ទីក្រុងម៉ូស្គូ៖ រុស្ស៊ីកំពុងតែមិនទាន់ស្ងប់ចិត្តទាល់តែសោះនៅថ្ងៃរៀបចំទិវាជ័យជម្នះនាថ្ងៃទី៩ ខែឧសភាខាងមុខនេះព្រោះស្រួលមិនស្រួលវាអាចក្លាយជាព្រឹត្តិការណ៍សោកនាដកម្មទៅវិញ។ គេដឹងថានៅថ្ងៃនោះ រុស្ស៊ីបានអញ្ជើញភ្ញៀវជាតិ និងអន្តរជាតិធំៗលំដាប់ពិភពលោកទៅចូលរួមទិវាជ័យជម្នះលើពួកណាហ្ស៊ីអាល្លឺម៉ង់កាលពីអំឡុងសង្គ្រាមលោកលើកទី២។
លោកពូទីនកាលពីថ្ងៃចន្ទបានប្រកាសបទឈប់បាញ់បីថ្ងៃជាឯកតោភាគីចាប់ពីថ្ងៃទី៨-១០ ខែឧសភា។ នៅពេលរុស្ស៊ីកំពុងទន្ទឹងរង់ចាំមើលជំហររបស់អ៊ុយក្រែន ទីក្រុងកៀវហាក់ដូចជាមិនបានផ្ដល់ការយល់ព្រមទទួលយកបទឈប់បាញ់នេះទេ។ ឧបមាថារុស្ស៊ីឈប់បាញ់តែម្នាក់ឯង ប៉ុន្តែអ៊ុយក្រែននៅបាញ់ វានឹងក្លាយជារឿងដ៏គួរឱ្យព្រួយបារម្ភបំផុត។ វាមិនខុសពីសំណើនៃបទឈប់បាញ់៣០ថ្ងៃដែលអាមេរិកបញ្ជូនទៅឱ្យលោកពូទីនពិនិត្យមើលត្រូវលោកច្រានចោលនោះឡើយ។
កាលនោះ អ៊ុយក្រែនប្រកាសទទួលយកឯកតោភាគី ប៉ុន្តែលោកពូទីនមិនទទួលយក។ ដូច្នេះ វិមានក្រឹមឡាំងបញ្ជាក់ថាខ្លួនចង់ឃើញអ៊ុយក្រែនផ្ដល់ចម្លើយតបដ៏ប្រាកដប្រជាមួយចំពោះបទឈប់បាញ់ដែលរុស្ស៊ីប្រកាសបីថ្ងៃនោះថាតើអ៊ុយក្រែនគិតយ៉ាងណាចំពោះសំណើនោះ។ រឿងនេះប្រហែលជាមិនអាចមើលស្រាលបានទេ ហើយក៏មិនមែនជារឿងសាមញ្ញពេកដែរ។ រុស្ស៊ីកំពុងតែអន្ទះសាចង់បានការសន្យា និងការធានាដ៏ប្រាកដប្រជាខណៈដែលអាមេរិកក៏មិនបានអំពាវនាវអ្វីទាំងអស់។
ប្រភពខ្លះថាអ៊ុយក្រែនបានច្រានចោលសំណើនេះហើយព្រោះជាឱកាសល្អកម្ររកបានដើម្បីក្រឡុកស្ថានការណ៍នៅរុស្ស៊ីជាលក្ខណៈបំបាក់មុខរុស្ស៊ីម្ដង។ តាមពិតការរំលឹកទិវាជ័យជម្នះលើកនេះជាព្រឹត្តិការណ៍សំខាន់ព្រោះជាខួបទី៨០ឆ្នាំ។ ទោះបីមិនឆ្លើយតបដោយត្រង់ថាគាំទ្រ ឬប្រឆាំងនឹងបទឈប់បាញ់បីថ្ងៃនេះ ប៉ុន្តែលោកហ្សេឡិនស្គីក៏ឆ្លៀតឱកាសនេះជំរុញឱ្យរុស្ស៊ីទទួលយកបទឈប់បាញ់៣០ថ្ងៃទើបលោកយល់ព្រម។ ហ្សេឡិនស្គីថាលោកទទួលយកតែបទឈប់បាញ់៣០ថ្ងៃប៉ុណ្ណោះ។
