ទីក្រុងកៀវ៖ រុស្ស៊ីចាប់ផ្ដើមបង្កើនការវាយប្រហារកាន់តែខ្លាំងទៅលើអ៊ុយក្រែនដោយប្រើប្រាស់យន្តហោះដ្រូនផ្គួបគ្នាជាមួយមីស៊ីល។ កាលពីយប់មិញ ដ្រូនរបស់រុស្ស៊ីវាយប្រហារទីក្រុងហ្សាប៉ូរីហ្សៀ (Zaporizhia) នៅអ៊ុយក្រែនភាគឦសានបណ្ដាលឱ្យរបួសយ៉ាងតិច២៩នាក់រួមទាំងកុមារម្នាក់ផងដែរ។ នេះបើតាមការផ្សព្វផ្សាយរបស់លោកអ៊ីវ៉ាន ហ្វេដូរ៉ូស(Ivan Fedorov) ជាអភិបាលក្រុងហ្សាប៉ូរីហ្សៀ។
អភិបាលរូបនេះថ្លែងបន្តទៀតថារុស្ស៊ីវាយប្រហារយ៉ាងតិចដប់ដងទៅលើទីតាំងផ្សេងៗគ្នានៃទីក្រុងហ្សាប៉ូរីហ្សៀ និងធ្វើឱ្យខូចខាតផ្ទះសម្បែងរបស់ប្រជាជន។ ពោលគឺខូចខាតរាប់សិបកន្លែងដែលសុទ្ធតែជាអគារខ្ពស់ជង្គ្រឹង, គ្រឹះស្ថានអប់រំ និងហេដ្ឋារចនាសម្ព័ន្ធសំខាន់។ មនុស្សបីនាក់ត្រូវគេទាញចេញពីគំនរបាក់បែក ចំណែកមនុស្ស១២នាក់ទៀតរងរបួសធ្ងន់ ត្រូវដឹកទៅមន្ទីរពេទ្យជាបន្ទាន់។
ទ័ពអាកាសអ៊ុយក្រែនថ្លែងថារុស្ស៊ីបញ្ជូនដ្រូនយ៉ាងតិច១៥០គ្រឿងហោះងងឹតមេឃទៅវាយប្រហារអ៊ុយក្រែនកាលពីយប់មិញ។ ប៉ុន្តែខ្លួនអាចបាញ់ទម្លាក់បាន៦៤គ្រឿង។ ចំណែក៦២គ្រឿងទៀតមិនអាចហោះទៅវាយប្រហារគោលដៅបានសម្រេចនោះទេព្រោះប្រព័ន្ធអគ្គិសនីរបស់អ៊ុយក្រែនឆក់ទម្លាក់ខ្ទេចខ្ទីអស់។ អ៊ុយក្រែនមិនបានបញ្ជាក់ថាតើដ្រូន២៤គ្រឿងមានអ្វីកើតឡើង។
តាមរយៈរូបភាពដែលបង្ហោះតាមអ៊ីនធឺណិត គេឃើញថាអគារមួយខ្នងឆេះនៅក្នុងអណ្ដាតភ្លើងយ៉ាងសន្ធោសន្ធៅ និងឃើញក្រុមអ្នកជួយសង្គ្រោះព្យាយាមរើកកាយគំនរបាក់បែក និងឡើងទៅលើអគារបាក់បែកជាច្រើនកន្លែងដើម្បីរកមើលអ្នកនៅរស់រានមានជីវិត។ រូបថតមួយសន្លឹកបង្ហាញរូបអ្នកជួយសង្គ្រោះព្យាយាមបីបុរសម្នាក់ដែលរងរបួសពេញខ្លួន។
សារព័ត៌មានរបស់រដ្ឋាភិបាលអ៊ុយក្រែនផ្សាយថាការវាយប្រហារទៅលើទីក្រុងហ្សាប៉ូរីហ្សៀនោះក៏ធ្វើឱ្យខូចខាតរោងជាងជួសជួលរថភ្លើងមួយកន្លែងផងដែរ។ ទីនេះជាកន្លែងជួសជុលរថភ្លើងអគ្គិសនីសម្រាប់អ្នកដំណើរ។ អាជ្ញាធរអះអាងថារោងជាងនេះមិនអាចដំណើរការតទៅទៀតទេដោយសារការខូចខាតមានសភាពធំធេងពេក។ នេះបើតាមការផ្សាយរបស់ទី ភ្នាក់ងារព័ត៌មានរ៉យទ័រ និងប្រភពដទៃទៀត៕
ចែករំលែកព័តមាននេះ