេលដែលនៅទាបតូច និងក្រីក្រ ។ តើមាសប្រាក់ បុណ្យសក្តិ និងអំណាចនឹងធ្វើអោយមនុស្សគ្រប់គ្នាទាំងអស់ប្រែធាតុ…
នៅក្នុងសង្គមខ្មែរយើង មិត្តភាពពេលខ្លះបានបែកបាក់ នៅពេលដែលមិត្តភក្តិឡើងធំមានអំណាច មានលុយ ដោយភ្លេចពេលដែលនៅទាបតូច និងក្រីក្រ ។ តើមាសប្រាក់ បុណ្យសក្តិ និងអំណាចនឹងធ្វើអោយមនុស្សគ្រប់គ្នាទាំងអស់ប្រែធាតុ ឬយ៉ាងណា?
មនុស្សទាំងអស់មិនដូចគ្នាទេ ដូច្នេះវាគ្មានចម្លើយពិតប្រាកដនឹងសំនួរខាងលើឡើយ ។ ពីព្រោះមនុស្សខ្លះក៏បានប្រែធាតុ ខណ:ដែលអ្នកខ្លះទៀត គឺនៅតែមិនប្រែធាតុភ្លេចមិត្តក្នុងពេលក្រីក្ររបស់ពួកគេឡើយ ។
អ្នកធំ និងអ្នកមានដែលប្រែប្រួលចរិតបែបនេះ នៅក្នុងសង្គមមានមិនតិចឡើយ ។ ពួកគេបានរៀប ឫកពាប្លែកខុសគ្នា៣៦០ដឺក្រេតែម្តង ។ ដោយប្រែប្រួលពីភាពរាក់ទាក់ស្និទ្ធស្នាលទៅឆ្មើងឆ្មៃ ភ្លេចមិត្តភកក្តិកម្សត់កម្រ ភ្លេចអ្វីៗដែលធ្លាប់ ធ្វើកាលនៅក្រ ឬនៅជាមន្ត្រីតូចតាចជាមួយគ្នាអស់រលីង ។ នៅក្នុងសង្គម អ្នកធំដែលមានចរិតបែបនោះ ព្យាយាមសម្តែងនិងរៀបចំខ្លួនទៅតាមបុណ្យស័ក្តិរបស់គេ ហើយទោះជាជួបអ្នកស្គាល់គ្នា កាលនៅតូចទាបគឺធ្វើមិនស្គាល់មិននិយាយមិនស្តីតែម្តង ។ និយាយឲ្យចំទៅក្រុមមនុស្សជំពូកដែលមានចរិតលក្ខណៈបែបនេះរមែងព្យាយាមនៅឆ្ងាយពីមិត្តភក្តិ កម្សត់កម្រនឹងគ្នាដោយមានហេតុផលផ្សេងៗដូចជា ភ័យខ្លាចអាប់មុខដោយសារមិត្តភក្តិ ឬក៏ភ័យខ្លាចមិនភក្តិពឹងពាក់ ឬរំខានជាដើម ។
ប៉ុន្តែទន្ទឹមពេលជាមួយគ្នានោះយើងក៏ត្រូវតែទទួលស្គាល់ថា មនុស្សទាំងអស់មិនដូចគ្នាឡើយ ។ ដូចអ្វីដែលយើងឃើញស្រាប់ អ្នកខ្លះ គឺគេមិនប្រែធាតុទេ ទោះបីជាឥឡូវគេក្លាយជាសេដ្ឋី គេក្លាយជាអ្នកធំ ក្លាយជារដ្ឋមន្ត្រីហើយក៏ដោយ ។ គេនៅតែរក្សាមិត្តភាពជាយូរលង់មករបស់ខ្លួន ដោយមិនបោះបង់មិត្តដែលស្គាល់គ្នាក្នុងពេលក្រីក្រឡើយ ។ ប៉ុន្តែផ្ទុយទៅវិញ គេបែរជាប្រឹងប្រែងរក្សាមិត្តភក្តិចាស់ និងផ្តល់ការជួយជ្រោមជ្រែង ដល់មិត្តដែលមានការលំបាកក្នុងជីវិត ។ នេះគេហៅថា កល្យាណមិត្តពិតប្រាកដ។ ប៉ុន្តែ ជាចិត្តសាស្ត្ររបស់មនុស្សជាតិ បែបបទនៃជីវិត និងជីវភាពរស់នៅប្រចាំថ្ងៃរមែងមានការប្រែប្រួលជាបន្តបន្ទាប់ ទៅតាមពេលវេលា ឋានៈ តួនាទី កិត្តិយស អំណាច និងទឹកប្រាក់ ។ ដូច្នេះហើយនៅពេលដែលនរណាម្នាក់មានការប្រែប្រួលដូចអ្វីដែលរៀបរាប់នោះ គឺរមែងមានការប្រែប្រួលឫកពាផងដែរ ។ សូមកុំប្រកាន់ ហើយថា គេឆ្មើងគេឆ្មៃ នេះ គឺជាបែបបទនៃសង្គម ។
នៅក្នុងចំណោមមិត្តភក្តិ និងមិត្តរួមការងារក្តី នៅពេលដែលនរណាម្នាក់នៅក្នុងក្រុមមានការឡើង ឋានៈ និងតួនាទី ក៏ដូចជាទឹកប្រាក់ហើយ អ្នកដែលឡើងនោះគេក៏រៀនសម្របសម្រួលខ្លួន ហើយរៀនរៀបចំ និងប្រយ័ត្នប្រយែងនៅក្នុងការទំនាក់ទំនងជាងពីមុន ដើម្បីធានាដល់ប្រសិទ្ធភាពការងាររបស់ពួកគេ ។ នោះ គឺជារឿងដែលចៀសមិនផុតឡើយ ដូច្នេះ ប្រសិនបើចង់រក្សាទំនាក់ទំនងមិត្តភាពនឹងគ្នាបានយូរអង្វែងតទៅមុខ យើងត្រូវយល់យោគ ហើយកុំប្រកាន់ច្រើនពេក ។ យើងគួរចៀសវាង ប្រកាន់ជាប់ចិត្តពាក្យដែលថា «អ្នកក្រអាងចិត្ត» ។
កុំភ្លេចឲ្យសោះថា ពីមុនគេអាចជាមិត្តជាអ្នករួមការងារ រួមអាជីព មានឋានៈ បុណ្យស័ក្តិស្មើគ្នា យើងលេងសើចជាមួយគ្នាមិនជាអ្វីទេ ហើយអាចលេងសើចគ្រប់ពេលវេលាគ្រប់កាលៈទេសៈបាន ។ ប៉ុន្តែនៅពេលដែលគេឡើងធំ ហើយសូមទុកកិត្តិយសឲ្យគេខ្លះផង ប្រសិនបើចង់រក្សាទំនាក់ទំនងឲ្យល្អូកល្អើននឹងគ្នាបានយូរអង្វែង ។
ការលេងស្មើលើ ស្មើក្រោម គឺនៅពេលក្រៅម៉ោង ឬក៏ពេលវេលាណាមួយដែលមានលក្ខណៈជាឯកជន គឺអាចបាន ប៉ុន្តែនៅកន្លែងការងារ ឬកន្លែងសាធារណៈគួរតែមាន ឋានានុក្រម និងបែបបទការងារឲ្យបានត្រឹមត្រូវ ។
សរុបទៅ ប្រសិនបើជាមនុស្សដែលមានគុណធម៌ ការរាប់អានមិត្ត និងចំណងមិត្តភាព គឺមិនប្រែប្រួលឡើយ ។ ពីមុនបែបណា ពេលនេះបែបនោះដដែល ប៉ុន្តែនៅក្នុងនាមជាមិត្តល្អ ទាំងអ្នកក្រ ទាំងអ្នកធំ អ្នកមាន គួរតែយោគយល់ និងគោរពកាលៈទេសៈគ្នាទៅវិញទៅមក ។ មនុស្សដែលចេះយល់ចេះគោរពកាលៈទេសៈ ដឹងពេលវេលាត្រូវលេងពេលត្រូវសាច់ការ គឺរមែងតែងតែអាចរក្សាចំណងមិត្តភាពនោះបានកាន់តែយូរអង្វែងតរៀងទៅ ៕
ចែករំលែកព័តមាននេះ