អ្នកនាំពាក្យវិមានក្រឹមឡាំងថ្លែងថាសំណើនៃបទឈប់បាញ់បីថ្ងៃនេះជាវិញ្ញាសាសម្រាប់វាស់ស្ទង់ជំហររបស់អ៊ុយក្រែនដើម្បីបញ្ជាក់ថាតើទីក្រុងកៀវពិតជាបានត្រៀមខ្លួនរួចរាល់ដើម្បីស្វះស្វែងរកការបញ្ចប់សង្គ្រាមដែរឬទេ។ អនុប្រធានក្រុមប្រឹក្សាសន្តិសុខជាតិរុស្ស៊ី លោកមេតវេដេវ (Dmitri Medvedev) ថ្លែងថានៅថ្ងៃរំលឹកទិវាជ័យជម្នះនោះ បើអ៊ុយក្រែនហ៊ានធ្វើអ្វីមិនស្រួលអាចនឹងមានរឿងធំជាមួយគ្នាជាមិនខានឡើយ។ លោកព្រមានថាបើនៅថ្ងៃនោះ អ៊ុយក្រែនវាយប្រហារទីក្រុងម៉ូស្គូ លោកមិនហ៊ានធានាថាតើអ៊ុយក្រែននឹងមានដង្ហើមរស់តទៅទៀតឬយ៉ាងណា។
ការថ្លែងដូច្នេះបន្ទាប់ពីលោកហ្សេឡិនស្គីប្រកាសថាភ្ញៀវកិត្តិយស និងអ្នកមុខអ្នកការដែលត្រូវលោកពូទីនអញ្ជើញទៅចូលរួមទិវាជ័យជម្នះនោះមិនដឹងថាមានជោគវាសនាយ៉ាងណាទេព្រោះលោកសូមមិនធានាសុវត្ថិភាពសម្រាប់ពួកគេទេ។ លោកយល់ថាបញ្ហាសន្តិសុខ និងសុវត្ថិភាពនៅលើទឹកដីរុស្ស៊ីត្រូវតែរុស្ស៊ីជាអ្នកទទួលខុសត្រូវ។ ហេតុនេះលោកសូមផ្ដាំត្រឡប់ទៅវិញថាអ៊ុយក្រែនមិនធានាខុសត្រូវជាដាច់ខាត។
មេតវេដេវយល់ថាពាក្យសម្ដីរបស់ហ្សេឡិនស្គីជាភាសាញុះញង់បង្កហេតុ។ លោកថាគ្មាននរណាបានស្នើសុំឱ្យអ៊ុយក្រែនធានាសន្តិសុខនៅថ្ងៃរៀបចំទិវាជ័យជម្នះនោះទេ។ មេតវេដេវផ្ដាំត្រឡប់ទៅវិញថាហ្សេឡិនស្គីយល់ច្បាស់ណាស់បើអ៊ុយក្រែនហ៊ានបង្កការរំខាននៅថ្ងៃរៀបចំទិវាជ័យជម្នះ គ្មាននរណាអាចធានាបានថាទីក្រុងកៀវនឹងមានដង្ហើមរស់នៅថ្ងៃទី១០ ខែឧសភាដែរឬទេដែលជាថ្ងៃបន្ទាប់នៃការរំលឹកទិវានោះ។ នេះបើតាមប្រភពពីទីភ្នាក់ងារព័ត៌មានរ៉យទ័រ និងប្រភពដទៃទៀត៕
ចែករំលែកព័តមាននេះ