នៅពេលដែលវៀតណាមប្រកាសដាក់គោលដៅលើកកម្ពស់ភាសាអង់គ្លេសឲ្យក្លាយជាភាសាទី២នៅក្នុងប្រទេសមួយនេះ មានពលរដ្ឋនៅក្នុងស្រុកយើងខ្លះបានផ្សព្វផ្សាយនិងចែករំលែកនៅលើបណ្តាញសង្គម ហើយចង់ឲ្យរដ្ឋាភិបាលប្រកាសទទួលស្គាល់ភាសាអង់គ្លេសជាភាសាទី២ដែរ ។ នៅពេលដែលមានមតិលើកឡើងបែបនេះ ក៏មានអ្នកខ្លះចង់បានភាសាអង់គ្លេសជាភាសាទី២ ហើយខ្លះថា គួរតែជាភាសាបារាំង ហើយខ្លះថា គួរតែគិតគូភាសាចិន…
នៅពេលដែលវៀតណាមប្រកាសដាក់គោលដៅលើកកម្ពស់ភាសាអង់គ្លេសឲ្យក្លាយជាភាសាទី២នៅក្នុងប្រទេសមួយនេះ មានពលរដ្ឋនៅក្នុងស្រុកយើងខ្លះបានផ្សព្វផ្សាយនិងចែករំលែកនៅលើបណ្តាញសង្គម ហើយចង់ឲ្យរដ្ឋាភិបាលប្រកាសទទួលស្គាល់ភាសាអង់គ្លេសជាភាសាទី២ដែរ ។
នៅពេលដែលមានមតិលើកឡើងបែបនេះ ក៏មានអ្នកខ្លះចង់បានភាសាអង់គ្លេសជាភាសាទី២ ហើយខ្លះថា គួរតែជាភាសាបារាំង ហើយខ្លះថា គួរតែគិតគូភាសាចិន ។ល។
តែតាមពិត ភាសាអង់គ្លេសនិងចិនបានក្លាយជាភាសាពេញនិយមរួចស្រេចទៅហើយក្នុងចំណោមប្រជាជនកម្ពុជា ដោយសារតម្រូវការការងារ។ នៅកម្ពុជា ពិសេសស នៅ ភ្នំពេញ ឪពុកម្តាយសឹងគ្រប់គ្នាបានអោយកូនរៀនភាសាអង់គ្លេសរួចទៅហើយ ពីព្រោះតែពួកគាត់យល់ថាភាសានេះចាំបាច់សម្រាប់ទំនាក់ទំនងរកស៊ី និង ការងារ។ ចំណែកភាសាចិនក៏កំពុងតែមានអ្នករៀនច្រើនឡើងៗផងដែរ ដោយសារតែឥឡូវចិនមកបណ្តាក់ទុនច្រើននៅកម្ពុជា និង មានទំនាក់ទំនងស៊ីជម្រៅជាមួយកម្ពុជា។
រឿងភាសានេះមិនចាំបាច់ជ្រួលជ្រើមប្រកាសតាមប្រទេសជិតខាងឡើយ។ អ្វីដែលយើងគួរធ្វើគឺគួរតែពង្រឹងនិងអភិរក្សភាសាកំណើតរបស់យើងជាភាសាជាតិតែមួយទៅ វាប្រសើរជាង ។
សម្រាប់កម្ពុជា វាជាមោទកភាពជាតិរបស់យើងទៅហើយដែលអាចរក្សាបាននូវភាសាជាតិរបស់យើងតាំងពីបុរាណកាលមកដល់បច្ចុប្បន្នដែលមានទាំងភាសានិយាយ អក្សរ និង ក្បួនខ្នាតវេយ្យាករណ៍ ។ យើងមានសុភាសិត យើងមានកំណាព្យ រឿងព្រេងនិទាន រឿងប្រជាប្រិយ ពេញលក្ខណៈជាភាសាមួយដ៏ពេញលេញ គ្រប់យ៉ាង។ ដូច្នេះគួរតែរក្សាភាសាផ្លូវការ យើងតែមួយបានហើយ ។
និយាយបែបនេះមិនមែនលើកទឹកចិត្តឲ្យយើងលើកកម្ពស់តែភាសាជាតិយើងនោះទេ ពីព្រោះសម័យនេះគឺជាសម័យសាកលភាវូបនីយកម្ម ហើយប្រកាន់យកគោលការណ៍ពហុភាគីនិយម ដូច្នេះចាំបាច់ត្រូវតែលើកកម្ពស់ការទំនាក់ទំនងហើយដើម្បីឲ្យការទំនាក់ទំនងនេះពេញលេញ គឺចាំបាច់ត្រូវចេះភាសាបរទេស ។
នៅក្នុងស្ថានភាពបច្ចុប្បន្ន ទោះបីកម្ពុជាមិនប្រកាសទទួលស្គាល់ភាសាណាជាភាសាទី២ក៏ពិតមែន ប៉ុន្តែប្រព័ន្ធអប់រំនៅក្នុងស្រុកយើងបើកទូលាយលើបញ្ហាសិក្សាភាសាបរទេសនេះ រួចទៅហើយ។ ដូច្នេះមិនចាំបាច់ប្រកាសទទួលស្គាល់អ្វីនោះទេ ។
