ខេត្តព្រៃវែង ៖ កង់បីមួយគ្រឿង បានក្រឡាប់ផ្ងារជើងនៅកណ្ដាលផ្លូវ ក្បែរគល់ស្ពានអ្នកលឿងដោយសារតែជិះទៅបុករថយន្តមួយគ្រឿងផ្សេងទៀត ដែលបើកមកបញ្ច្រាស់ទិសគ្នា។ គ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង 6 និង…
ខេត្តព្រៃវែង ៖ កង់បីមួយគ្រឿង បានក្រឡាប់ផ្ងារជើងនៅកណ្ដាលផ្លូវ ក្បែរគល់ស្ពានអ្នកលឿងដោយសារតែជិះទៅបុករថយន្តមួយគ្រឿងផ្សេងទៀត ដែលបើកមកបញ្ច្រាស់ទិសគ្នា។
គ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង 6 និង 40 នាទីព្រឹក ថ្ងៃទី 2 ឧសភា នៅលើកំណាត់ផ្លូវជាតិលេខ 1 ត្រង់ចំណុចក្បែរគល់ស្ពានអ្នកលឿង ហៅស្ពាន ត្សឹបាសា ដែលស្ថិតក្នុងភូមិជ័យឧត្តម ឃុំព្រែកខ្សាយ ( ក ) ស្រុកពាមរក៍ ខេត្តព្រៃវែង។
ជនរងគ្រោះក្នុងហេតុការណ៍នេះទីមួយឈ្មោះវែនបុតភេទប្រុសអាយុ 59 ឆ្នាំ ( ប្ដី ) រងរបួសដាច់ប្រអប់ ជើងខាងឆ្វេង និងដាច់រលាត់ខ្លួនប្រាណ ចំណែកស្ត្រីជាប្រពន្ធឈ្មោះ ជួន ថា អាយុ 59 ឆ្នាំរងរបួសផ្នែកចង្កេះនិងពកក្បាល អ្នកទាំង២មានទីលំនៅក្នុងភូមិឆ្កែស្លាប់ ឃុំជីឆ្មា ស្រុកត្រាំ ខេត្តតាកែវ រីឯរថយន្តម្ខាងទៀតម៉ាកសាំយ៉ុងដឹកអ្នកដំណើរបើកបរដោយឈ្មោះ ហង់ សាវី ភេទប្រុស អាយុ 38 ឆ្នាំ មានទីលំនៅក្នុងឃុំពោធិរាជ ស្រុកស្វាយជ្រុំខេត្តស្វាយរៀង។
តាមការរៀបរាប់របស់ជនរងគ្រោះឈ្មោះ វ៉ែន ប៊ុតបានឲ្យដឹងថា មុនពេលកើតហេតុ រូបគាត់បើក pass app ដឹកប្រពន្ធធ្វើដំណើរចុះពីលើស្ពានអ្នកលឿង ក្នុងទិសដៅពីលិចទៅកើត ពេលមក ដល់កន្លែងកើតហេតុ ស្រាប់តែងងឹតមុខ ធ្វើឱ្យកង់បីរេចង្កូតជ្រុលទៅបុកជញ្ជាំងរថយន្តសាំយ៉ុង ដែលបើកមកបញ្ច្រាស់ទើសគ្នា បណ្ដាលឲ្យកង់បីរបស់គាត់ ក្រឡាប់ផ្ងារជើងតែម្ដង។
ក្រោយកើតហេតុភ្លាមៗ សមត្ថកិច្ចបានទៅដល់កន្លែងកើតហេតុ ជួយសម្រួលចរាចរណ៍ និងបានទាក់ទងហៅរថយន្តសង្គ្រោះ ទៅដឹកជនរងគ្រោះយកទៅព្យាបាល នៅមន្ទីរពេទ្យបង្អែកអ្នកលឿងភ្លាមៗ ដោយឡែកភាគីខាងរថយន្ត ដោយសារគ្មានរងរបួស ហើយមិនមែនជាអ្នកបង្ក សមត្ថកិច្ចក៏បានអនុញ្ញាតឲ្យបន្តដំណើរទៅមុខតែម្ដង ៕
ចែករំលែកព័តមាននេះ