ទីក្រុងឥស្លាមម៉ាបាត៖ ថ្ងៃនេះ ប៉ាគីស្ថានប្រកាសថាខ្លួនបានធ្វើតេស្តសាកល្បងដោយជោគជ័យនូវគ្រាប់មីស៊ីលស៊ែរីទំនើបម៉ាកអាប់ដាលី (Abdali)។ ដូច្នេះ អាចជាការផ្ញើសារទៅប្រទេសឥណ្ឌាដែលចង់វាយប្រហារទៅលើខ្លួនដើម្បីសងសឹកករណីបាញ់ប្រហារស្លាប់អ្នកទេសចរឥណ្ឌា និងជនជាតិដទៃទៀតសរុប២៦នាក់នៅតំបន់កាស់ស្មៀ។ យោធាប៉ាគីស្ថានអះអាងថាខ្លួនបានបាញ់មីស៊ីលពីដីទៅដីដែលមានវង់ប្រតិបត្តិការ៤៥០គីឡូម៉ែត្រ។
ការបាញ់សាកល្បងនេះធ្វើឡើងនៅពេលកំពុងមានភាពតានតឹងខ្លាំងរវាងឥណ្ឌា និងប៉ាគីស្ថាន។ ឥណ្ឌាកំពុងសម្រួចមាត់ និងសង្គ្រឺតធ្មេញដាក់ប៉ាគីស្ថានយ៉ាងខ្លាំង។ ចំណែកសហគមន៍អន្តរជាតិក៏កំពុងធ្វើនយោបាយការទូតយ៉ាងដុតដៃដុតជើងដើម្បីបន្ធូរបន្ថយស្ថានការណ៍។ ប៉ាគីស្ថានអះអាងថាការបាញ់សាកល្បងមីស៊ីលលើកនេះដើម្បីធានាថាកងទ័ពរបស់ខ្លួនបានត្រៀមលក្ខណៈសម្បត្តិរួចជាស្រេចដើម្បីទប់ទល់នឹងលទ្ធភាពនៃការវាយប្រហារ និងដើម្បីដាក់ឱ្យដំណើរការប្រព័ន្ធបច្ចេកទេសយោធា។
ការបាញ់សាកល្បងនោះធ្វើឡើងក្រោមការត្រួតពិនិត្យដោយហ្មត់ចត់ពីសំណាក់មេបញ្ជាការកំពូលៗនៃកងទ័ពប៉ាគីស្ថានា។ ក្រោយការបាញ់សាកលល្បងដោយជោគជ័យនេះ ថ្នាក់ដឹកនាំប៉ាគីស្ថានដូចជាប្រធានាធិបតី, នាយករដ្ឋមន្ត្រី, នាយអគ្គសេនាធិការកងទ័ព រួមទាំងក្រុមអ្នកវិទ្យាសាស្ត្រ និងវិស្វករប៉ាគីស្ថានបានអបអរសាទរចំពោះសមិទ្ធផលនេះយ៉ាងកងរំពង។
ភាពតានតឹងរវាងប្រទេសនុយក្លេអ៊ែរទាំង២កំពុងពុះកញ្ជ្រោលខ្លាំងប្រៀបដូចទឹកពុះ១០០អង្សា។ ឥណ្ឌាបានបិទច្រកព្រំដែនជិតឈឹង និងបានផ្ដល់សិទ្ធិគ្រប់យ៉ាងឱ្យកងទ័ពនៅព្រំដែនបើកប្រតិបត្តិការសឹកទៅតាមស្ថានការណ៍ជាក់ស្ដែងដើម្បីតាមកម្ចាត់ក្រុមភេរវកម្ម។ អ្នករស់នៅតាមព្រំដែននៃតំបន់កាស់ស្មៀក៏ចាប់ផ្ដើមរៀបចំទីជម្រកក្រោមដីជាបណ្ដើរៗផងដែរ។
តាមពិតការបាញ់តដៃគ្នារវាងទាហានឥណ្ឌា និងប៉ាគីស្ថានបានចាប់ផ្ដើមរយៈពេលមួយសប្ដាហ៍មកហើយ។ ប៉ុន្តែវាគ្រាន់តែជាការប៉ះទង្គិចរប៉េះរប៉ោះតែប៉ុណ្ណោះ។ ឥណ្ឌាកំពុងត្រៀមលេងឈុតធំជាងនេះ និងកំពុងធ្វើសមយុទ្ធយោធាកក្រើកព្រះធរណី។ ប៉ាគីស្ថានក៏កំពុងធ្វើសមយុទ្ធយោធាផងដែរ។ ប៉ាគីស្ថានថ្វីដ្បិតមានកម្លាំងតិចជាងឥណ្ឌា ប៉ុន្តែបានប្រើសម្ដីយ៉ាងខែងរ៉ែង។
ប៉ាគីស្ថានផ្ដាំថាបើសិនឥណ្ឌាហ៊ានផ្សងព្រេងបើកឆាកប្រយុទ្ធជាមួយប៉ាគីស្ថានដូចពួកគេបាននិយាយមែន ពេលនោះពួកគេនឹងទទួលរងនូវការវាយបកវិញយ៉ាងទាន់ចិត្ត។ ឥឡូវនេះ ប្រភពខ្លះថាអាមេរិក និងអឺរ៉ុបកំពុងរត់ការយ៉ាងខ្វែងដៃខ្វែងជើងផ្នែកការទូតដើម្បីទាក់ទងទៅថ្នាក់ដឹកនាំឥណ្ឌា និងប៉ាគីស្ថានដើម្បីព្យាយាមចរចាគ្នាឱ្យអស់លទ្ធភាពជាមុនសិន៕
ចែករំលែកព័តមាននេះ