នៅកម្ពុជាក្រៅពីសាលាអប់រំចំណេះទូទៅជាភាសាខ្មែរ គឺកម្ពុជាមានសាលាចំណេះទូទៅជាភាសាបរទេសស្រាប់ជាពិសេសគឺអង់គ្លេស ភាសាចិន បារាំង ដោយពេលនេះសាលាទាំងនោះគឺរៀនចំណេះជំនាញគ្រប់យ៉ាងជាភាសាបរទេសនេះតែម្តង ។ ក្រៅពីនោះគឺមានសាលាភាសាសុទ្ធដែលមានគ្រប់កម្រិតគ្រប់ប្រភេទ តាំងពីសាលាថោកបង់លុយតាមម៉ោងរហូតដល់បង់ជាខែ ជាត្រីមាស ជាឆមាស រហូតដល់ឆ្នាំ ។
ពាក់ព័ន្ធនឹងគោលដៅរបស់វៀតណាម តាមសេចក្តីរាយការណ៍របស់កាសែត Vietnam News បានឲ្យដឹងថា គោលដៅយកអង់គ្លេសជាភាសាទី២នេះ គឺជាចក្ខុវិស័យមួយ ដែលនឹងបើកហើយអនុញ្ញាតឲ្យសាលានៅក្នុងប្រទេសភាគខាងកើតកម្ពុជាមួយនេះ អាចមានកម្មវិធីសិក្សាចំណេះទូទៅជាភាសាអង់គ្លេស សម្រាប់បង្រៀនមុខវិជ្ជា និងជំនាញដែលសមស្របផ្សេងទៀត និងសម្រាប់ទំនាក់ទំនងប្រចាំថ្ងៃនៅសាលា។
ប្រភពដដែលបានបន្តថា វៀតណាមពង្រាងផែនការនេះឡើងនៅក្នុងគោលបំណងគឺដើម្បីបង្កើនជំនាញនៅក្នុងការបំពេញតម្រូវការសិក្សា និងការងារ បង្កើនការប្រកួតប្រជែងនៃកម្លាំងពលកម្មក្នុងយុគសម័យថ្មី និងរួមចំណែកដល់ការអភិវឌ្ឍន៍របស់ប្រទេស និងសមាហរណកម្មពិភពលោក។
ប្រភពដដែលបានបន្តថា ផែនការនេះរួមបញ្ចូលទាំងការអនុញាតដល់សាលាដំណើរការកម្មវិធីសិក្សាជាភាសាអង់គ្លេស ១០០ ភាគរយនៅថ្នាក់មត្តេយ្យសំរាប់កុមារដែលមានអាយុពី ៣ ទៅ ៥ ឆ្នាំ បន្ទាប់មកឈានទៅបើកផ្លូវឲ្យសាលាផ្តល់កម្មវិធីសិក្សាចំណេះទូទៅទាំងអស់ជាភាសាអង់គ្លេសតាំងពីថ្នាក់ទី ១ ដល់ថ្នាក់ទី ១២ ។
ដូចដែលរៀបរាប់ខាងលើរួចហើយ កម្មវិធីអប់រំនៅកម្ពុជាបើកផ្លូវហើយកំពុងតែអនុវត្តកម្មវិធីបើក ចំហនេះរួចហើយ រហូតដល់កូនខ្មែរខ្លះប្រើប្រាស់ភាសាអង់គ្លេសបានល្អជាងភាសាជាតិដែលជាភាសា កំណើតរបស់ខ្លួនថែមទៀតផង ។
ផ្អែកតាមទឡ្ហីករណ៍នេះ កម្ពុជាមិនចាំបាច់ប្រកាសយកភាសា ណាជាភាសាផ្លូវការទី២ឫទី៣ទី៤ឡើយ គឺរក្សាលំហ និងសិទ្ធិដូចសព្វថ្ងៃទៅវាប្រសើរហើយ ។ អ្វីដែលកម្ពុជាគួរតែធ្វើនៅពេលនេះ គឺគួរតែប្រឹងអភិរក្សភាសាជាតិបន្ថែម ហើយពង្រឹងការអប់រំភាសាបរទេសឲ្យវាត្រូវរបត់សង្គមនិងបំពេញតាមតម្រូវការនៃទីផ្សារការងារនិងស៊ីគ្នាជាមួយនឹងផែនការនិងគោលនយោបាយការបរទេសរបស់ខ្លួន ។
សព្វថ្ងៃនេះភាសាបរទេសមានរាប់ពាន់ភាសា តែភាសាផ្លូវការដែលសហគមន៍អន្តរជាតិទទួលស្គាល់ គឺមានតែ៦នោះទេ ហើយភាសានេះគឺមានការទទួលស្គាល់និងប្រើប្រាស់ជាផ្លូវការនៅក្នុងអង្គការសហប្រជាជាតិ ។ ភាសាទាំងនោះគឺមាន អង់គ្លេស បារាំង រុស្ស៊ី ចិន អេស្ប៉ាញ និង អារ៉ាប់ ។
កម្ពុជាគួរតែមានគោលដៅសម្រួចការអប់រំលើភាសាទាំង៦នេះឲ្យច្បាស់លាស់ ដោយសារតែភាសាគឺជាយានមួយនៃទំនាក់ទំនងនិងជាការបើកផ្លូវមួយ ដ៏សំខាន់នៅក្នុងការពង្រឹង ទំនាក់ទំនងខាងក្រៅតាមគោលដៅពហុភាគីនិយមដែលកម្ពុជាពិតជាចង់បាន ។
សរុបមកវិញ ភាសាជាតិគួរតែរក្សានិងអភិរក្សបន្ថែម ដោយមិនចាំបាច់កំណត់ ភាសាទី២ឫទី៣អ្វីឡើយ ។ តម្រូវការទីផ្សារការងារ បានកំនត់រួចស្រេចទៅហើយអំពីតម្រូវការចំណេះដឹងផ្នែកភាសាបរទេស៕
ចែករំលែកព័តមាននេះ