ទីក្រុងកៀវ៖ ប៉ុន្មានថ្ងៃចុងក្រោយនេះ រុស្ស៊ីសម្រុកវាយប្រហារទៅលើទីក្រុងធំលំដាប់ទី២របស់អ៊ុយក្រែនយ៉ាងខ្លាំងក្លាដើម្បីមានប្រៀបនៅក្នុងសង្គ្រាមនៅពេលអាមេរិកកំពុងខិតខំសម្របសម្រួលឱ្យមានបទឈប់បាញ់។ រុស្ស៊ីសម្រុកវាយប្រហារកាន់តែខ្លាំងលើទីក្រុងខាគីវបន្ទាប់ពីអនុប្រធានាធិបតីអាមេរិកប្រមើលឃើញថាសង្គ្រាមអ៊ុយក្រែនមិនងាយចប់ និងបន្ទាប់ពីរដ្ឋមន្ត្រីការបរទេសអាមេរិកព្រមានជាថ្មីថាលោកត្រាំនឹងដកថយពីការចរចាគ្នាមែនទែនហើយបើនៅតែផ្ទុះអាវុធដាក់គ្នាទៀត។
អាជ្ញាធរអ៊ុយក្រែនអះអាងថាដ្រូនរបស់រុស្ស៊ីហោះទៅវាយប្រហារទីក្រុងខាគីវជាច្រើនទីតាំងបណ្ដាលឱ្យរបួសមនុស្សយ៉ាងតិច៤៦នាក់ និងធ្វើឱ្យអគារដ៏ខ្ពស់ស្កឹមស្កៃឆេះនៅក្នុងអណ្ដាតភ្លើងយ៉ាងសន្ធោសន្ធៅ។ អភិបាលក្រុងខាគីវ លោកអ៊ីហ័រ ថេរ៉េខូស (Ihor Terekhov) បង្ហោះសារនៅលើតេឡេក្រាមថាកាលពីយប់មិញថារុស្ស៊ីវាយប្រហារទៅលើទីតាំង១២កន្លែងនៃសង្កាត់ចំនួន៤។ ទីក្រុងនេះស្ថិតនៅភាគឦសានចម្ងាយ៣០គីឡូម៉ែត្រពីព្រំដែន។ ដូច្នេះ ងាយស្រួលក្នុងការវាយប្រហារយ៉ាងខ្លាំង។
លោកហ្សេឡិនស្គីប្រកាសថ្កោលទោសជាទម្ងន់ដែលរុស្ស៊ីបន្តប្រើប្រាស់ដ្រូនវាយប្រហារតាមអាកាសជាច្រើនថ្ងៃជាប់គ្នាទៅលើទីក្រុងនេះ។ ទន្ទឹមនឹងនោះ លោកក៏ស្នើសុំឱ្យក្រុមសម្ព័ន្ធមិត្តជួយពង្រឹងប្រព័ន្ធការពារដែនអាកាសរបស់អ៊ុយក្រែនផងដែរ។ លោកយល់ថាពួកគេហាក់ដូចជាយឺតយ៉ាវក្នុងការបញ្ជូនគ្រឿងបរិក្ខារទាំងនោះឱ្យបានទាន់ចិត្ត។ លោកថាសព្វថ្ងៃនេះ រុស្ស៊ីសម្រុកវាយប្រហារទីតាំងជនស៊ីវិល។ រុស្ស៊ីវាយប្រហារអគារដែលមានមនុស្សកំពុងគេងយ៉ាងលង់លក់នៅក្នុងដំណេក។
ដោយសារក្រុមសម្ព័ន្ធមិត្តក្របញ្ជូនប្រព័ន្ធការពារដែនអាកាសទៅឱ្យអ៊ុយក្រែន ជាហេតុធ្វើឱ្យរុស្ស៊ីបានរឹតតែបានដៃ និងវាយប្រហារសឹងរាល់ថ្ងៃក្លាយជារាត្រីរន្ធត់សម្រាប់ប្រជាជនអ៊ុយក្រែន។ លោកថាអ៊ុយក្រែនត្រូវការប្រព័ន្ធការពារដែនអាកាសដ៏ខ្លាំងពូកែ។ លោកសូមអំពាវនាវឱ្យពួកគេសម្រេចចិត្តឱ្យបានឆាប់រហ័សមិនថាអាមេរិក អឺរ៉ុប ឬប្រទេសដទៃទៀតនោះទេ។
អាជ្ញាធរអ៊ុយក្រែនអះអាងថាកាលពីយប់មិញ រុស្ស៊ីក៏វាយប្រហារទីក្រុងនីកូប៉ូល (Nikopol) នៃតំបន់ឌីនីប្រូ (Dnipro) ផងដែរដោយប្រើប្រាស់ផ្គួបគ្នារវាងដ្រូន និងកាំភ្លើងធំ។ ចំណែកនៅតំបន់ខឺសុន (Kherson) អ៊ុយក្រែនថាអ្នកភូមិម្នាក់បានស្លាប់នៅពេលដ្រូន១គ្រឿងហោះទៅធ្លាក់ក្បែរកន្លែងស្នាក់នៅរបស់គាត់។ ដូច្នេះ គាត់ក៏ព្យាយាមអូសដ្រូនដែលធ្លាក់នោះចេញឱ្យឆ្ងាយពីផ្ទះរបស់គាត់។ កំពុងអូសចេញសុខៗ ដ្រូននោះក៏ផ្ទុះឡើងយ៉ាងកងរំពងតែម្ដង។
មិនមែនតែរុស្ស៊ីទេដែលវាយអ៊ុយក្រែន។ កាលពីយប់មិញ ក្រសួងការពារជាតិរុស្ស៊ីអះអាងថាខ្លួនបានបាញ់ទម្លាក់ដ្រូនរបស់អ៊ុយក្រែនយ៉ាងតិចដប់គ្រឿងនៅក្នុងរយៈពេលត្រឹមតែ១ម៉ោងប៉ុណ្ណោះ។ ក្នុងនោះ ៨គ្រឿងហោះឆ្លងព្រំដែននៅត្រង់ចំណុចប្រ៊ីយ៉ង់ (Bryanksk) និង២គ្រឿងទៀតហោះពីលើដែនអាកាសនៃតំបន់គ្រីម៉េបែបប្រុងវាយប្រហារទីតាំងណា១នៅទីនោះ។
អភិបាលស្ដីទីតំបន់រ៉ូស្តូវ (Rostov) ដែលស្ថិតនៅព្រំដែនខាងកើត លោកយូរី ស្ល៊ូសា (Yuri Slyusar) ថ្លែងថាប្រព័ន្ធការពារដែនអាកាសរបស់រុស្ស៊ីបានបាញ់ទម្លាក់ដ្រូនរបស់អ៊ុយក្រែនជាច្រើនគ្រឿងដែលប្រុងវាយប្រហារទីតាំង៥ន្លែង។ ដ្រូនទាំងនោះធ្លាក់ត្រូវចំផ្ទះរបស់អ្នកស្រុកធ្វើឱ្យខូចខាតជាច្រើនកន្លែង។ ប៉ុន្តែសំណាងល្អគ្មាននរណាម្នាក់រងរបួស ឬស្លាប់ទេ៕
ចែករំលែកព័តមាននេះ