ទីក្រុងម៉ូស្គូ៖ បន្ទាប់អាមេរិកព្រមានជាថ្មីថានឹងដកខ្លួនថយឱ្យឆ្ងាយបើការចរចាមិនរីកចម្រើនទៅមុខ ថ្ងៃនេះវិមានក្រឹមឡាំងមានសារនយោបាយសំខាន់១ផ្ដាំត្រឡប់ទៅវិញ។ ក្រឹមឡាំងថាមុននឹងឈានទៅដល់ការសម្រេចបានកិច្ចព្រមព្រៀងបញ្ចប់សង្គ្រាមអ៊ុយក្រែន គេត្រូវការពេលវេលាយូរអង្វែងទៅមុខទៀត។ ក្រឹមឡាំងបញ្ជាក់ថាមូលហេតុមិនពិបាកយល់ទេ។
ដោយសារបញ្ហានេះមានលក្ខណៈស្មុគស្មាញប្រទាក់ក្រឡាគ្នាខ្លាំងពេក។ ដូច្នេះ មិនងាយនឹងដោះស្រាយបញ្ចប់ឱ្យបានឆាប់ៗទេ។ ប្រភពខ្លះថាលោកត្រាំមិនសប្បាយចិត្តប៉ុន្មានទេនឹងភាពយឺតយ៉ាវ និងការពិបាកនិយាយគ្នា។ លោកដាក់ការស្ដីបន្ទោសទៅលើអ៊ុយក្រែន និងរុស្ស៊ី។ លោកធ្លាប់និយាយថាលោកពូទីនស្រួលនិយាយគ្នាជាងលោកហ្សេឡិនស្គី។
ប៉ុន្តែឥឡូវនេះ លោកកំពុងដាក់ជាចម្ងល់ថាតើលោកពូទីនមានឆន្ទៈចង់បញ្ចប់សង្គ្រាមនៅក្នុងពេលឆាប់ៗនេះទេ។ ទន្ទឹមនឹងនោះ រុស្ស៊ីនៅតែបន្តវាយប្រហារយ៉ាងខ្លាំងក្លាទៅលើអ៊ុយក្រែន។ កាលពីយប់មិញ រុស្ស៊ីវាយប្រហារផ្គួបគ្នាដោយដ្រូន និងមីស៊ីលទៅលើទីក្រុងខាគីវ បណ្ដាលឱ្យរបួសមនុស្ស៤៥នាក់។
អង្គការសហប្រជាជាតិកត់សម្គាល់ថានៅពេលទីក្រុងវ៉ាស៊ីនតោនព្យាយាមដោះស្រាយបញ្ហាតាមរយៈការចរចាគ្នា រុស្ស៊ីសម្រុកវាយប្រហារអ៊ុយក្រែនកាន់តែខ្លាំង។ លោកពូទីនប្រកាសគាំទ្រឱ្យមានបទឈប់បាញ់មុនការចរចាសន្តិភាព។ ប៉ុន្តែមុននឹងឈានដល់បទឈប់បាញ់ លោកពូទីនចង់ឱ្យគេដោះស្រាយបញ្ហាកង្វល់របស់គាត់ជាមុនសិន។ នេះបើតាមការបញ្ជាក់របស់អ្នកនាំពាក្យវិមានក្រឹមឡាំង។
លោកប៉េស្កូស (Peskov) ថ្លែងថាលោកពូទីនមិនយល់ទាស់ទេនឹងការជួបសន្ទនាគ្នាដោយផ្ទាល់ដើម្បីដោះស្រាយបញ្ហានេះដោយគ្មានបុរេលក្ខខណ្ឌ។ យើងយល់ណាស់ថាទីក្រុងវ៉ាស៊ីនតោនចង់ឃើញដំណើរការចរចាគ្នារីកចម្រើនទៅមុខឱ្យបានឆាប់។ ប៉ុន្តែយើងសង្ឃឹមថាពួកគេក៏គួរតែយល់ថាបញ្ហាអ៊ុយក្រែនមិនទាន់អាចដោះស្រាយចេញឆាប់ៗនេះទេ។ មានបញ្ហាតូចៗជាច្រើនដែលត្រូវតែដោះស្រាយឱ្យបានរួចរាល់ជាមុនសិន៕
ចែករំលែកព័តមាននេះ